വൃശ്ചികത്തിലെ ആയില്യം, ഇന്ന് കുടുംബ അഭിവൃദ്ധിക്കായി ഈ മന്ത്രം ജപിച്ചാൽ

നാഗാരാധന ഇന്ത്യയില്‍ പണ്ടുമുതല്‍ക്കേ നിലവിലുള്ളതാണ്. ഐശ്വര്യത്തിനും അഭിവൃദ്ധിക്കും വേണ്ടി ഭാരതീയര്‍ നാഗപൂജ നടത്തുന്നു.നാഗാരാധന ഒരു തരത്തില്‍ പ്രകൃത്യാരാധന കൂടിയാണ്.പ്രകൃതിയില്‍ നിന്ന് മനുഷ്യനുണ്ടാകുന്ന ദോഷങ്ങള്‍ ഇല്ലാതാക്കാന്‍ സർപ്പങ്ങള്‍ക്ക് കഴിയും എന്നൊരു വിശ്വാസമുള്ളതുകൊണ്ടാണ് പൂര്‍വികര്‍ നാഗ ദൈവങ്ങളെ കാവുകളില്‍ കുടിയിരുത്തി ആരാധിച്ചിരുന്നത്.

നാഗം ദേവതയായുള്ള ആയില്യം നക്ഷത്രമാണ് നാഗപൂജയ്ക്ക് ഉത്തമമായി കരുതുന്നത്. ഇതില്‍ തന്നെ കന്നി, തുലാം മാസങ്ങളിലെ ആയില്യം വിശേഷമായി കരുതുന്നു. മണ്ണാറശ്ശാല, പാമ്പുമ്മേകാട്, വെട്ടിക്കോട് എന്നിവിടങ്ങളില്‍ ഈ ആയില്യങ്ങള്‍ വളരെ വിശേഷമാണ്.

കേരളത്തിലെ പ്രധാനപ്പെട്ട നാഗക്ഷേത്രങ്ങളില്‍ ഒന്നാണ് ആലപ്പുഴയിലെ ഹരിപ്പാടിന് അടുത്തുള്ള മണ്ണാറശ്ശാല നാഗരാജാ ക്ഷേത്രം. തൃശൂരിലെ മാളയ്ക്ക് അടുത്തുള്ള പാമ്പുമ്മേക്കാട്, കൊല്ലത്തെ തൃപ്പാര ക്ഷേത്രം, തിരുവനന്തപുരത്തെ അനന്തന്‍‌കാട് ക്ഷേത്രം, മഞ്ചേശ്വരത്തെ മദനേശ്വര ക്ഷേത്രം, കണ്ണൂരിലെ പെരളശ്ശേരി ക്ഷേത്രം, എറണാകുളത്തെ ആമേടമംഗലം, മാന്നാറിലെ പനയന്നാര്‍കാവ് തുടങ്ങി ഒട്ടേറെ നാഗക്ഷേത്രങ്ങളുണ്ട് കേരളത്തില്‍.കേരളത്തിലെ ഏറ്റവും പ്രധാനപ്പെട്ട നാഗരാജ ക്ഷേത്രം മണ്ണാറശ്ശാലയാണ്. ഖാണ്ഡവ ദഹനം നടന്ന് മണ്ണ് ആറിയ ശാലയാണ് മണ്ണാറശ്ശാലയായി മാറിയതെന്നാണ് ഒരു വിശ്വാസം.

എല്ലാ മാസത്തിലെയും ആയില്യം നാഗദൈവങ്ങൾക്ക് പ്രധാനമാണ്. സർപ്പദോഷമകറ്റാൻ ഉത്തമ മാർഗവുമാണിത്. ഈ സവിശേഷ ദിനത്തിൽ നാഗ പ്രീതികരമായ മന്ത്രങ്ങൾ ജപിക്കുന്നത് അതീവ ഫലദായകമാണ്.

ഇന്ന് 108 തവണ മൂലമന്ത്രമായ ‘ഓം നാഗരാജായതേ നമഃ ഓം നാഗദേവിയേ നമഃ’ ജപിക്കുന്നത് ഉത്തമമാണ് .

സര്‍പ്പദോഷപരിഹാരത്തിനായി നവനാഗസ്‌തോത്രം ഒൻപതു തവണ ജപിക്കാം.

‘പിങ്ഗലം വാസുകിം ശേഷം പത്മനാഭം ച കംബലം

ശംഖപാലം ധൃതരാഷ്ട്രം തക്ഷകം കാളിയം തഥാ’

വെള്ളരി

വെള്ളരി നാഗങ്ങള്‍ക്കുള്ള ഒരു വഴിപാടാണ്. ഉണങ്ങലരി, തേങ്ങ എന്നിവ നാഗദൈവങ്ങള്‍ക്കു സമര്‍പ്പിച്ച് പത്മമിട്ടു പൂജ നടത്തുന്നു. നൂറുംപാലുമാണ് മറ്റൊരു വഴിപാട്. മഞ്ഞള്‍പ്പൊടി, അരിപ്പൊടി, പശുവിന്‍പാല്‍, കരിക്കിന്‍ വെള്ളം എന്നിവ ചേര്‍ത്ത ഈ മിശ്രിതം നാഗങ്ങള്‍ക്ക് ഏറെ പഥ്യമാണെന്നാണ് വിശ്വാസം.

ഓരോരുത്തരുടേയും നക്ഷത്രത്തില്‍ ഒരു സര്‍പ്പരൂപം വച്ചു നടത്തുന്ന സര്‍പ്പരൂപ പൂജയും വിശേഷമാണ്. കളം വരച്ചു നടത്തുന്ന സര്‍പ്പപ്പാട്ട്, സര്‍പ്പബലി, പായസ ഹോമം എന്നിവയെല്ലാം നാഗങ്ങളെ പ്രസാദിപ്പിയ്ക്കുവാന്‍ ഏറെ വിശേഷപ്പെട്ടതാണ്.