.jpg)
വ്യത്യസ്ത ജാതിയിൽപ്പെട്ട യുവതിയെ വിവാഹം ചെയ്തു; യുവാവിനെ കൊലപ്പെടുത്തി ഭാര്യവീട്ടുകാർ ; യുവതിയുടെ അമ്മാവനടക്കം 14 പേർ അറസ്റ്റിൽ
ഹൈദരാബാദ്: നാടിനെ നടുക്കി വീണ്ടും ദുരഭിമാനക്കൊല.ഹൈദരാബാദ് സ്വദേശിയായ ഹേമന്ത് (28)എന്ന യുവാവിനെയാണ് ഭാര്യവീട്ടുകാർ കൊലപ്പെടുത്തിയത്.സംഭവത്തിൽ ഭാര്യാ മാതാപിതാക്കളടക്കം 14 പേർ അറസ്റ്റിലായി.
വ്യാഴാഴ്ചയാണ് നാടിനെ നടുക്കിയ സംഭവം നടന്നത്. വ്യത്യസ്ത ജാതിയില്‍പ്പെട്ട ഹേമന്തും അവന്തിയും ഏറെക്കാലമായി പ്രണയത്തിലായിരുന്നു. വീട്ടുകാര്‍ ഇവരുടെ ബന്ധത്തെ എതിര്‍ത്തിരുന്നുവെങ്കിലും ഇതു വകവയ്ക്കാതെ കഴിഞ്ഞ ജൂൺ 10ന് ഇരുവരും വിവാഹിതരായി.തുടർന്ന് ഇവര്‍ ഗാച്ചിബൗളിയിലെ ടിഎന്‍ജിഒ കോളനിയില്‍ വാടയകയ്ക്ക് താമസിച്ചുവരികയായിരുന്നു.
ഇരുവീട്ടുകാരേയും വിളിച്ച് പോലീസ് പ്രശ്നങ്ങൾ പറഞ്ഞ് തീർത്തിരുന്നു. എന്നാൽ വ്യാഴാഴ്ച രാവിലെ അവന്തിയുടെ കുടുംബാംഗങ്ങള്‍ ഇവരെ വിളിക്കുകയും പ്രശ്‌നങ്ങള്‍ പറഞ്ഞുതീര്‍ക്കുന്നതിനായി വീട്ടിലേക്ക് വരുന്നുണ്ടെന്ന് അറിയിക്കുകയുമായിരുന്നു. ഇക്കാര്യം ഹേമന്ത് സ്വന്തം വീട്ടിലേക്ക് വിളിച്ച് പറയുകയും അവരോടും വീട്ടിലേയ്ക്ക് എത്താന്‍ ആവശ്യപ്പെടുകയുമായിരുന്നു.
ഹേമന്തിന്‍റെ അച്ഛന്‍ വീട്ടിലെത്തിയപ്പോഴാണ് ഹേമന്തിനെയും അവന്തിയെയും അവന്തിയുടെ വീട്ടുകാര്‍ ബലമായി വാഹനത്തില്‍ കയറ്റി കൊണ്ടുപോയതായി അറിഞ്ഞത്. തുടർന്ന് മകനെയും മരുമകളെയും തട്ടിക്കൊണ്ടുപോയതായി കാണിച്ച് ഹേമന്തിന്‍റെ വീട്ടുകാര്‍ പോലീസില്‍ പരാതി നല്‍കി.
പോലീസ് നടത്തിയ അന്വേഷണത്തില്‍ വ്യാഴാഴ്ച രാത്രിയോടെ തട്ടിക്കൊണ്ടുപോകലിന് നേതൃത്വം നല്‍കിയവരെ പോലീസ് പിടികൂടി. ഇവരെ ചോദ്യംചെയ്തപ്പോഴാണ് ഹേമന്തിനെ കൊലപ്പെടുത്തിയ വിവരം പുറത്തറിയുന്നത്.
വെള്ളിയാഴ്ച പുലര്‍ച്ചെ ഹേമന്തിന്‍റെ മൃതദേഹം സങ്കറെഡ്ഡി ജില്ലയില്‍നിന്ന് കണ്ടെത്തി.അവന്തിയുടെ അമ്മാവനാണ് തട്ടിക്കൊണ്ടുപോകലിനും കൊലപാതകത്തിനും നേതൃത്വം നല്‍കിയതെന്ന് പോലീസ് പറയുന്നു.അറസ്റ്റിലായവരിൽ രണ്ടുപേരൊഴികെ എല്ലാവരും ബന്ധുക്കളാണ്.
The post വ്യത്യസ്ത ജാതിയിൽപ്പെട്ട യുവതിയെ വിവാഹം ചെയ്തു; യുവാവിനെ കൊലപ്പെടുത്തി ഭാര്യവീട്ടുകാർ ; യുവതിയുടെ അമ്മാവനടക്കം 14 പേർ അറസ്റ്റിൽ first appeared on Keralaonlinenews.
