അഫ്ഗാൻ ഭൂചലനം: സൗദി ദുഃഖം പ്രകടിപ്പിച്ചു
യാംബു: ആയിരത്തോളം പേരുടെ മരണത്തിനും നിരവധിപേർക്ക് ഗുരുതരമായി പരിക്കേൽക്കാനുമിടയാക്കിയ അഫ്ഗാനിലെ ഭൂചലനത്തിൽ സൗദി അറേബ്യ ദുഃഖം പ്രകടിപ്പിച്ചു.സംഭവത്തിൽ സൗദി വിദേശകാര്യ മന്ത്രാലയം അഗാധമായ ദുഃഖവും വേദനയും രേഖപ്പെടുത്തി.
അഫ്ഗാൻ ജനതക്ക് വന്നുപെട്ട വലിയ നഷ്ടത്തിൽ രാജ്യം ദുഃഖം അറിയിക്കുന്നതോടൊപ്പം ദുരിതനിവാരണത്തിനായി സൗദി എല്ലാവിധ ഐക്യദാർഢ്യവും പ്രഖ്യാപിക്കുന്നതായും മന്ത്രാലയം അറിയിച്ചു. മരിച്ചവരുടെ കുടുംബത്തിനോടും അഫ്ഗാൻ അധികൃതരോടും അനുശോചനം അറിയിക്കുന്നതോടൊപ്പം പരിക്കുപറ്റി ചികിത്സയിലുള്ളവർ എത്രയും വേഗം സുഖം പ്രാപിക്കട്ടെ എന്ന് പ്രാർഥിക്കുന്നതായും പ്രസ്താവനയിൽ അറിയിച്ചു.