വിഷുഫലം 2022 ; ഓരോ നാളുകാർക്കും എങ്ങനെ..?

വിഷു മുതൽ തുടങ്ങുന്ന ഒരു പുതുവർഷത്തിന്റെ സാമന്യ ഫലങ്ങളാണിവിടെ പറയുന്നത്.. ഇതിന്റെ കൂടെ ജാതകാൽ കൂടി പരിശോധിച്ച് ഗുണദോഷ ഫലങ്ങൾ വിലയിരുത്തണം..

 മേടക്കൂറ് (അശ്വതി, ഭരണി, കാർത്തിക 1/4)

സൽപ്രവൃത്തികളിലൂടെ ശ്രദ്ധ നേടും. സൽകർമങ്ങൾ ചെയ്ത് യശസ്സ് വർധിപ്പിക്കാന്‍ ശ്രമിക്കുക. ആത്മീയ കാര്യങ്ങളിൽ കൂടുതൽ ശ്രദ്ധ പതിപ്പിക്കുക വഴി മന:സംഘർഷം ഒഴിവാക്കാം. പുതിയ പദ്ധതികളോ മനോരഹസ്യങ്ങളോ ആരുമായും പങ്കിടരുത്. ശരിയായ തീരുമാനങ്ങളെടുത്ത് തക്ക സമയത്ത് ചെയ്യുന്ന പ്രവൃത്തികൾ നല്ല ഫലം തരും. ആഢംബരം കുറക്കുക വഴി പാഴ്ചെലവുകൾ നിയന്ത്രണ വിധേയമാക്കാൻ കഴിയും. കുടുംബത്തിൽ എല്ലാവരോടും സ്റ്റേഹത്തോടെയും ദയയോടെയും പെരുമാറുക. കുടുംബ പ്രശ്നങ്ങൾ നയപരമായി പരിഹരിക്കണം. വാഹനങ്ങൾ ശ്രദ്ധയോടെ കൈകാര്യം ചെയ്യുക. പുതിയ കാര്യങ്ങൾക്കായി പണമിറക്കുമ്പോൾ നന്നായി അന്വേഷണ വിധേയമാക്കിയേ ചെയ്യാവൂ. ദാമ്പത്യത്തിലെ ചെറിയ പിണക്കങ്ങൾ സംസാരിച്ച് തീർക്കണം.

 ഇടവക്കൂറ്

(കാർത്തിക 3/4 രോഹിണി, മകയിരം 1/2)

ജോലിയിൽ അസൂയാവഹമായ പുരോഗതി നേടും. ജീവിതത്തിൽ അപ്രതീക്ഷിതമായ പല മാറ്റങ്ങളും ഉണ്ടാകും. പ്രണയം പൂവണിയും. നടക്കുവാൻ സാധ്യത ഇല്ലെന്ന് കരുതിയ പല കാര്യങ്ങളിലും ക്ഷിപ്രവിജയം കൈവരിക്കാനുതകുന്ന സന്ദർഭം വന്നു ചേരും. മനസ്സിന് ഇഷ്ടമുള്ള കാര്യങ്ങൾ ചെയ്യുന്നതിലൂടെ സന്തോഷവും സംതൃപ്തിയുമുണ്ടാകും. സാമ്പത്തിക പരാധീനങ്ങളിൽ നിന്നും മുക്തി നേടും.

ബന്ധുമിത്രാദികളുടെ പരാതികൾ തീർക്കും. പ്രിയപ്പെട്ടവരുടെ സാമീപ്യം സന്തോഷം നൽകും.  കളത്രത്തെക്കുറിച്ചുള്ള തെറ്റിദ്ധാരണകൾ മാറും. ബിസിനസ്സിൽ ലാഭം കൂടും. വ്യാപാര തടസ്സങ്ങൾ മാറും. വിലപിടിപ്പുള്ള രേഖകൾ ആഭരണങ്ങൾ നഷ്ടപ്പെടാതിരിക്കാൻ ശ്രദ്ധവേണം. അനാവശ്യ യാത്രകൾ കുറക്കണം ചെറിയ ആരോഗ്യപ്രശ്നങ്ങൾ അലട്ടിയേക്കാം.

