സ്മാർട്ട്‌ഫോൺ വില 2026-ഓടെ കുത്തനെ കൂടും

കൗണ്ടർപോയിന്റിന്റെ പുതിയ ഗവേഷണ റിപ്പോർട്ട് അനുസരിച്ച്, AI ഇൻഫ്രാസ്ട്രക്ചറിനായുള്ള വലിയ ഡിമാൻഡ് സാധാരണ ഉപഭോക്താക്കളെയും ബാധിക്കുന്നു. അത്യാധുനിക AI സെർവറുകൾക്കും സ്മാർട്ട്‌ഫോണുകൾക്കും സങ്കീർണ്ണമായ ജോലികൾ കൈകാര്യം ചെയ്യാൻ ഒരേ തരം മെമ്മറി ചിപ്പുകൾ (പ്രത്യേകിച്ച് DRAM) ആവശ്യമാണ്. എന്നാൽ, AI ഡാറ്റാ സെന്ററുകളാണ് മെമ്മറി വിതരണക്കാർക്ക് കൂടുതൽ ലാഭകരമായത്. AI-യിലെ ആഗോള നിക്ഷേപം വർധിക്കുന്നതിനനുസരിച്ച്, നിർമ്മാതാക്കൾ ഈ ഉയർന്ന ലാഭമുള്ള ഉപഭോക്താക്കൾക്ക് മുൻഗണന നൽകുന്നു. തൽഫലമായി, ഉപഭോക്തൃ ഇലക്ട്രോണിക്സിനായുള്ള ചിപ്പുകളുടെ ലഭ്യത കുറയുകയും വില അതിവേഗം ഉയരുകയും ചെയ്യുന്നു.

ഈ അസന്തുലിതാവസ്ഥ താൽക്കാലികമല്ലെന്നും 2026 വരെ ഈ സാഹചര്യം മോശമാകുമെന്നും കൗണ്ടർപോയിന്റ് വിശകലന വിദഗ്ധർ മുന്നറിയിപ്പ് നൽകുന്നു. 2026-ന്റെ ആദ്യ പകുതിയിൽ മെമ്മറി വില 40 ശതമാനം വരെ വർദ്ധിക്കാൻ സാധ്യതയുണ്ട്. ഈ ചെലവ് വർദ്ധനവ് നിലവിൽ തന്നെ ഫോൺ നിർമ്മിക്കാൻ ആവശ്യമായ ഘടകങ്ങളുടെ മൊത്തം ചെലവിൽ (Bill of Materials, BoM) പ്രതിഫലിക്കുന്നുണ്ട്.

200 ഡോളറിൽ താഴെയുള്ള ബജറ്റ് ഉപകരണങ്ങളുടെ ഉത്പാദനച്ചെലവ് ഒറ്റ വർഷത്തിനുള്ളിൽ 20 ശതമാനം മുതൽ 30 ശതമാനം വരെ വർദ്ധിച്ചു. മിഡ്-റേഞ്ച്, പ്രീമിയം ഫോണുകൾക്ക് 10 ശതമാനം മുതൽ 15 ശതമാനം വരെ BoM വർദ്ധനവ് നേരിടുന്നു

2026-ൽ സ്മാർട്ട്‌ഫോണുകളുടെ ആഗോള ശരാശരി വിൽപ്പന വില (Average Selling Price) 6.9 ശതമാനം വർദ്ധിക്കുമെന്നാണ് കൗണ്ടർപോയിന്റ് പ്രതീക്ഷിക്കുന്നത്. ഈ ചെലവുകൾ നേരിട്ട് ഉപഭോക്താക്കളിലേക്ക് എത്തും. ഈ ചെലവ് വർദ്ധനവ് കാരണം, 2026-ൽ ആഗോള സ്മാർട്ട്‌ഫോൺ ഷിപ്പ്‌മെന്റുകൾ 2.1 ശതമാനം കുറയുമെന്നും പ്രവചനമുണ്ട്.

ആപ്പിൾ, സാംസങ് പോലുള്ള വൻകിട കമ്പനികൾക്ക് ഈ പ്രതിസന്ധിയെ മറികടക്കാൻ കൂടുതൽ എളുപ്പമാണ്. എന്നാൽ, മിഡ്-റേഞ്ച്, ബജറ്റ് ഉപകരണങ്ങളിൽ ശ്രദ്ധ കേന്ദ്രീകരിക്കുന്ന ചെറിയ നിർമ്മാതാക്കൾക്ക് ഇത് കടുപ്പമേറിയ വെല്ലുവിളിയാണ്.

ഫോണുകൾക്ക് വില അധികം കൂട്ടാതിരിക്കാൻ ക്യാമറ, ഡിസ്‌പ്ലേ, സ്പീക്കറുകൾ പോലുള്ള ഘടകങ്ങൾ കുറഞ്ഞ നിലവാരമുള്ളവ ഉപയോഗിക്കാൻ നിർബന്ധിതരാവുകയോ അല്ലെങ്കിൽ പഴയ ഭാഗങ്ങൾ വീണ്ടും ഉപയോഗിക്കുകയോ ചെയ്യുന്നുണ്ട്