സ്വർണവില ആരാണ് തീരുമാനിക്കുന്നത്? ദിവസവും വില മാറുന്നതിന് പിന്നിലെ കാരണം അറിയാം

 സ്വർണവില ഉയരുകയും താഴുകയും ചെയ്യുന്നത് സാധാരണക്കാരെ മുതൽ നിക്ഷേപകരെ വരെ ഒരുപോലെ ബാധിക്കുന്ന വിഷയമാണ്. എന്നാൽ  സ്വർണത്തിന്റെ വില നിശ്ചയിക്കുന്നത് ആരാണ്?  എന്ന ചോദ്യത്തിന് പലർക്കും വ്യക്തമായ ഉത്തരമില്ല.

യഥാർത്ഥത്തിൽ ലോകത്ത് ഒരൊറ്റ വ്യക്തിയോ ഒരു രാജ്യമോ സ്വർണവില തീരുമാനിക്കുന്നില്ല.  അന്താരാഷ്ട്ര വിപണിയിലെ ആവശ്യകതയും ലഭ്യതയും (Demand & Supply) , ആഗോള സാമ്പത്തിക സാഹചര്യം, അമേരിക്കൻ ഡോളറിന്റെ മൂല്യം, കേന്ദ്ര ബാങ്കുകളുടെ സ്വർണവാങ്ങൽ, പലിശനിരക്കുകൾ, യുദ്ധം, സാമ്പത്തിക അനിശ്ചിതത്വം തുടങ്ങിയ നിരവധി ഘടകങ്ങളാണ് സ്വർണവിലയെ സ്വാധീനിക്കുന്നത്.

ആഗോളതലത്തിൽ സ്വർണത്തിന്റെ സ്പോട്ട് വില പ്രധാനമായും  ലണ്ടൻ, ന്യൂയോർക്ക് തുടങ്ങിയ അന്താരാഷ്ട്ര വിപണികളിലെ വ്യാപാരത്തെ  അടിസ്ഥാനമാക്കിയാണ് രൂപപ്പെടുന്നത്. ഈ അന്താരാഷ്ട്ര വിലയെ അടിസ്ഥാനമാക്കിയാണ് വിവിധ രാജ്യങ്ങളിലെ വിപണികൾ സ്വന്തം വില നിർണയിക്കുന്നത്.

ഇന്ത്യയിൽ ആഭരണങ്ങളുടെ സ്വർണവില നിശ്ചയിക്കുന്നതിൽ  ഇന്ത്യൻ ബുള്ളിയൻ ആൻഡ് ജ്വല്ലേഴ്സ് അസോസിയേഷൻ (IBJA)  പ്രസിദ്ധീകരിക്കുന്ന നിരക്കുകൾക്ക് പ്രധാന പങ്കുണ്ട്. ഇതോടൊപ്പം ഇറക്കുമതി തീരുവ, ജിഎസ്ടി, രൂപയുടെ ഡോളറുമായുള്ള വിനിമയ നിരക്ക്, ഗതാഗതച്ചെലവ്, പ്രാദേശിക നികുതികൾ എന്നിവയും വിലയെ ബാധിക്കും.

കേരളത്തിൽ ഓരോ ദിവസവും പ്രസിദ്ധീകരിക്കുന്ന ആഭരണ സ്വർണവില ഈ ദേശീയ-അന്താരാഷ്ട്ര ഘടകങ്ങൾക്കൊപ്പം പ്രാദേശിക വിപണിയിലെ സാഹചര്യങ്ങളും കണക്കിലെടുത്താണ് സ്വർണവ്യാപാര സ്ഥാപനങ്ങൾ പ്രഖ്യാപിക്കുന്നത്. അതിനാൽ ഒരു ദിവസം പലതവണ പോലും വിലയിൽ മാറ്റം സംഭവിക്കാം.

സാമ്പത്തിക പ്രതിസന്ധി, യുദ്ധസാഹചര്യം, ഓഹരി വിപണിയിലെ ചാഞ്ചാട്ടം തുടങ്ങിയ സമയങ്ങളിൽ നിക്ഷേപകർ കൂടുതൽ സ്വർണത്തിലേക്ക് തിരിയുന്നതിനാൽ വില ഉയരാൻ സാധ്യതയുണ്ട്. മറുവശത്ത് ഡോളറിന്റെ കരുത്ത് വർധിക്കുകയോ പലിശനിരക്കുകൾ ഉയരുകയോ ചെയ്താൽ സ്വർണവിലയിൽ ഇടിവ് രേഖപ്പെടുത്താനും സാധ്യതയുണ്ട്.

അതുകൊണ്ട് തന്നെ, സ്വർണത്തിന്റെ വില ഒരു സ്ഥാപനമോ വ്യക്തിയോ ഒറ്റയ്ക്ക് തീരുമാനിക്കുന്നതല്ല. ആഗോള സാമ്പത്തിക സാഹചര്യങ്ങളും വിപണിയിലെ ആവശ്യകതയും ഉൾപ്പെടെയുള്ള നിരവധി ഘടകങ്ങളുടെ സംയുക്ത ഫലമായാണ് ഓരോ ദിവസവും സ്വർണവില രൂപപ്പെടുന്നത്.