സംസ്ഥാനത്ത് സ്വർണവിലയിൽ വമ്പൻ ഇടിവ്

സംസ്ഥാനത്ത് സ്വർണവിലയിൽ വമ്പൻ ഇടിവ്. 22 കാരറ്റ് സ്വർണത്തിന് പവന് 960 രൂപയുടെ ഇടിവോടെ 1,01,560 രൂപയിലും ഗ്രാമിന് 120 രൂപ കുറഞ്ഞ് 12,695 രൂപയിലുമെത്തി. ഒരു പവന്റെ വില ഒരു ലക്ഷം രൂപയെന്ന നിർണായക നിലവാരത്തിന് തൊട്ടടുത്തെത്തിയതോടെ സ്വർണം വാങ്ങാനിരിക്കുന്നവർ വിപണിയിലെ അടുത്ത നീക്കത്തിനായി കാത്തിരിക്കുകയാണ്.

ഇക്കഴിഞ്ഞ നംവബർ അഞ്ചാം തിയതിയാണ് സ്വർണ വില വില 1,07,080 രൂപ എന്ന ഈ മാസത്തെ ഏറ്റവും ഉയർന്ന നില തൊട്ടത്. അവിടെ നിന്നും ഒരാഴ്ചയ്ക്കിടെ ഒരു പവൻ സ്വർണത്തിന് 5,520 രൂപയുടെ ഇടിവാണ് രേഖപ്പെടുത്തിയത്. രാജ്യാന്തര വിപണിയിലെ
വിലത്തകർച്ചയാണ് ആഭ്യന്തര വിപണിയിലും പ്രതിഫലിക്കുന്നത്. നിലവിൽ 4,000 ഡോളർ എന്ന നിർണായക ലെവലിൽ നിന്നും സ്വർണം ഇടിവ് നേരിടുകയാണ്. ഒരു ഘട്ടത്തിൽ അന്താരാഷ്ട്ര വിപണിയിൽ വില 3,850 ഡോളറിലേക്ക് താഴ്ന്നിരുന്നു.

അമേരിക്കയിലെ പണപ്പെരുപ്പ ആശങ്കകളും പലിശനിരക്ക് ഉയരാനുള്ള സാധ്യതകളുമാണ് ആഗോള സ്വർണവിലയെ പ്രധാനമായും സമ്മർദത്തിലാക്കുന്നത്. അമേരിക്കൻ ഫെഡറൽ റിസർവ് പലിശനിരക്ക് ഉയർത്തിയേക്കുമെന്ന പ്രതീക്ഷയിൽ ഡോളറിന്റെ മൂല്യവും ട്രഷറി ബോണ്ട് ആദായവും ഉയർന്നത് സ്വർണത്തിന്റെ നിക്ഷേപ ആകർഷണത്തെ ബാധിച്ചു.