.jpg)
വികസിത് ഭാരത് സങ്കല്‍പ്പ് യാത്ര വട്ടവടയിൽ പര്യടനം നടത്തി
ഇടുക്കി : കേന്ദ്ര ഗവൺമെന്റിന്റെ വികസന പദ്ധതികളും ജനക്ഷേമ പദ്ധതികളും സമൂഹത്തിന്റെ എല്ലാ തലങ്ങളിലും എത്തിക്കുക എന്ന ലക്ഷ്യത്തോടെ ആവിഷ്കരിച്ച് നടപ്പാക്കുന്ന വികസിത് ഭാരത് സങ്കല്‍പ്പ് യാത്ര ഇടുക്കിയിലെ കാർഷികഗ്രാമമായ വട്ടവടയിൽ എത്തി.
വട്ടവട ഗ്രാമീൺ ബാങ്കിന്റെ ആഭിമുഖ്യത്തിൽ കോവിലൂർ ബസ് സ്റ്റാൻഡിലാണ് പരിപാടി സംഘടിപ്പിച്ചത്. സമ്മേളനത്തിൽ ഗ്രാമീൺ ബാങ്ക് മാനേജർ എം. മുകേഷ് അദ്ധ്യക്ഷത വഹിച്ചു. വട്ടവട ഗ്രാമപഞ്ചായത്ത് പ്രസിഡണ്ട് ഗണപതിയമ്മാൾ ചടങ്ങ് ഉദ്ഘാടനം ചെയ്തു. ഗ്രാമീൺ ബാങ്ക് അസി. മാനേജർ ഹരികൃഷ്ണൻ, ശ്രീനാഥ്, നിഷ, മനോഹരൻ, പഞ്ചായത്ത് മെമ്പർമാരായ മനോഹരൻ, ശശി എന്നിവർ പ്രസംഗിച്ചു.
നബാര്‍ഡ്, ഇന്ത്യന്‍ ഓയില്‍ കോര്‍പ്പറേഷന്‍, കൃഷി വിജ്ഞാന കേന്ദ്രം, ഇന്ത്യ പോസ്റ്റ് തുടങ്ങി വിവിധ വകുപ്പുകളില്‍ നിന്നുള്ള ഉദ്യോഗസ്ഥര്‍ പരിപാടിയിൽ പങ്കെടുത്തു. കിസാന്‍ ക്രെഡിറ്റ് കാര്‍ഡ്, മുദ്ര, സ്റ്റാന്‍ഡ് അപ് ഇന്ത്യ മുതലായ സ്‌കീമുകളില്‍ അര്‍ഹതയുള്ളവര്‍ക്ക് ക്യാമ്പില്‍ വച്ചു തന്നെ തത്വത്തില്‍ അംഗീകാരം നല്‍കി. പ്രധാനമന്ത്രി ഉജ്ജ്വല യോജന മുഖേന അര്‍ഹരായവര്‍ക്ക് ഗ്യാസ് കണക്ഷന്‍ എടുക്കുന്നതിന് രജിസ്റ്റര്‍ ചെയ്യാനുള്ള സൗകര്യവും ആധാര്‍ സേവനങ്ങളും യാത്രയില്‍ ലഭ്യമാക്കി.
ജില്ലാ ലീഡ് ബാങ്കിന്റെ നേതൃത്വത്തില്‍ വിവിധ സര്‍ക്കാര്‍ വകുപ്പുകളുടെ സഹകരണത്തോടെയാണ് പരിപാടി സംഘടിപ്പിച്ചത്. കാർഷിക മേഖലയില്‍ സാങ്കേതിക വിദ്യകള്‍ പ്രയോഗിക്കുന്നതിന്റെ ഭാഗമായി വളപ്രയോഗം നടത്തുന്നതിനുള്ള ഡ്രോണ്‍ സാങ്കേതിക വിദ്യയും ജനങ്ങളെ പരിചയപ്പെടുത്തി. വിവിധ പദ്ധതികളുടെ ഗുണഭോക്താക്കള്‍ തങ്ങളുടെ അനുഭവങ്ങള്‍ പരിപാടിയിൽ പങ്കുവച്ചു.
