16 വയസുകാരിയായ പെൺകുട്ടിയെ ലൈംഗിക പീഡനത്തിനിരയാക്കിയ കേസ് : 24 വയസുകാരന് 39 വർഷം കഠിന തടവ്

തൃശൂർ: 16 വയസുകാരിയായ പെൺകുട്ടിയെ ലൈംഗിക പീഡനത്തിനിരയാക്കിയ കേസിൽ 24 വയസുകാരന് 39 വർഷം കഠിന തടവും 2,40,000 രൂപ പിഴയും ശിക്ഷ. 2022 ഡിസംബർ 14നാണ് കേസിന് ആസ്‍പദമായ സംഭവം നടന്നത്. തൃശ്ശൂർ മതിലകം മാങ്ങാലി പറമ്പിൽ റിൻഷാദിനെയാണ് (24) ചാവക്കാട് അതിവേഗ സ്പെഷൽ കോടതി ജഡ്ജി അൻയാസ് തയ്യിൽ ശിക്ഷിച്ചത്. കോടതി വിധിച്ച പിഴ പ്രതി അടക്കാത്ത പക്ഷം 21 മാസം കൂടി അധിക തടവ് ശിക്ഷ അനുഭവിക്കണമെന്നും വിധിയിലുണ്ട്. പ്രതിയിൽനിന്ന് പിഴ ഈടാക്കുന്ന പക്ഷം ആ പിഴ തുക അതിജീവിതയ്ക്ക് തന്നെ നൽകണമെന്നും കോടതി വിധിച്ചു.