എസ്എസ്എൽസി പരീക്ഷയിൽ ബീഹാറി വിദ്യാർത്ഥിക്ക് തിളക്കമാര്ന്ന വിജയം : അഭിനന്ദനങ്ങളുമായി ചൊക്ളിയിലെ നാട്ടുകാർ
![BTV](https://keralaonlinenews.com/static/c1e/client/94744/uploaded/eb06e46c4cb6e87b56b66eb6c74fbc4d.jpg?width=823&height=431&resizemode=4)
തലശേരി : പഠനത്തിനും, ജോലിക്കും, കലാ പ്രവര്ത്തനങ്ങള്ക്കുമിടയില് എസ്.എസ് എല്.സി.പരീക്ഷയെഴുതിയ ബീഹാറിയായ നിര്ദ്ധന വിദ്യാര്ത്ഥിക്ക് തിളക്കമാര്ന്ന വിജയം.
ചൊക്ലി രാമവിലാസം ഹയര് സെക്കന്ഡറി സ്കൂളില് നിന്ന് പരീക്ഷയെഴുതിയ പ്രിന്സ് കുമാറാണ് അഭിമാനാര്ഹമായ വിജയം കൊയ്ത് നാട്ടുകാരുടേയും, വിദ്യാലയത്തിന്റേയും അരുമയായത്.
ഹിന്ദിയില് എ പ്ലസ് നേടിയ പ്രിന്സിന് മലയാളമടക്കം നാല് വിഷയങ്ങളില് എ ഗ്രേഡുണ്ട്.
സ്കൂള് നാടകങ്ങളിലും ശാസ്ത്ര നാടകങ്ങളിലും അഭിനയിച്ച് ഏറെ പ്രശംസ നേടിയ ഈ കലാകാരന് സ്കൂള് യുവജനോത്സവത്തില് ജില്ലാതലത്തില് മികച്ച നടനുള്ള പുരസ്ക്കാരം നേടിയിട്ടുണ്ട്.സംസ്ഥാന തലത്തില് എ.ഗ്രേഡും നേടിയിരുന്നു. അഭിനയകലയില് അനിതരസാധാരണമായ സിദ്ധിവൈഭവമുള്ള പ്രിന്സ് കുമാര് ഒട്ടേറെ നാടകങ്ങളില് ഇതിനകം അഭിനയിച്ചിട്ടുണ്ട്.
![](https://keralaonlinenews.com/static/c1e/static/themes/11/94744/4170/images/new-shopprix-ad.jpg)
അഭിമാനകരമായ വിജയം കൊയ്ത പ്രിന്സ് ഠാക്കൂറിന് നിടുമ്പ്രം കലാഭവനില് നാട്ടുകാര് സ്നേഹാദരം നല്കി. ചൊക്ലി ബി.പി.സി.സുനില് ബാലിന്റെ അദ്ധ്യക്ഷതയില് ഗ്രാമ പഞ്ചായത്ത് പ്രസിഡണ്ട് സി.കെ.രമ്യ അനുമോദന സമ്മേളനം ഉദ്ഘാടനം ചെയ്തു.
മുതിര്ന്ന മാധ്യമ പ്രവര്ത്തകന് ചാലക്കര പുരുഷു, നാടക / ചലച്ചിത്ര നടന് രാജേന്ദ്രന് തായാട്ട്, നടന് ടി.ടി.മോഹനന്, ആര്ട്ടിസ്റ്റ് രാജേന്ദ്രന് ചൊക്ലി ,ഗീതാ സുരേഷ്, എന്നിവര് സംസാരിച്ചു.ടി.ടി.വേണുഗോപാല് സ്വാഗതവും സുരേഷ് ചെണ്ടയാട് നന്ദിയും പറഞ്ഞു.