ശബരിമലയിൽ മണ്ഡല-മകരവിളക്ക് തീർഥാടനത്തിന് തുടക്കം; സന്നിധാനത്ത് വൻ ഭക്തജനത്തിരക്ക്

Mandala-Makaravilakku pilgrimage begins in Sabarimala; Huge crowd of devotees at Sannidhanam

രണ്ട് മാസം നീണ്ടുനിൽക്കുന്ന ശബരിമല മണ്ഡല-മകരവിളക്ക് തീർഥാടന കാലത്തിന് ഭക്തിസാന്ദ്രമായ തുടക്കം. വൃശ്ചികം ഒന്നായ ചൊവ്വാഴ്ച പുലർച്ചെ മൂന്ന് മണിക്ക് അയ്യപ്പക്ഷേത്ര നട ഭക്തർക്കായി തുറന്നു. പുതിയ മേൽശാന്തി അരീക്കര സുബ്രഹ്മണ്യൻ ശങ്കരൻ നമ്പൂതിരിയാണ് ശബരിമല നട തുറന്നത്. ഇതേസമയം പുതിയ മേൽശാന്തി എ. ദാമോദരൻ നമ്പൂതിരിയുടെ കാർമികത്വത്തിൽ മാളികപ്പുറം ക്ഷേത്രവും തുറന്നു. തിങ്കളാഴ്ച തന്ത്രി കണ്ഠര് ബ്രഹ്മദത്തന്‍റെ കാർമികത്വത്തിൽ നടന്ന ചടങ്ങുകൾക്ക് ശേഷമാണ് പുതിയ മേൽശാന്തിമാർ ചുമതലയേറ്റത്. പുലർച്ചെ നടന്ന നിർമാല്യ ദർശനത്തിൽ ദേവസ്വം മന്ത്രി കെ. മുരളീധരനും പങ്കെടുത്തു.

Mandala-Makaravilakku pilgrimage begins in Sabarimala; Huge crowd of devotees at Sannidhanam

തീർഥാടനത്തിന്‍റെ ആദ്യ ദിനം തന്നെ സന്നിധാനത്ത് ആയിരക്കണക്കിന് ഭക്തരാണ് എത്തിച്ചേർന്നത്. പ്രതിദിന ദർശന പരിധി 80,000 ആയി നിശ്ചയിച്ചിട്ടുണ്ട്. ഇതിൽ 66,000 പേർ വെർച്വൽ ക്യൂ വഴിയും 14,000 പേർ സ്പോട്ട് ബുക്കിങ് വഴിയുമാണ് ദർശനം നടത്തുന്നത്. തിരക്ക് നിയന്ത്രിക്കുന്നതിന്‍റെ ഭാഗമായി പമ്പയിൽ സ്പോട്ട് ബുക്കിങ് ഒഴിവാക്കിയിട്ടുണ്ട്. പകരം നിലയ്ക്കൽ, എരുമേലി, വണ്ടിപ്പെരിയാർ സത്രം എന്നിവിടങ്ങളിലാണ് സ്പോട്ട് ബുക്കിങ് സൗകര്യം ഒരുക്കിയിരിക്കുന്നത്.

Mandala-Makaravilakku pilgrimage begins in Sabarimala; Huge crowd of devotees at Sannidhanam

മിനിറ്റിൽ 75 തീർഥാടകരെ വീതം പതിനെട്ടാംപടി കയറ്റാനാണ് പൊലീസ് ലക്ഷ്യമിടുന്നത്. വെർച്വൽ ക്യൂ ബുക്ക് ചെയ്തവർ അനുവദിച്ച സമയത്തുതന്നെ എത്തണമെന്ന് എഡിജിപി പി. വിജയൻ നിർദേശിച്ചു. നിലയ്ക്കൽ മുതൽ തിരക്ക് നിരീക്ഷിക്കാൻ എഐ ക്യാമറകളും, ആറായിരത്തോളം പേർക്ക് ഒരേസമയം വിശ്രമിക്കാൻ കഴിയുന്ന ടെന്‍റുകളും ദേവസ്വം ബോർഡ് സജ്ജമാക്കിയിട്ടുണ്ടെന്ന് പ്രസിഡന്‍റ് കെ. ജയകുമാർ അറിയിച്ചു. ഡിസംബർ 27-ന് നടക്കുന്ന മണ്ഡലപൂജയോടെ മണ്ഡലകാലത്തിന് സമാപനമാകും. തുടർന്ന് ഡിസംബർ 30-ന് വൈകിട്ട് അഞ്ചിന് മകരവിളക്ക് തീർഥാടനത്തിനായി നട വീണ്ടും തുറക്കും. ജനുവരി 14-നാണ് മകരവിളക്ക് ഉത്സവം. ജനുവരി 19 വരെ ഭക്തർക്ക് ദർശന സൗകര്യമുണ്ടാകും. തീർഥാടനത്തിന് സമാപനം കുറിച്ച് ജനുവരി 20-ന് ക്ഷേത്ര നട അടയ്ക്കും.

Tags