കണ്ണൂർ പുതിയ തെരുവിൽ അപകടത്തിൽപ്പെട്ട കാറിൽ നിന്നും മയക്കു മരുന്ന് പിടികൂടി

വളപട്ടണം : പുതിയ തെരുവിൽ അപകടത്തിൽപ്പെട്ട കാറിൽ നിന്നും മയക്കുമരുന്ന് പിടികൂടിയ സംഭവത്തിൽ രണ്ടു യുവാക്കളെ പൊലിസ് അറസ്റ്റു ചെയ്തു.

കാടാച്ചിറ സ്വദേശി ഷിഹാബ്, കണ്ണൂർ സ്വദേശി നിഹാദ് എന്നിവരെയാണ് വളപട്ടണം സിഐ ടി.പി. സുമേഷിന്‍റെ നേതൃത്വത്തില്‍ പിടികൂടിയത്. തിങ്കളാഴ്ച്ച പുലർച്ചെയാണ് പുതിയ തെരുവില്‍ അപകടം നടന്നത്. നിയന്ത്രണം വിട്ട കാർ ഡിവൈഡറിലേക്ക് ഇടിച്ചു കയറുകയായിരുന്നു.
അപകടം നടന്ന ഉടൻ പ്രതികള്‍ വാഹനം ഉപേക്ഷിച്ച്‌ രക്ഷപ്പെട്ടിരുന്നു.

 വളപട്ടണം പോലീസ് സ്ഥലത്തെത്തി പരിശോധിച്ചപ്പോഴാണ് വാഹനത്തില്‍നിന്നു രണ്ട് ഗ്രാം എംഡിഎംഎ കണ്ടെത്തിയത്. തുടർന്ന് സമീപത്തെ സിസിടിവിയും വാഹനം സംബന്ധിച്ചുള്ള വിവരങ്ങളും എടുത്തതിന്‍റെ അടിസ്ഥാനത്തിലാണ് പ്രതികളെ പോലീസ് കണ്ടെത്തിയത്. തുടർന്ന്  ചൊവ്വാഴ്ച്ച പുലർച്ചെ ഇരുവരെയും അവരുടെ വീടിന്‍റെ പരിസരത്തു നിന്ന് പൊലീസ് പിടി കൂടുകയായിരുന്നു.

കാറില്‍ നിന്ന് ലഭിച്ച മയക്കു മരുന്ന് വില്‍പനയ്ക്കായി കൊണ്ടു പോകുന്നതിനിടെയാണ് അപകടം നടന്നതെന്നു പോലീസ് പറഞ്ഞു. അപകട സമയത്ത് ഇരുവരും മയക്കു മരുന്ന് ഉപയോഗിച്ചിരുന്നോയെന്ന് പോലീസ് അന്വേഷിക്കുന്നുണ്ട്. പിടിയിലായ നിഹാദ് കാപ്പാ കേസ് പ്രതിയാണ്.