മിഥുനക്കൂറ്

(മകയിരം 1/2 തിരുവാതിര, പുണർതം 3/4)

പലതരം ബുദ്ധിമുട്ടുകൾ നേരിടുമെങ്കിലും ബുദ്ധിപൂർവമുള്ള നീക്കങ്ങളിലൂടെ അതെല്ലാം പരിഹരിക്കുക. എടുത്തു ചാടാതെയും അലസത കൂടാതെയും പ്രവർത്തിച്ചാൽ ഗുണാനുഭവങ്ങൾ ഉണ്ടാകും.  വാദപ്രതിവാദം, മധ്യസ്ഥത, ജാമ്യം ഇവയിൽ നിന്നും ഒഴിഞ്ഞു നിൽക്കുക. ജീവിതത്തിൽ അടുക്കും ചിട്ടയും കെട്ടുറുപ്പും ഉണ്ടാക്കാൻ ശ്രമിക്കുക. എന്തെങ്കിലും ആരോഗ്യപ്രശ്നം ബുദ്ധിമുട്ടിക്കുകയാണെങ്കിൽ അവഗണിക്കരുത്. ചികിത്സ നൽകണം.

മികച്ച വ്യക്തിത്വത്തിലൂടെ ചില പുതിയ ചങ്ങാതിമാരെ ഉണ്ടാക്കാനാകും. അവരുമായി ചേർന്നുള്ള കൂട്ടുപ്രവർത്തനം ഗുണം ചെയ്യും. ഉപയോഗശൂന്യമായ ജോലി ചെയ്ത് സമയം കളയരുത്. അബദ്ധങ്ങളിൽ ചെന്ന് ചാടാതിരിക്കാൻ ശ്രദ്ധിക്കുക. കുടുംബാംഗങ്ങളുമായുള്ള പ്രശ്നങ്ങൾ പറഞ്ഞു തീർക്കുക. സഹോദരങ്ങളുമായും പിതാവുമായും നല്ല ബന്ധം സ്ഥാപിക്കുക.

കർക്കടകക്കൂറ്

(പുണർതം 1/4 പൂയം, ആയില്യം)

സൽപ്രവൃത്തികളിലൂടെ ശ്രദ്ധ നേടും. പ്രതീക്ഷയിൽ കവിഞ്ഞ നേട്ടങ്ങൾ കൈവരിക്കും. ചിരകാലമായ പല സ്വപ്നങ്ങളും സാക്ഷാത്കരിക്കപ്പെടും. പ്രിയപ്പെട്ടവരുടെ വിവാഹാദി കർമങ്ങൾ നടത്താൻ കഴിയും. പ്രതീക്ഷിക്കുകയും പരിശ്രമിക്കുകയും ചെയ്യുന്ന കാര്യങ്ങളെല്ലാം നേടിയെടുക്കും. തടസ്സപ്പെട്ട് കിടന്ന വിദേശ യാത്ര സഫലീകൃതമാവും. സ്വന്തം നിഷ്കളങ്കത വഞ്ചിക്കപ്പെടാതിരിക്കാൻ ശ്രദ്ധ വേണം. നേത്ര - വാതസംബന്ധമായ അസുഖങ്ങൾ അവഗണിക്കരുത്. നല്ല കാര്യങ്ങൾക്കായി ധനം വിനിയോഗിക്കാൻ കഴിയും. ചെറിയ തോതിലുള്ള ദേഹാരിഷ്ടതകൾ ഉണ്ടാവും. മാനസിക പ്രയാസങ്ങൾക്കിടയാക്കുന്ന സാഹചര്യങ്ങൾ ഒഴിവാക്കുക. മനസ്സിൽ നിന്നും വേണ്ടാത്ത കാര്യങ്ങൾ എടുത്തു കളയണം.

ചിങ്ങക്കൂറ്

(മകം, പൂരം , ഉത്രം 1/4)

ചുറു ചുറുക്കും, കർമശേഷിയും വർധിപ്പിക്കണം. പ്രതിസന്ധികളെ സധൈര്യം നേരിട്ട് ജീവിത വിജയം കൈവരിക്കാൻ ശ്രമിക്കണം. കടബാധ്യത തീർക്കാൻ ബുദ്ധിപരമായി ശ്രമിക്കണം. നിരാശ വേണ്ട കാര്യങ്ങൾ ക്രമേണ നേരെയാവും. അപ്രതീക്ഷിതമായ ചെലവുകൾ പ്രയാസം സൃഷ്ടിക്കാനിടയുണ്ട്. ശ്രേയസ്ക്കരമായ കർമങ്ങൾ നിഷ്ഠയോടു കൂടിചെയ്യുക. അനവസരത്തിൽ അഭിപ്രായം പ്രകടിപ്പിക്കരുത്. ധനനഷ്ടം അപവാദം ഇവ കരുതിയിരിക്കുക. എന്തു വില കൊടുത്തും തീരുമാനം നടപ്പാക്കാൻ ശ്രമിക്കുക. ശരിയായ തീരുമാനങ്ങൾ പ്രതിസന്ധികൾ പരിഹരിക്കും. കുടുംബ കാര്യങ്ങളിൽ കൂടുതൽ ശ്രദ്ധിക്കുക. ഗൃഹസംബന്ധമായി ചില കാര്യങ്ങളിൽ കൂടുതൽ ശ്രദ്ധ ചെലുത്തേണ്ടിവരും. സ്വജനങ്ങളുടെ കുതന്ത്രങ്ങൾ മനസ്വസ്ഥത കെടുത്തും.  വിനോദത്തിന് കൂടുതൽ പണം ചെലവഴിക്കരുത്. ദൈവികത വർധിപ്പിക്കുക.

