സഹായത്തിന് കാത്തുനിൽക്കാതെ വിനോദ് യാത്രയായി

തിരുവല്ല : സഹായത്തിന് കാത്തുനിൽക്കാതെ വിനോദ്  മരണത്തിന് കീഴടങ്ങി. പെരിങ്ങര മാരാംപറമ്പിൽ വീട്ടിൽ ഓട്ടോ ഡ്രൈവറായ വിനോദ് വൻകുടലിൽ പിടിപെട്ട ഗുരുതര രോഗത്തിന് ചികിത്സയിലായിക്കെയാണ് മരിച്ചത്.  

രോഗബാധിതനായി ഒരു മാസം മുമ്പ് അമൃത ആശുപത്രിയിൽ പ്രവേശിപ്പിച്ചിരുന്നു. വിനോദിന് വേണ്ടി കുടുംബം ആകെയുണ്ടായിരുന്ന സ്വർണ്ണം പണയം വെച്ചും കടം വാങ്ങിയും സാധിക്കുന്ന തരത്തിലൊക്കെ പണം കണ്ടെത്തി.

എന്നിട്ടും പണം തികയാതെ വന്നതോടെ ഏക വരുമാനമാർഗമായിരുന്ന ഓട്ടോറിക്ഷയും ചികിത്സയ്ക്കായി വിറ്റു. എന്നിട്ടും തുടര്‍ ചികിത്സയ്ക്കും മറ്റും ഭാരിച്ച തുക ആവശ്യമായി വന്നു. ആയതിനാല്‍ നാട്ടുകാരുടെ സഹായത്തോടെ ചികിത്സാസഹായ സമിതിക്ക് രൂപം കൊടുത്ത് ധനസമാഹരണം നടത്തി വരികയായിരുന്നു. ലക്ഷക്കണക്കിന് രൂപ ചികിത്സക്കായി ചെലവഴിച്ചെങ്കിലും വിനോദിനെ ജീവതത്തിലേക്ക് തിരികെ എത്തിക്കാൻ കഴിഞ്ഞില്ല. ഭാര്യ വിനീത, നന്ദന, അനന്ദു എന്നിവരാണ് മക്കൾ.