കണ്ണൂർ കതിരൂരിലെ കലശം ഘോഷയാത്രയിൽ പി ജയരാജന്‍റെ ചിത്രം വച്ചതിനെ തള്ളി സിപിഎം

cpm9

തിരുവനന്തപുരം: കണ്ണൂർ കതിരൂരിലെ കലശം ഘോഷയാത്രയിൽ പി ജയരാജന്‍റെ ചിത്രം വച്ചതിനെ തള്ളി സിപിഎം. ക്ഷേത്രോത്സവത്തിന്‍റെ ഭാഗമായി പി ജയരാജൻ്റെ പടം വച്ചത് പാർട്ടി അംഗീകരിക്കുന്നില്ലെന്ന് വ്യക്തമാക്കിയ എം വി ഗോവിന്ദൻ, വിശ്വാസവുമായി ബന്ധപ്പെട്ട് മാര്‍ക്സിന്‍റെ പടം വച്ചാലും അംഗീകരിക്കില്ലെന്ന് പ്രതികരിച്ചു. ഒരു വിശ്വാസത്തിനും പാർട്ടി എതിരല്ലെന്നും സിപിഎം സംസ്ഥാന സെക്രട്ടറി കൂട്ടിച്ചേര്‍ത്തു. 

കണ്ണൂരിൽ ക്ഷേത്രോത്സവത്തിന്‍റെ ഭാഗമായ കലശം വരവിൽ പി ജയരാജന്‍റെ ചിത്രം ഉൾപ്പെടുത്തിയ കലശം പ്രദർശിപ്പിച്ചതിനെ ചൊല്ലി സിപിഎമ്മിൽ വിവാദം ഉയര്‍ന്നിരുന്നു. പ്രവർത്തകരുടെ നടപടിയെ സിപിഎം ജില്ലാ സെക്രട്ടറി തന്നെ പരസ്യമായി തള്ളിപ്പറഞ്ഞിരുന്നു. നേതാക്കളുടെ ചിത്രം വെച്ചല്ല ക്ഷേത്രങ്ങളിൽ കലശവും ഘോഷയാത്രയും നടത്തണ്ടതെന്നാണ്  സിപിഎം  ജില്ലാ സെക്രട്ടറി എംവി ജയരാജൻ  പറഞ്ഞത്. ക്ഷേത്ര കലശത്തിൽ പാർട്ടി നേതാക്കളുടെ ചിത്രം പതിക്കരുതെന്നും അദ്ദേഹം നിര്‍ദ്ദേശിച്ചു.

Share this story