കന്നിക്കൂറ്

(ഉത്രം 3/4 അത്തം ചിത്തിര 1/2)

ആഗ്രഹിച്ച അംഗീകാരവും പദവിയും ലഭിക്കും. പൊതുവെ മെച്ചപ്പെട്ട കാലമാണ്. എല്ലാ രംഗങ്ങളിലും ശോഭിക്കാൻ കഴിയും. ബുദ്ധിപൂർവം നിക്ഷേപിച്ചിരുന്ന സ്വത്തുക്കളിൽ നിന്നും ലാഭമുണ്ടാകും. ഉത്തരവാദിത്വമേറിയ ചുമതലകൾ നിർവഹിക്കാൻ പ്രയാസപ്പെടും. എങ്കിലും സഹപ്രവർത്തകരുടെ പൂർണ സഹകരണം സഹായകമാകും. കളത്ര വീട്ടുകാരിൽ നിന്നും ധനസഹായം ലഭിക്കും. കുടുംബ ജീവിതം സന്തോഷകരമാകും. അന്യരുടെയും സ്വജനങ്ങളുടെയും സഹകരണത്തോടെ പുതിയ സംരംഭങ്ങൾക്ക് തുടക്കമിടും. ലഘുവായ കാര്യവിഘ്നങ്ങൾ ഈശ്വര പ്രാർഥനയാൽ മാറികിട്ടും. വിവാഹം, മേലധികാരികളുടെ പ്രശംസ, ഭൂമി ലാഭം എന്നിവയും ഉണ്ടാകും .കേസുകളിൽ എതിർപ്പുകൾ മറികടന്ന് പിടിച്ചു നിൽക്കും. പ്രശ്നങ്ങളോട് അതിശക്തമായി പ്രതികരിക്കും.

തുലാക്കൂറ്

(ചിത്തിര 1/2 ചോതി , വിശാഖം 3/4)

കർമരംഗത്ത് കൂടുതൽ ശ്രദ്ധ ചെലുത്തുക. ഉത്തരവാദിത്വങ്ങൾ വർധിക്കും. ബുദ്ധിപരമായ നീക്കങ്ങളിലൂടെ ഗുണാനുഭവങ്ങൾ ഉണ്ടാകും. അലസതയോടു കൂടിയുള്ള സമീപനം പ്രയാസങ്ങൾ സൃഷ്ടിക്കും. സന്താനങ്ങളുടെ കാര്യത്തിൽ ശ്രദ്ധിക്കണം. വളരെ വേഗം ലക്ഷ്യത്തിൽ എത്തിചേരാൻ കഴിഞ്ഞില്ലെങ്കിൽ നിരാശപ്പെടരുത്. ഇപ്പോഴത്തെ സാഹചര്യത്തിൽ അത് നിറവേറ്റുന്നതിന് ക്ഷമയും കഠിനമായ പരിശ്രമവും വേണ്ടിവരും. ബന്ധങ്ങൾ ശരിയായ രീതിയിൽ പ്രയോജനപ്പെടുത്തുക. വാക്കുകൾക്ക് നിയന്ത്രണം വേണം. വിദ്യാർഥികൾ പഠനത്തിൽ കൂടുതൽ  ശ്രദ്ധ കേന്ദ്രീകരിക്കുക അതിനാൽ ഏകാഗ്രത വർധിപ്പിക്കാൻ യോഗ, ഈശ്വര പ്രാർഥന എന്നിവ ചെയ്യാൻ ശ്രമിക്കുക.

