ദുബൈയിലെ ഇബ്ൻ ബതൂത്ത-മുസഫ ഇന്റർസിറ്റി ബസ് സർവിസ് പുനരാരംഭിക്കുന്നു
ദുബൈയിലെ ഇബ്ൻ ബതൂത്ത-മുസഫ ഇന്റർസിറ്റി ബസ് സർവിസ് പുനരാരംഭിക്കുന്നു.ആഗസ്റ്റ് ഒമ്പതു മുതലാണ് സർവിസ് പുനരാരംഭിക്കുന്നത്. മണിക്കൂർ ഇടവിട്ടാണ് ഇരുഭാഗത്തേക്കും ഡീലക്സ് കോച്ചുകളിൽ ആഡംബര യാത്രയൊരുക്കുക.
ഈ റൂട്ടിൽ യാത്രക്കാരുടെ എണ്ണം വർധിച്ചത് പരിഗണിച്ചാണ് സർവിസ് വീണ്ടും ഏർപ്പെടുത്തിയത്.അതേദിവസം മുതൽ വിവിധ റൂട്ടുകളിലെ ബസ് സർവിസുകൾ നീട്ടുമെന്നും ആർ.ടി.എ വാർത്താക്കുറിപ്പിൽ അറിയിച്ചു. 2019ൽ ആരംഭിച്ച ഇ-102 റൂട്ട് ഇരുഭാഗത്തെയും യാത്രക്കാർക്ക് വലിയ ആശ്വാസമായിരുന്നു.
മുസഫ പ്രദേശത്ത് താമസിക്കുന്നവർക്ക് ദുബൈയിലേക്ക് വരാൻ ബസിന് സെൻട്രൽ ബസ് സ്റ്റേഷനിലേക്ക് പോകേണ്ട അവസ്ഥ ഒഴിവായിരുന്നു.നേരത്തെ മുതൽ ഇവിടെനിന്നുള്ള സർവിസ് അബൂദബി വിമാനത്താവളം വഴിയാണ് നടത്തിയിരുന്നത്. ഇതും യാത്രക്കാർക്ക് വലിയ സൗകര്യമായിരുന്നു.