പ്രായമെന്ന് പറയുന്നത് വെറുമൊരു നമ്പർ മാത്രം, വിവാഹം കഴിഞ്ഞാലും സ്ത്രീകൾ തങ്ങളെത്തന്നെ സ്നേഹിക്കാനും സന്തോഷത്തോടെ ജീവിക്കാനും തയ്യാറാകണം ; നടി റോജ

  പ്രായമെന്ന് പറയുന്നത് വെറുമൊരു നമ്പർ മാത്രമാണെന്നും, വിവാഹം കഴിഞ്ഞാലും സ്ത്രീകൾ തങ്ങളെത്തന്നെ സ്നേഹിക്കാനും സന്തോഷത്തോടെ ജീവിക്കാനും തയ്യാറാകണമെന്നും നടി റോജ സെൽവമണി. ‘സ്റ്റേ ട്യൂൺഡ് വിത്ത് രമ്യ’ എന്ന യൂട്യൂബ് ചാനലിന് നൽകിയ അഭിമുഖത്തിലാണ് താരം തന്റെ ജീവിതത്തിലെയും ഗർഭകാലത്തെയും വിശേഷങ്ങൾ തുറന്നുപറഞ്ഞത്. ദാമ്പത്യത്തിൽ പരസ്പര സ്നേഹവും പിന്തുണയുമാണ് ഏറ്റവും പ്രധാനമെന്നും അവർ കൂട്ടിച്ചേർത്തു.

തന്റെ പ്രായത്തെക്കുറിച്ചോർത്ത് താൻ ഒരിക്കലും ബോറടിക്കാറില്ലെന്ന് റോജ വ്യക്തമാക്കുന്നു. തന്നെക്കുറിച്ച് പ്രായമായി എന്ന് കളിയാക്കുന്നവരോട്, നൃത്തം ചെയ്തോ പാട്ടുപാടിയോ സംസാരിച്ചോ ആർക്കാണ് യഥാർത്ഥത്തിൽ പ്രായമായതെന്ന് തെളിയിക്കാൻ താൻ തയ്യാറാണെന്ന് താരം പറയുന്നു. എല്ലാവരും പറയുന്നതുപോലെ പ്രായമെന്നത് ഒരു സംഖ്യ മാത്രമാണ്. നമ്മുടെ മനസ്സും എനർജിയുമാണ് എല്ലാറ്റിനും കാര്യം.

കല്യാണത്തിന് മുൻപ് പരസ്പരം ഇംപ്രസ് ചെയ്യാൻ ശ്രമിക്കുന്നവർ, വിവാഹം കഴിഞ്ഞാൽ ആ പ്രയത്നം ഉപേക്ഷിക്കുന്ന പ്രകൃതക്കാരുണ്ടെന്ന് റോജ ചൂണ്ടിക്കാണിക്കുന്നു. കല്യാണത്തിന് ശേഷം ഒരുങ്ങുന്നതും നല്ല വസ്ത്രം ധരിക്കുന്നതും തെറ്റാണെന്ന് വിചാരിക്കുന്ന ചില സുഹൃത്തുക്കളെ താൻ കണ്ടിട്ടുണ്ട്. എന്നാൽ അതൊക്കെ തെറ്റായ ചിന്തയാണ്. കണ്ണെഴുതി, പൊട്ടുതൊട്ട്, വൃത്തിയുള്ള വസ്ത്രം ധരിക്കുന്നതിൽ യാതൊരു തെറ്റുമില്ല. ഭർത്താവ് ജോലി കഴിഞ്ഞ് വരുമ്പോൾ വിലകൂടിയ മേക്കപ്പിലല്ല, മറിച്ച് പുഞ്ചിരിയോടെ ഒരു കപ്പ് കാപ്പി നൽകി സ്വീകരിക്കുന്നതിലാണ് കാര്യം. പണക്കാരനായാലും പാവപ്പെട്ടവനായാലും സന്തോഷത്തോടെ ജീവിച്ചാൽ ആരും നമ്മെ കുറ്റം പറയില്ലെന്ന് സ്വന്തം ജീവിതാനുഭവത്തിൽ നിന്ന് റോജ വ്യക്തമാക്കുന്നു.

തന്റെ ഗർഭകാലത്ത് ഭർത്താവ് സെൽവമണിയോട് താൻ ഏറെ ബുദ്ധിമുട്ടുകൾ ഉണ്ടാക്കിയിട്ടുണ്ടെന്നും റോജ തുറന്നുപറഞ്ഞു. ഷൂട്ടിങ് തിരക്കുകളിലായിരുന്നെങ്കിലും താൻ വിളിക്കുമ്പോഴൊക്കെ അദ്ദേഹം ഓടിയെത്തുമായിരുന്നു. ഗർഭകാലത്ത് സ്ത്രീകൾക്ക് ഭർത്താവ് തന്നെ ശ്രദ്ധിക്കുന്നില്ലെന്ന തരത്തിലുള്ള പല ചിന്തകളും തോന്നുക സ്വാഭാവികമാണ്. എന്നാൽ അത് പരസ്പരം മനസ്സിലാക്കി മുന്നോട്ടുപോകണം. ഭാര്യയോ ഭർത്താവോ വിഷമഘട്ടത്തിലോ ഡിപ്രഷനിലോ ആണെങ്കിൽ അങ്ങോട്ടുമിങ്ങോട്ടും ഒരു ‘കംഫർട്ട് സോൺ’ നൽകേണ്ടത് അത്യാവശ്യമാണ്. “നീ വിചാരിക്കുന്നത് ശരിയല്ല, ഞാൻ ഒപ്പമുണ്ട്” എന്ന ആത്മവിശ്വാസം നൽകിയാൽത്തന്നെ ദാമ്പത്യം സുന്ദരമാക്കാം എന്നും റോജ കൂട്ടിച്ചേർത്തു.