 വൃശ്ചികക്കൂറ്

(വിശാഖം 1/4, അനിഴം, തൃക്കേട്ട)

പുണ്യസ്ഥലങ്ങൾ സന്ദർശിക്കാനിടവരും. ആത്മീയ കാര്യങ്ങളിൽ ഇടപെട്ട് പ്രവർത്തിക്കും. ഭാഗ്യാനുഭവങ്ങൾ, .മികച്ച പ്രവർത്തനങ്ങൾക്ക് അംഗീകാരം, വിദ്യാർഥികൾക്ക് ഉന്നത പഠന വിജയം. കർമരംഗത്ത് പുതിയ സാധ്യതകൾ എന്നിവ ഉണ്ടാകും . വിവിധ സ്രോതസ്സുകളിൽ നിന്നും ധനം ലഭിക്കും. അത് ഉചിതമായ രീതിയിൽ നിക്ഷേപിക്കണം. സാമൂഹിക പ്രവർത്തനങ്ങളിൽ പങ്കെടുക്കുന്നത് മൂലം കൂടുതൽ ആളുകളുമായി നല്ല ബന്ധമുണ്ടാകും. സ്വാധീനശേഷി വർധിക്കും. ഈ സമയത്ത് മന:ശക്തിയും ഉത്സാഹവും വർധിക്കും. കാലങ്ങളായി ആഗ്രഹിക്കുന്ന ഭവന നിർമാണം. വാഹനം മാറ്റി വാങ്ങൽ എന്നിവ നടക്കും. നിക്ഷേപങ്ങൾ നടത്തുന്നതിൽ തിരക്ക് കൂട്ടരുത്. വേണ്ടത്ര ആലോചനയില്ലാത്ത പ്രവൃത്തികൾ സാമ്പത്തികമായി കുഴപ്പത്തിലാക്കും. എന്തെങ്കിലും തീരുമാനമെടുക്കുന്നതിന് മുൻപ് പരിചയസമ്പന്നരായ ആളുകളോട് അന്വേഷിക്കണം. കള്ളന്മാരെയും ശതുക്കളെയും കരുതിയിരിക്കുക.

ധനുക്കൂറ്

(മൂലം, പൂരാടം, ഉത്രാടം 1/4)

ചെലവുകൾ വർധിക്കുന്നതിനാൽ സാമ്പത്തിക വിഷമതകൾ രൂക്ഷമാകും. ചുമക്കാവുന്നതിന് അപ്പുറമുള്ള ഉത്തരവാദിത്വങ്ങൾ ചുമക്കരുത്. ചുറ്റുമുള്ളവരുടെ സ്വാധീനങ്ങൾക്ക് അമിതമായി വഴങ്ങരുത്. ഗൃഹസംബന്ധമായ ചുമതലകൾ സമയ ബന്ധിതമായി പൂർത്തിയാക്കുക . ദാമ്പത്യത്തിൽ കലഹം, തെറ്റിദ്ധാരണ ഇവ ഉണ്ടാകാതെ നോക്കണം. ആലോചിക്കാതെ ഒരു കാര്യത്തിലും അഭിപ്രായം പറയരുത്. വാഹനം ഉപയോഗിക്കുമ്പോഴും  യാത്രചെയ്യുമ്പോഴും നല്ല ശ്രദ്ധ വേണം. സന്താനങ്ങളുടെ ക്ഷേമത്തിനായി പരിശ്രമിക്കണം. കോപം നിയന്ത്രിക്കണം സമ്മർദങ്ങൾക്കു വഴങ്ങി യാതൊരു കാര്യവും ചെയ്യരുത്.

മകരക്കൂറ്

(ഉത്രാടം 3/4 തിരുവോണം , അവിട്ടം 1/2)

പ്രതിസന്ധികൾ ആത്മവിശ്വാസത്തോടെ നേരിടുക. സാമ്പത്തിക കാര്യങ്ങൾ ശ്രദ്ധയോടെ കൈകാര്യം ചെയ്യണം ഇല്ലെങ്കിൽ ബുദ്ധിമുട്ട് അനുഭവിക്കേണ്ടി വരും. കുടുംബത്തിൽ സമാധാനവും ഐശ്വര്യവും ഉണ്ടാവാൻ ശ്രമിക്കണം. നല്ല പെരുമാറ്റത്തിലൂടെ സ്നേഹം പിടിച്ചു പറ്റണം. മറ്റുള്ളവരുടെ അഭിപ്രായങ്ങൾക്കും ഉപദേശങ്ങൾക്കും വില നൽകുന്നതിലൂടെ അംഗീകാരം നേടിയെടുക്കും. ഉത്തരവാദിത്വമുള്ള നിരവധി ജോലികൾ ഏറ്റെടുക്കേണ്ടി വരും. കാര്യങ്ങൾ ബുദ്ധിപൂർവം കൈകാര്യം ചെയ്യുക. ഇല്ലെങ്കിൽ ബുദ്ധിമുട്ട് അനുഭവിക്കേണ്ടി വരും. ഈശ്വര ചിന്ത ശക്തമാക്കണം. മേലുദ്യോസ്ഥരുമായി കലഹിക്കരുത്. അപമാനത്തിന് ഇടയുള്ളതിനാൽ മറ്റുള്ളവരുടെ കാര്യങ്ങളിൽ ഇടപെടുന്നത് പരമാവധി ഒഴിവാക്കണം.

