ബട്ടർ ഇടിയപ്പവും ഗീ ഉപ്പുമാവ് വരെ വിപണിയിലെത്തിച്ച് മിൽമ

മിൽമ ചെയർമാൻ കെ. എസ് മണി, അഡ്വ.കെ. പ്രേംകുമാർ എംഎൽഎ, കോ-ഓപ്പറേറ്റീവ് സൊസൈറ്റീസ് രജിസ്ട്രാർ ഡോ. ഡി. സജിത് ബാബു ഐഎഎസ്, ക്ഷീരവികസന വകുപ്പ് ഡയറക്ടറും മിൽമ മാനേജിംഗ് ഡയറക്ടറുമായ ആസിഫ് കെ യൂസഫ് ഐഎഎസ്, ക്ഷീരവികസന വകുപ്പ് ഡയറക്ടർ ശാലിനി ഗോപിനാഥ്, മലബാർ റീജിയണൽ കോ-ഓപ്പറേറ്റീവ് മിൽക്ക് പ്രൊഡ്യൂസേഴ്സ് യൂണിയൻ എംഡി കെ സി ജെയിംസ്, തിരുവനന്തപുരം റീജിയണൽ കോ-ഓപ്പറേറ്റീവ് മിൽക്ക് പ്രൊഡ്യൂസേഴ്സ് യൂണിയൻ എംഡി ഡോ. പി മുരളി, മിൽമ ഭരണസമിതി അംഗങ്ങൾ, മലബാർ റീജിയണൽ കോ-ഓപ്പറേറ്റീവ് മിൽക്ക് പ്രൊഡ്യൂസേഴ്സ് യൂണിയൻ ബോർഡ് അംഗങ്ങൾ എന്നിവരും പങ്കെടുത്തു.

ഉത്പന്നങ്ങളുടെ വൈവിധ്യവല്ക്കരണത്തിലൂടെ ജനഹൃദയങ്ങളിൽ സ്ഥാനം ഉറപ്പിച്ച സഹകരണ സ്ഥാപനമാണ് മിൽമയെന്ന് മന്ത്രി വി. എൻ വാസവൻ പറഞ്ഞു. കേരളത്തിൻറെ ജൈവവൈവിധ്യത്തെ പ്രയോജനപ്പെടുത്തി ഗുണമേന്മയുള്ളതും ഉപഭോക്താക്കൾക്ക് ലാഭകരവുമായ 400 ലധികം ഉത്പന്നങ്ങൾ സഹകരണമേഖല പുറത്തിറക്കുന്നത് അഭിനന്ദനാർഹമാണെന്നും അദ്ദേഹം കൂട്ടിച്ചേർത്തു.

വിദേശ വിപണിയിലടക്കം മിൽമയുടെ ഉത്പന്നങ്ങൾക്കുള്ള സ്വീകാര്യതയും കയറ്റുമതി വർധനയും അഭിമാനകരമാണെന്ന് മന്ത്രി ജെ. ചിഞ്ചുറാണി പറഞ്ഞു. സമീപകാലത്ത് മിൽമ അവതരിപ്പിച്ച റെഡി ടു കുക്ക് വിഭവങ്ങൾ കുറഞ്ഞ സമയത്തിനുള്ളിൽ ഉപഭോക്താക്കൾക്കിടയിൽ പ്രചാരം നേടിയിട്ടുണ്ട്. മിൽമയിൽ നിന്നുള്ള വൈവിധ്യമാർന്ന ഉത്പന്നങ്ങൾ ക്ഷീരകർഷകരുടെ വരുമാനം വർദ്ധിക്കാൻ സഹായകമാണ്. തിരക്ക് പിടിച്ച ഇന്നത്തെ ജീവിത ക്രമത്തിൽ ഉപഭോക്താക്കൾക്ക് എളുപ്പത്തിൽ തയ്യാറാക്കാവുന്നതും പോഷകമൂല്യങ്ങളിൽ വിട്ടുവീഴ്ച ചെയ്യാത്ത ആരോഗ്യപ്രദവുമായ ഉത്പന്നങ്ങളാണ് മിൽമ അവതരിപ്പിക്കുന്നതെന്നും മന്ത്രി കൂട്ടിച്ചേർത്തു.

