സാഹിത്യകാരൻ കെ.എൽ.മോഹനവർമ വ്യാഴാഴ്ച ബിജെപിയിൽ ചേരും

കൊച്ചി: നോവലിസ്റ്റും ഹാസ്യസാഹിത്യകാരനുമായ കെ.എൽ.മോഹനവർമ ബിജെപിയിൽ ചേരും. വ്യാഴാഴ്ച രാവിലെ 9.30ന് ദർബാർ ഹാളിനു സമീപമുള്ള സ്വവസതിയിൽ വച്ചാകും ബിജെപി അംഗത്വം സ്വീകരിക്കുക. കോൺഗ്രസ് അനുഭാവിയും കോൺഗ്രസിന്റെ മുഖപത്രമായ വീക്ഷണത്തിന്റെ മുഖ്യ പത്രാധിപരുമായിരുന്നു മോഹനവർമ. 

നിരവധി നോവലുകൾ എഴുതിയിട്ടുള്ള മോഹനവർമയുടെ ഓഹരി, ക്രിക്കറ്റ്, സ്റ്റോക്ക് എക്സ്ചേഞ്ച് തുടങ്ങിയ നോവലുകൾ‍ ശ്രദ്ധിക്കപ്പെട്ടവയാണ്. കേന്ദ്രസർക്കാർ ഉദ്യോഗത്തിൽനിന്ന് സ്വയംവിരമിച്ച അദ്ദേഹം ഒന്നരവർഷം സാഹിത്യ അക്കാദമി സെക്രട്ടറിയായി സേവനമനുഷ്ഠിച്ചിരുന്നു. കേരള സാഹിത്യ അക്കാദമി അവാർഡ് അടക്കം മോഹനവർമ നേടിയിട്ടുണ്ട്.