ദുരന്തബാധിതരുടെ കടങ്ങളുടെ കാര്യത്തില്‍ കേന്ദ്രസര്‍ക്കാര്‍ കേരളത്തോട് ക്രൂരത കാട്ടുന്നു ; മന്ത്രി കെ രാജന്‍

ദുരന്തബാധിതരുടെ കടങ്ങളുടെ കാര്യത്തില്‍ കേന്ദ്രസര്‍ക്കാര്‍ കേരളത്തോട് ക്രൂരത കാട്ടുന്നുവെന്ന് മന്ത്രി കെ രാജന്‍. കേരളത്തിന് പണം തരുന്നില്ല എന്ന കാര്യത്തില്‍ ഒരു രാഷ്ട്രീയ കാരണം ഉണ്ടെന്ന് വേണമെങ്കില്‍ കേന്ദ്രത്തിന് പറയാം. ഹൈലവല്‍ കമ്മിറ്റി കൂടി ഒരു പ്രമേയം പാസാക്കിയാല്‍ കടങ്ങള്‍ എഴുതിത്തള്ളാം. സിബില്‍ സ്‌കോര്‍ നോക്കാതെ ജീവനോപാധിക്കായി വായ്പ നല്‍കുകയും ചെയ്യാം. കേരളം അതിന്റെ പട്ടിക തയ്യാറാക്കി നല്‍കുകയും ചെയ്തുവെന്നും മന്ത്രി പറഞ്ഞു. 

മാലാഖയായി പ്രവര്‍ത്തിക്കേണ്ട കേന്ദ്രം അതിഭീകരമായി അവഗണിക്കുന്നു. കേന്ദ്രസര്‍ക്കാറിന്റെ നടപടിക്കെതിരെ കോടതി പറഞ്ഞ വാചകങ്ങള്‍  ഹൃദയത്തില്‍ തട്ടുന്നതാണ്. എല്ലാവര്‍ക്കും നീതി ലഭ്യമാക്കുകയാണ് സര്‍ക്കാരിന്റെ കടമ. തെക്കുഭാഗത്തുള്ള മലയാളം സംസാരിക്കുന്നവര്‍ക്ക് നീതി നിഷേധിക്കുക എന്നത് ശരിയായ കാര്യമല്ല. കേരളത്തിന് അവകാശപ്പെട്ടത് ചോദിച്ചു വാങ്ങാന്‍ ഏതറ്റം വരെയും കേരളം പോകും. പക്ഷേ അത് മരവുരിയെടുത്ത് കേരളം സമ്പൂര്‍ണ്ണ പാപ്പരാണ് എന്ന് കേരളത്തിന്റെ മേന്മകളെ അടിയറ വച്ചിട്ട് ആയിരിക്കില്ല. കേന്ദ്രസര്‍ക്കാര്‍ നിലപാട് മാറ്റുമെന്നാണ് ഇനിയും പ്രതീക്ഷിക്കുന്നതെന്നും മന്ത്രി കൂട്ടിച്ചേര്‍ത്തു.