ബിരിയാണി മസാല പാക്കിംഗിന്റെ മറവിൽ കഞ്ചാവ് പൊതികൾ വിൽപന ;87.17 ഗ്രാം കഞ്ചാവുമായി യുവാവ് പോലീസ് പിടിയിൽ

കോഴിക്കോട്: ബിരിയാണി മസാല പാക്കിംഗിന്റെ മറവിൽ കഞ്ചാവ് പൊതികൾ വിൽപന നടത്തിയ യുവാവ് പിടിയിൽ. പേരാമ്പ്ര എരവട്ടൂർ കനാൽമുക്ക് സ്വദേശി കെ.കെ. മുഹമ്മദ് ഷമീം(39) ആണ് പേരാമ്പ്ര പൊലീസിന്റെ പിടിയിലായത്. ഇയാളിൽ നിന്ന് 87.17 ഗ്രാം കഞ്ചാവ് കണ്ടെടുത്തു.

ബിരിയാണി മസാല പാക്കിംഗിന്റെ മറവിൽ കഞ്ചാവ് പാക്ക് ചെയ്തു വിൽപന നടത്തുന്നുണ്ടെന്ന് പൊലീസിന് രഹസ്യവിവരം ലഭിച്ചിരുന്നു. ഇതിനെ തുടർന്ന് എരവട്ടൂരിലെ ഷമീം നടത്തിയിരുന്ന സ്ഥാപനത്തിൽ കയറി പരിശോധിച്ചപ്പോഴാണ് കഞ്ചാവ് പാക്കിംഗ് കണ്ടെത്തിയത്. ഇയാൾ എരവട്ടൂരും പേരാമ്പ്രയും കേന്ദ്രീകരിച്ച് യുവാക്കൾക്കും സ്‌കൂൾ വിദ്യാർഥികൾക്കും കഞ്ചാവ് വിതരണം നടത്തി വന്നിരുന്നയാളാണെന്ന് പൊലീസ് പറഞ്ഞു. ഷമീമിനെതിരെ എൻഡിപിഎസ് ആക്ട് പ്രകാരം കേസ് എടുത്തിട്ടുണ്ട്.

ലഹരി വിൽപനക്കാരെപ്പറ്റിയുള്ള വിവരങ്ങൾ ലഹരി വിരുദ്ധ സ്‌ക്വാഡുകൾക്ക് കൈമാറണമെന്നും ഇത്തരക്കാർക്കെതിരെ ശക്തമായ നടപടി സ്വീകരിക്കുമെന്നും പേരാമ്പ്ര ഡിവൈ എസ്പി അറിയിച്ചു. എസ്ഐ ഷമീർ, സനേഷ് എന്നിവരുടെ നേതൃത്വത്തിലാണ് പരിശോധന നടത്തിയത്.