അമേരിക്കൻ പ്രസിഡന്റായി ഡോണൾഡ് ട്രംപിന്റെ സ്ഥാനാരോഹണം നാളെ

വാഷിംഗ്‌ടൺ: അമേരിക്കൻ പ്രസിഡന്റായി ഡോണൾഡ് ട്രംപിന്റെ സ്ഥാനാരോഹണം നാളെ നടക്കും. ഇന്ത്യൻ സമയം രാത്രി 10.30 നാണ് സ്ഥാനാരോഹണം നടക്കുക. താപനില മൈനസ് 6 സെൽഷ്യസിലേക്ക് താഴ്ന്നതിനാൽ ചടങ്ങുകളൊന്നും പുറത്തു നടത്തില്ല, എല്ലാം അകത്തെ വേദികളിലാണ് നടക്കുക. അമേരിക്കൻ ക്യാപ്പിറ്റൾ മന്ദിരത്തിലെ റോട്ടൻഡ ഹാളാകും വേദി. 1985 ൽ റൊണാൾഡ് റെയ്ഗന്റെ സ്ഥാനാരോഹണമാണ് അകത്തെ വേദിയിൽ ഇതിന് മുൻപ് നടത്തിയിട്ടുള്ളത്. സ്ഥാനാരോഹണത്തിന് ശേഷമുള്ള പരേഡും ഉള്ളിലാണ് നടത്തുന്നത്.

അതേസമയം 4 വർഷം മുൻപ് യുഎസ് ക്യാപ്പിറ്റളിൽ ട്രംപ് അനുകൂലികൾ ഇരച്ചുകയറിയ സംഭവത്തിന് ശേഷം ആദ്യമായാണ് ട്രംപ് അമേരിക്കൻ തലസ്ഥാനത്ത് തിരികെയെത്തുന്നത്. അമേരിക്കൻ സൈന്യത്തിന്റെ അർലിങ്ടൻ ദേശീയ സെമിത്തേരിയിൽ ഇന്ന് അദ്ദേഹം ആദരമർപ്പിക്കും. വിദേശകാര്യമന്ത്രി എസ്.ജയ്ശങ്കറാണ് സ്ഥാനാരോഹണച്ചടങ്ങിൽ ഇന്ത്യയെ പ്രതിനിധീകരിക്കുന്നത്