ഇവിടെ കാണാം വെംബ്ളി കീഴടക്കിയ തിരുവിതാംകൂർ രാജവംശത്തിൻ്റെ വസ്ത്ര വിസ്മയം

കണ്ണൂർ: ലോക പൈതൃക വാരാഘോഷത്തിൻ്റെ ഭാഗമായി കണ്ണൂരിൽ അപൂർവ്വവസ്ത്ര പ്രദർശനവുമായി പയ്യാമ്പലത്തെ കൈത്തറി മ്യുസിയം. 1924 ൽ ലണ്ടനിലെ വെംബ്ളി എക്സിബിഷനിൽ പ്രദർശിപ്പിച്ച തിരുവിതാംകൂർ രാജവംശത്തിൻ്റെ പരമ്പരാഗതമായ തുണിത്തരങ്ങളുടെ പ്രത്യേക പ്രദർശനമാണ് കൈത്തറി മ്യൂസിയത്തിൽ നടന്നത്. ഗോൾഡൻ എംബ്രോയ്ഡറി ടേബിൾ മാറ്റ്, അലങ്കാര പായ ഡോയിലി, പർപ്പിൾ സെൻ്റർ എംബ്രോയ്ഡറി ലേയ്സ്, കോർ സെറ്റ് എന്നിവ പ്രദർശനത്തിലുണ്ട്. 

പുരാവസ്തു - മ്യൂസിയം വകുപ്പ് മന്ത്രി രാമചന്ദ്രൻ കടന്നപ്പള്ളി പ്രദർശനം ഉദ്ഘാടനം ചെയ്തു. ചരിത്രസ്മൃതികൾ കാത്തു സൂക്ഷിക്കേണ്ടത് പുതിയ തലമുറയോട് കാണിക്കേണ്ട ചരിത്രപരമായ ധർമ്മമാണെന്ന് മന്ത്രി പറഞ്ഞു. ലോക പൈതൃക വാരാഘോഷത്തിൻ്റെ സംസ്ഥാന തല ഉദ്ഘാടനം കണ്ണൂരിൽ നടത്താൻ തീരുമാനിച്ചത് കൈത്തറിയുടെ ചരിത്രം പരിഗണിച്ചാണ്. കഴിഞ്ഞ എട്ടുവർഷത്തിനിടെ സംസ്ഥാനത്തുടെ നീളം വ്യത്യസ്ത വിഷയങ്ങളിൽ 22 മ്യുസിയങ്ങൾ സ്ഥാപിച്ചതായി മന്ത്രി പറഞ്ഞു. മ്യൂസിയങ്ങൾ ഇല്ലാതിരുന്ന കണ്ണൂരിൽ ഏഴോളം മ്യുസിയങ്ങളുടെ പദ്ധതിയാണ് നടപ്പിലാക്കുന്നതെന്നും മന്ത്രി പറഞ്ഞു.