.jpg)
ബൈക്കിന്റെ സീറ്റിനടിയില്‍ പെരുമ്പാമ്പ്; ആരോഗ്യവകുപ്പ് ജീവനക്കാരന്‍ കടിയേല്‍ക്കാതെ രക്ഷപ്പെട്ടത് തലനാരിഴയ്ക്ക്; സംഭവം കണ്ണൂര്‍ കലക്ടറേറ്റ് കോംപൗണ്ടില്‍
കണ്ണൂര്‍: കണ്ണൂര്‍ കലക്ടറേറ്റ് കോംപൗണ്ടിലേക്ക് ഓടിച്ചുവന്ന ബൈക്കിന്റെ സീറ്റിനടിയില്‍ പെരുമ്പാമ്പിനെ കണ്ടെത്തി. ആരോഗ്യവകുപ്പിലെ ജീവനക്കാരനായ മുണ്ടയാട്ടെ അനുരാഗിന്റെ കെ. എല്‍ 58 ആര്‍ 4228 ബൈക്കിനുളളിലാണ് പാമ്പിനെ കണ്ടെത്തിയത്. ബുധനാഴ്ച്ച രാവിലെ ഒന്‍പതു മണിയോടെ വീട്ടുമുറ്റത്ത് നിര്‍ത്തിയിട്ട ബൈക്ക് സ്റ്റാര്‍ട്ട് ചെയ്തു കലക്ടറേറ്റ് വളപ്പിലെത്തുകയായിരുന്നു അനുരാഗ്. ബൈക്കില്‍ നിന്നും ഇറങ്ങിയിട്ടും സീറ്റു അനങ്ങുന്നത് കണ്ടുു സീറ്റു ഉയര്‍ത്തി നോക്കിയപ്പോഴാണ് പെരുമ്പാമ്പിനെ കണ്ടെത്തിയത്.
തുടർന്ന് വനംവകുപ്പിന്റെ റെസ്‌ക്യൂ അംഗമായ ഷൈജിത്ത് പുതിയ പുരയിലിനെ വിവരമറിയിക്കുകയായിരുന്നു. ഇദ്ദേഹമെത്തിയാണ് പാമ്പിനെ പിടികൂടി പുറത്തെടുത്തത്. തലനാരിഴയ്ക്കാണ് അനുരാഗ് കടിയേല്‍ക്കാതെ രക്ഷപ്പെട്ടത്. വീട്ടില്‍ നിര്‍ത്തിയിട്ട സമയത്താണ് പെരുമ്പാമ്പ് കയറിക്കൂടിയതെന്നാണ് കരുതുന്നത്.
ദിവസങ്ങള്‍ക്കു മുന്‍പ് ഇരിക്കൂറില്‍ സ്‌കൂട്ടറിന്റെ ടാങ്കിന്റെ മൂടിയില്‍ ചുരുണ്ടുകിടന്ന അണലിയെ കണ്ടെത്തിയിരുന്നു. ഇതിനുമുന്‍പായി ഹെല്‍മെറ്റില്‍ കയറിക്കൂടിയ പെരുമ്പാമ്പ് കുഞ്ഞിന്റെ കടിയേറ്റു യുവാവിന് നെറ്റിയില്‍ പരുക്കേറ്റിരുന്നു.
