.jpg)
പാലക്കാട് മുന്‍ തിരഞ്ഞെടുപ്പിലേതിനേക്കാള്‍ കൂടുതല്‍ വോട്ടര്‍മാര്‍ എല്‍ ഡി എഫിനൊപ്പം അണിനിരന്നു, ശക്തമായി മുന്നോട്ട് പോകുമെന്ന് മുഖ്യമന്ത്രി
എല്ലാത്തരം വര്‍ഗീയതയ്ക്കും എതിരായ മതനിരപേക്ഷ വോട്ടാണ് എല്‍ഡിഎഫിന് ലഭിച്ചത്.
എല്‍ഡിഎഫ് സര്‍ക്കാരിന്റെ ജനപിന്തുണയും അംഗീകാരവും കൂടുതല്‍ ദൃഢമാക്കുന്നതാണ് നിയമസഭാ ഉപതിരഞ്ഞെടുപ്പ് ഫലങ്ങളെന്ന് മുഖ്യമന്ത്രി പിണറായി വിജയന്‍. 'സംഘടിതമായ കുപ്രചാരങ്ങളെയും കടന്നാക്രമണങ്ങളെയും മുഖവിലയ്ക്കെടുക്കാതെയാണ് ജനങ്ങള്‍ ചേലക്കര നിയോജക മണ്ഡലത്തില്‍ ഇടതുപക്ഷ ജനാധിപത്യമുന്നണിക്ക് തിളങ്ങുന്ന വിജയം നല്‍കിയത്.
പാലക്കാട് മുന്‍ തിരഞ്ഞെടുപ്പിലേതിനേക്കാള്‍ കൂടുതല്‍ വോട്ടര്‍മാര്‍ എല്‍ ഡി എഫിനൊപ്പം അണിനിരന്നു. ഇനിയുള്ള നാളുകളില്‍ വികസന -ക്ഷേമ പ്രവര്‍ത്തനങ്ങള്‍ കൂടുതല്‍ ശക്തമായി മുന്നോട്ടുകൊണ്ടുപോകുന്നതിന് വര്‍ധിച്ച ഊര്‍ജ്ജം നല്‍കുന്നതാണ് ഈ ജനവിധി.' പിണറായി വിജയന്‍.
എല്ലാത്തരം വര്‍ഗീയതയ്ക്കും എതിരായ മതനിരപേക്ഷ വോട്ടാണ് എല്‍ഡിഎഫിന് ലഭിച്ചത്. വര്‍ഗീയതയെ തുറന്നുകാട്ടി മതനിരപേക്ഷ രാഷ്ട്രീയം വിട്ടുവീഴ്ചയില്ലാതെ ഉയര്‍ത്തിപ്പിടിക്കേണ്ടതിന്റെ ആവശ്യകതയാണ് ഈ തിരഞ്ഞെടുപ്പ് ഫലം നല്‍കുന്ന ഒരു സന്ദേശം. ഭരണ വിരുദ്ധ വികാരം എന്ന പ്രചാരണം ലവലേശം പോലും ജനങ്ങളെ സ്വാധീനിച്ചിട്ടില്ല എന്നും വിവാദ-നുണ പ്രചാരകരെ ജനങ്ങള്‍ മുഖവിലയ്ക്കെടുത്തിട്ടില്ല എന്നും തിരഞ്ഞെടുപ്പുഫലം വ്യക്തമാക്കുന്നുവെന്നും കേരളത്തിലെ ഉപതിരഞ്ഞെടുപ്പ് ഫലങ്ങളോട് പ്രതികരിക്കുന്നതിനിടയില്‍ അദ്ദേഹം കൂട്ടിചേര്‍ത്തു. വര്‍ഗീയ ശക്തികളെ കൂട്ടുപിടിച്ച് പാലക്കാട് നിലനിര്‍ത്താന്‍ യുഡിഎഫിന് കഴിഞ്ഞെങ്കിലും എല്‍ഡിഎഫ് സ്ഥാനാര്‍ത്ഥിയുടെ വോട്ടുകള്‍ നേരത്തേയുള്ളതില്‍ നിന്നും കൂടുകയാണുണ്ടായത്. ചില താല്‍ക്കാലിക നേട്ടങ്ങള്‍ ഉണ്ടാക്കുന്നതൊഴിച്ച് ബിജെപിക്ക് കേരളത്തില്‍ ശാശ്വതമായ ചലനം ഉണ്ടാക്കാന്‍ സാധിക്കില്ല എന്നാണ് ലോക്‌സഭാ തെരഞ്ഞെടുപ്പില്‍ തൃശൂരില്‍ വിജയിച്ചത് ചൂണ്ടിക്കാട്ടി അവര്‍ മുഴക്കിയ അവകാശവാദങ്ങള്‍ ജനങ്ങള്‍ തിരസ്‌കരിച്ചതിലൂടെ വ്യക്തമാകുന്നതെന്നും അദ്ദേഹം പറഞ്ഞു.
ഇതോടൊപ്പം നിയമസഭാ ഉപതെരഞ്ഞെടുപ്പുകളിലേയും വയനാട് ലോക്‌സഭാ ഉപതെരഞ്ഞെടുപ്പിലേയും വിജയികളെ മുഖ്യമന്ത്രി അഭിനന്ദിക്കുകയും എല്‍ ഡി എഫിന് വോട്ടുചെയ്ത മുഴുവന്‍ ജനങ്ങള്‍ക്കും അഭിവാദ്യങ്ങള്‍ അറിയിക്കുകയും ചെയ്തു.
