മൂന്നുദിവസത്തെ വർധനക്ക് ശേഷം സ്വർണവിലയിൽ ഇടിവ്

 കൊച്ചി: മൂന്ന് ദിവസമായി കൂടിക്കൊണ്ടിരുന്ന സ്വർണവിലയിൽ ഇന്ന് (17/04/26) കുറവ് രേഖപ്പെടുത്തി. 22 കാരറ്റ് ഒരു പവൻ സ്വർണത്തിന് ഇന്ന് 1000 രൂപ കുറഞ്ഞ് 1,13,080 രൂപ എന്ന നിലയിലാണ് വ്യാപാരം നടക്കുന്നത്. ഗ്രാമിന് 125 രൂപ കുറഞ്ഞ് 14,135 രൂപയായി.

തുടർച്ചയായ മൂന്ന് ദിവസത്തെ വർധനവിന് ശേഷമാണ് വിലയിൽ ഇടിവുണ്ടാകുന്നത്. ഇന്നലെ പവന് 160 രൂപ വർധിച്ച് 1,14,080 രൂപയായിരുന്നു. ഈ മാസത്തെ ഏറ്റവും ഉയർന്ന നിരക്കായിരുന്നു ഇത്.

18 കാരറ്റ് സ്വർണത്തിന് ഗ്രാമിന് ഇന്ന് 105 രൂപ കുറഞ്ഞ് 11,675 രൂപയായി. വെള്ളി വിലയിലും ഇന്ന് കുറവ് രേഖപ്പെടുത്തി. ഗ്രാമിന് 5 രൂപ കുറഞ്ഞ് 265 രൂപ എന്ന നിലയിലാണ് വെള്ളി വ്യാപാരം.

യു.എസ് - ഇറാൻ വെടിനിർത്തൽ ചർച്ചകൾ, ഹുർമുസ് കടലിടുക്കിലെ ഉപരോധങ്ങൾ, രാജ്യാന്തര വിപണിയിലെ എണ്ണവില വർധന തുടങ്ങിയ ആഗോള ഘടകങ്ങളാണ് സ്വർണവിലയിലെ അസ്ഥിരതയ്ക്ക് പിന്നിലെ പ്രധാന കാരണങ്ങൾ. ജനുവരി 29-ന് രേഖപ്പെടുത്തിയ 1,31,160 രൂപയാണ് സ്വർണത്തിന് കേരളത്തിൽ ഇതുവരെ രേഖപ്പെടുത്തിയ ഏറ്റവും ഉയർന്ന റെക്കോർഡ് വില.