അജ്മാന് ലിവ ഈത്തപ്പഴ മേളക്ക് വെള്ളിയാഴ്ച തുടക്കമായി
അജ്മാന് ലിവ ഈത്തപ്പഴ മേളക്ക് വെള്ളിയാഴ്ച തുടക്കമായി .അജ്മാനിലെ വിനോദ സഞ്ചാര വികസന വകുപ്പ് സംഘടിപ്പിക്കുന്ന മേള ഞായറാഴ്ച വരെ എമിറേറ്റ്സ് ഹോസ്പിറ്റാലിറ്റി സെന്ററിൽ നടക്കും. സുപ്രീം കൗൺസിൽ അംഗവും അജ്മാൻ ഭരണാധികാരിയുമായ ശൈഖ് ഹുമൈദ് ബിന് റാഷിദ് അല് നുഐമിയുടെ രക്ഷാകർതൃത്വത്തിലാണ് ലിവ അജ്മാന് ഡേറ്റ്സ് ആൻഡ് ഹണി ഫെസ്റ്റിവല് അരങ്ങേറുന്നത്. ഈ വർഷത്തെ പതിപ്പില് 400ലധികം സ്റ്റാളുകള് ഉണ്ടാകുമെന്നാണ് പ്രതീക്ഷ.
ഉത്സവാന്തരീക്ഷത്തിൽ മൂന്ന് ദിവസം നീളുന്ന മേളയിൽ പഴയ ഇമാറാത്തി ആചാരങ്ങളും പാരമ്പര്യങ്ങളും പുനരുജ്ജീവിപ്പിക്കാൻ ലക്ഷ്യമിട്ടുള്ള പരിപാടികൾ അരങ്ങേറും. കർഷകർ യു.എ.ഇയിൽ ഉൽപാദിപ്പിക്കുന്ന മികച്ച ഈത്തപ്പഴങ്ങളാണ് മേളയില് പ്രദർശിപ്പിക്കുന്നത്. ഈത്തപ്പഴത്തിനുപുറമെ തേൻ, സിട്രസ് പഴങ്ങൾ, നാരങ്ങ, മാമ്പഴം, ബദാം എന്നിവ മേളയില് പ്രദര്ശനത്തിനെത്തും.