വൈവിധ്യവത്ക്കരണത്തിൻറെ ഭാഗമായി സമൂഹത്തിലെ എല്ലാ വിഭാഗം ജനങ്ങളേയും മിൽമയുടെ ഉപഭോക്താക്കളാക്കുന്നതിനായി 100-150 ഉത്പന്നങ്ങൾ മിൽമ പുറത്തിറക്കുന്നുണ്ടെന്ന് മിൽമ ചെയർമാൻ കെ. എസ് മണി പറഞ്ഞു. മത്സരാധിഷ്ഠിത വിപണിയിൽ പുതിയ തലമുറയുടെ ഭക്ഷണരീതിയ്ക്ക് അനുയോജ്യമായതും ആകർഷണീയവുമായ ഉത്പന്നങ്ങൾ കൊണ്ടുവരുന്നതിനൊപ്പം വ്യത്യസ്തങ്ങളായ വിഭവങ്ങൾ വിപണിയിലെത്തിക്കുന്നതിനാണ് മിൽമ ശ്രമിക്കുന്നത്. അതിൻറെ ഭാഗമായാണ് പുതിയ ഉത്പന്നങ്ങളായ ഇൻസ്റ്റൻറ് ബട്ടർ ഇടിയപ്പവും ഇൻസ്റ്റൻറ് ഗീ ഉപ്പുമാവും പുറത്തിറക്കുന്നതെന്നും അദ്ദേഹം കൂട്ടിച്ചേർത്തു.

പുത്തൻ വിപണി ലക്ഷ്യമാക്കി മിൽമയുടെ നെയ്യ്, ബട്ടർ എന്നിവ ഉപയോഗിച്ച് തയ്യാറാക്കിയിട്ടുള്ള രണ്ട് പുതിയ ഉത്പന്നങ്ങളാണ് മിൽമ ഇൻസ്റ്റൻറ് ബട്ടർ ഇടിയപ്പം, മിൽമ ഇൻസ്റ്റൻറ് ഗീ ഉപ്പുമാവ് എന്നിവ. ജനപ്രിയ ഭക്ഷണങ്ങളായ ഇടിയപ്പം (നൂൽപ്പുട്ട്), ഉപ്പുമാവ് എന്നിവയിൽ ശുദ്ധമായ മിൽമ ബട്ടർ, മിൽമ നെയ്യ് എന്നിവ ചേർക്കുന്നതിലൂടെ പാലിൻറെ പോഷക ഗുണങ്ങൾക്കൊപ്പം വെണ്ണ, നെയ്യ് എന്നിവയുടെ മണവും രുചിയും അനുഭവവേദ്യമാകും.

ഇടിയപ്പത്തിന് ഒരു വർഷത്തോളവും ഉപ്പുമാവിന് ആറുമാസത്തോളവും സൂക്ഷിപ്പ് കാലാവധിയുണ്ട്. വളരെപ്പെട്ടെന്ന് തയ്യാറാക്കാനാകുന്ന ഈ വിഭവങ്ങളിൽ രാസവസ്തുക്കൾ ചേർത്തിട്ടില്ല. ആധുനിക സാങ്കേതികവിദ്യയുടെ സഹായത്തോടെയാണ് ഇൻസ്റ്റൻറ് ബട്ടർ ഇടിയപ്പവും മിൽമ ഇൻസ്റ്റൻറ് ഗീ ഉപ്പുമാവും തയ്യാറാക്കിയിരിക്കുന്നതെന്നതും ശ്രദ്ധേയമാണ്.

മിൽമ ഉത്പന്നങ്ങളുടെ ഡിസൈനും അളവും വിലയും ഏകീകരിക്കുന്ന 'റീപൊസിഷനിംഗ് മിൽമ 2023' പദ്ധതിയുടെ ഭാഗമായി പാൽ, തൈര്, നെയ്യ് എന്നീ ഉത്പന്നങ്ങളെ കൂടാതെ വിപണിയിലെ മാറ്റങ്ങൾക്കും ഉപഭോക്താക്കളുടെ മാറുന്ന അഭിരുചിക്കും അനുസൃതമായി ഒട്ടനവധി പുതിയ ഉത്പന്നങ്ങൾ വിപണിയിലെത്തിച്ചിട്ടുണ്ട്. വിവിധ ഫ്ളേവറുകളിലുള്ള ഐസ്ക്രീമുകൾ, ഫ്ളേവേർഡ് മിൽക്കുകൾ, വിവിധ തരം പേഡകൾ, പനീർ ബട്ടർ മസാല, ഇൻസ്റ്റൻറ് പുളിശ്ശേരി, ടെണ്ടർ കോക്കനട്ട് വാട്ടർ, മിൽമ കാഷ്യു വിറ്റ എന്നിവ അവയിൽ ചിലതാണ്