.jpg)
തോല്‍വിക്ക് പിന്നാലെ പാലക്കാട് ബിജെപിയില്‍ പൊട്ടിത്തെറി, കൃഷ്ണകുമാറിനെതിരെ പോസ്റ്റ്
പാലക്കാട്ടെ തോല്‍വിക്ക് പിന്നാലെ ബിജെപിയില്‍ പൊട്ടിത്തെറി . എന്‍ഡിഎ സ്ഥാനാര്‍ത്ഥി സി കൃഷ്ണകുമാറിനെതിരെ ഫെയ്‌സ്ബുക്ക് പോസ്റ്റുമായി പന്തളത്തെ ബിജെപിപ്രവര്‍ത്തകര്‍. ''പാലക്കാട് കഴിഞ്ഞു ഇനി പന്തളം'' എന്നാണ് പന്തളം നഗരസഭയിലെ ക്ഷേമസമിതി സ്റ്റാന്‍ഡിങ് കമ്മിറ്റി ചെയര്പേഴ്സണ് കെ സീനയുടെ ഭര്‍ത്താവ് അജിയുടെ ഫേസ്ബുക്ക് പോസ്റ്റ്. സി കൃഷ്ണകുമാറിന് സംഘടനാ ചുമതലയുള്ള നഗരസഭയാണ് പന്തളം.
അജിയുടെ ഫേസ്ബുക്ക് പോസ്റ്റിന് പിന്തുണ നല്‍കി പന്തളം നഗരസഭാ ചെയര്പേഴ്സണ് സുശീലയുടെ ഭര്‍ത്താവ് സന്തോഷ് രംഗത്തെത്തി. എരണം കെട്ടവന്‍ എന്ന അധിക്ഷേപത്തോടെയാണ് നഗരസഭാ ചെയര്‍പേഴ്‌സന്റെ ഭര്‍ത്താവിന്റെ കമന്റ്. 'ഭാര്യയും ഭര്‍ത്താവും കൂടി പാലക്കാട് നശിപ്പിച്ചു. ഒരു കാലനെപ്പോല വന്നു പന്തളവും.. ഈ എരണംകെട്ടവന്‍..' എന്നായിരുന്നു സന്തോഷിന്റെ കമന്റ്. കഴിഞ്ഞദിവസം ഭരണസമിതിക്കെതിരെ എല്‍ഡിഎഫ് അവിശ്വാസ പ്രമേയ നോട്ടീസ് നല്‍കിയിരുന്നു. മുന്‍ ബിജെപി കൗണ്‍സിലര്‍ കെ വി പ്രഭയും നോട്ടീസിനെ പിന്തുണച്ചിരുന്നു.
