.jpg)
യു.എന്നിൽ എക്സ്പോ പ്രദർശനം : അൽഭുതത്തോടെ ലോകനേതാക്കൾ
ദുബൈ: ദുബൈ എക്സ്പോയുടെ കേന്ദ്രമായിരുന്ന അൽ വസ്ൽ പ്ലാസയിൽ നടന്ന മികവുറ്റ പ്രദർശനം ഐക്യരാഷ്ട്ര സഭയിലും. അൽ വസ്ലിന്‍റെ ഭീമൻ ചുമരുകളിൽ തെളിഞ്ഞ സുസ്ഥിര വികസന സന്ദേശങ്ങളാണ് ലോകനേതാക്കൾ തിങ്ങിനിറഞ്ഞ യു.എൻ പൊതുസഭയിലും കഴിഞ്ഞ ദിവസം തെളിഞ്ഞത്. കൂറ്റൻ പ്രദർശനം ലോകനേതാക്കളുടെ ശ്രദ്ധ പിടിച്ചുപറ്റി
സുസ്ഥിര വികസന ലക്ഷ്യങ്ങൾ കൈവരിക്കുന്നതിന് അടിയന്തിര നടപടികൾ ആവശ്യമാണെന്ന സന്ദേശമാണ് പ്രദർശനത്തിലൂടെ കൈമാറിയത്. പ്രദർശനത്തിന്‍റെ വീഡിയോ യു.എ.ഇ വൈസ് പ്രസിഡൻറും പ്രധാനമന്ത്രിയും ദുബൈ ഭരണാധികാരിയുമായ ശൈഖ്മുഹമ്മദ് ബിൻ റാശിദ് ആൽ മക്തൂം ട്വിറ്ററിൽ പങ്കുവെച്ചു. ഇതിനുപിന്നിൽപ്രവർത്തിച്ച എക്സ്പോ ടീമിനെ അദ്ദേഹം അഭിനന്ദിച്ചു. പ്രകൃതിയുടെ ശക്തിയും സൗന്ദര്യവും സാധ്യതകളും ദുർബലതയും ഉൾകൊള്ളുന്ന സന്ദേശമാണ് ഒരു മിനുറ്റ് നീണ്ട ഷോയുടെ ഉള്ളടക്കം.
എക്സ്പോ ടീമിന്‍റെ സർഗ്ഗാത്മക പ്രദർശനം യു.എന്നിലേക്ക് എത്തിക്കാൻ കഴിഞ്ഞതിലും അവരുടെ മികവുകൾ ആഗോള വേദിയിൽ അംഗീകരിക്കപ്പെട്ടതിലും ഏറെ അഭിമാനമുണ്ടെന്ന് യു.എ.ഇ അന്താരാഷ്ട്ര സഹകരണ സഹമന്ത്രിയും എക്സ്പോ സിറ്റി ദുബൈ അതോറിറ്റി സി.ഇ.ഒയുമായ റീം അൽ ഹാഷിമി പറഞ്ഞു.
സുസ്ഥിര വികസന ലക്ഷ്യങ്ങൾ കൈവരിക്കുന്നതിന് ഒരുമിച്ചു നിൽക്കാനും വാഗ്ദാനങ്ങൾ പാലിക്കാനും ദുബൈ എക്സ്പോ ലോകത്തെ ശരിക്കും പ്രചോദിപ്പിച്ചതായി ബന്ധപ്പെട്ടവർ അറിയിച്ചു. . ജനങ്ങൾക്കും ഭൂമിക്കുമായി കൂടുതൽ പലതും ചെയ്യാനുണ്ടെന്ന സന്ദേശം കൂടിയാണ് ലോക നേതാക്കൾക്ക് ഈ പ്രദർശനം നൽകിയത്.
