കൊച്ചിയിൽ ഭാര്യയെ കൊലപ്പെടുത്തിയ കേസ് ; ഭർത്താവിന് ജീവപര്യന്തം തടവും ഒരു ലക്ഷം രൂപ പിഴയും

 കൊച്ചി: ഭാര്യയെ കൊലപ്പെടുത്തിയ കേസിൽ പ്രതിയായ ഭർത്താവിന് ജീവപര്യന്തം തടവും ഒരു ലക്ഷം രൂപ പിഴയും വിധിച്ചു. ഇടപ്പള്ളി സ്വദേശിയായ പി.ജി. സജുവിനെയാണ് പറവൂർ അഡീഷണൽ ജില്ലാ സെഷൻസ് കോടതി ശിക്ഷിച്ചത്.

 2018 ഒക്ടോബർ 11-ന് കളമശ്ശേരി മഞ്ഞുമ്മൽ റോഡിന് സമീപത്തെ വീട്ടിലാണ് സംഭവം നടന്നത്. ഭാര്യയോടുള്ള സംശയത്തെ തുടർന്ന് പ്രതി ഇവരെ കുത്തിക്കൊലപ്പെടുത്തുകയായിരുന്നു. സംഭവത്തിൽ കളമശ്ശേരി പൊലീസ് രജിസ്റ്റർ ചെയ്ത കേസിൽ വിശദമായ അന്വേഷണത്തിനൊടുവിലാണ് കുറ്റപത്രം സമർപ്പിച്ചത്.

കളമശ്ശേരി പൊലീസ് ഇൻസ്‌പെക്ടർ എ. പ്രസാദിന്റെ നേതൃത്വത്തിലാണ് അന്വേഷണം പൂർത്തിയാക്കിയത്. കേസിൽ പ്രോസിക്യൂഷന് വേണ്ടി അഡീഷണൽ പബ്ലിക് പ്രോസിക്യൂട്ടർമാരായ അഡ്വ. എം.ബി. ഷാജിയും അഡ്വ. എസ്. രാഖിയും ഹാജരായി.