 കുംഭക്കൂറ്

(അവിട്ടം 1/2 ചതയം, പൂരോരുട്ടാതി 3/4 ) .

വരുമാനം വർധിക്കും. സാമ്പത്തിക സ്ഥിതി ഭദ്രമാകും. സല്‍കീർത്തി പ്രതീക്ഷിക്കാം. വിചാരിക്കുന്ന പല കാര്യങ്ങളും യഥാസമയം സാധിക്കും. പുതിയ സ്ഥലത്തെ ശമ്പളത്തിൽ നല്ല മാറ്റമുണ്ടാകും. അന്യാധീനപ്പെട്ട ധനം തിരികെ ലഭിക്കും. കൂട്ടു ബിസിനസ്സിൽ പുതിയ മാറ്റങ്ങൾ വേണ്ടിവരും. സ്വന്തം ഇഷ്ടങ്ങൾക്ക് വേണ്ടി ചിലരെ തള്ളി പറയേണ്ടി വരും. ഓഹരി മാർക്കറ്റിൽ മികവ് ഉണ്ടാകും. ഭൂമിസംബന്ധിച്ച് അവകാശ തർക്കം പരിഹരിക്കും. ആരേയും അമിതമായി വിശ്വസിക്കരുത്. പാലിക്കാനാകാത്ത വാഗ്ദാനം നൽകരുത്. വിദ്യാർഥികൾക്ക് വിദ്യാലാഭം ഉണ്ടാകും. മറ്റുള്ളവരിൽ നിന്നും സഹായ സഹകരണങ്ങൾ ലഭിക്കും. ചെറിയ ചെറിയ ശാരിരിക ബുദ്ധിമുട്ടുകൾ അലട്ടിയേക്കാം.

 മീനക്കൂറ്

(പൂരൂരുട്ടാതി 1/4ഉത്രട്ടാതി, രേവതി )

പലതരം പ്രതിബന്ധങ്ങൾ നേരിടും. എങ്കിലും ഈശ്വരാധീനത്താൽ കൂടുതൽ ബുദ്ധിമുട്ട് ഉണ്ടാവില്ല. ഈശ്വരഭക്തി, ധർമനിഷ്ഠത പരോപകാരതല്പരത എന്നിവ ഉണ്ടാകണം. മേലധികാരികളുമായി വാക്ക് തർക്കത്തിന് പോവരുത് .വാക്കുകൾ സൂക്ഷിച്ചേ പ്രയോഗിക്കാവൂ .ശരിയായ ധനവിനിയോഗത്തിലൂടെ   മെച്ചപ്പെട്ട നിലയിലേക്ക് സ്ഥിതിഗതികൾ മാറ്റണം. ചെലവ് നിയന്ത്രിക്കണം. ഉത്കണ്ഠയും ആശങ്കയും പാടില്ല. അശ്രദ്ധയും അലസതയും വലിയ പ്രയാസങ്ങൾക്ക് കാരണമായേക്കാം. ജീവിത പങ്കാളിയുമായി അനാവശ്യ വാഗ്വാദങ്ങൾ ഒഴിവാക്കുക. അനാവശ്യ കൂട്ടുകെട്ടുകളിൽ ചെന്ന്പെടരുത്. മറ്റുള്ളവരുടെ തെറ്റുകൾ നിങ്ങൾക്ക് മേൽ ചുമത്തപ്പെടാൻ സാധ്യത ഉള്ളതിനാൽ എല്ലാ കാര്യങ്ങളിലും അതീവ ശ്രദ്ധ പുലർത്തുക. ക്ഷമയോടെ പ്രവർത്തിച്ചാൽ ആഹ്ളാദകരമായ ജീവിതം നയിക്കാനാകും.