കേരളത്തിൽ സമുദായ സംഘടനകളുടെ പിന്തുണയില്ലാതെ ജീവിക്കാൻ പറ്റുന്നില്ലെങ്കിൽ ആത്മഹത്യ ചെയ്യുന്നതാണ്​ നല്ലത് : ജി. സുധാകരൻ

ആലപ്പുഴ: സമുദായ സംഘടനകളുടെ പിന്തുണയില്ലാതെ കേരളത്തിൽ ജീവിക്കാൻ പറ്റുന്നില്ലെങ്കിൽ പിന്നെ ആത്മഹത്യ ചെയ്യുന്നതാണ്​ നല്ലതെന്ന് സി.പി.എം മുതിർന്ന നേതാവും മുൻ മന്ത്രിയുമായ ജി. സുധാകരൻ. രാഷ്ട്രീയക്കാർ സമുദായ സംഘടനകളുടെ പിറകെ നടക്കരുത്. സമുദായവും മതവും അവരുടെ ജോലിയാണ്​ ചെയ്യുന്നത്. കേരളത്തിൽ ജാതിയും മതവും നോക്കി വോട്ടു ചെയ്യുന്ന രീതി അവസാനിപ്പിക്കണമെന്നും സുധാകരൻ വ്യക്തമാക്കി​.

ബി.ജെ.പി സംസ്ഥാന പ്രസിഡൻറായി ആർ.എസ്​.എസ്​ അംഗമല്ലാത്ത രാജീവ്​ ചന്ദ്രശേഖരനെ കേരളത്തിൽ എന്തിനാണ്​ കൊണ്ടു വന്നതെന്ന്​ പലർക്കും മനസ്സിലായിട്ടില്ല. പല പുതിയ കാര്യങ്ങളും സംഭവിക്കാൻ പോകുന്നുവെന്ന സൂചനയാണിത്​. ആർ.എസ്​.എസും ബി.ജെ.പിയും വ​രെ ജനങ്ങളെ ആകർഷിക്കാൻ കഴിഞ്ഞാൽ മാത്രമേ നിലനിൽക്കൂവെന്ന്​ മനസ്സിലാക്കി. ജനങ്ങളെ ആകർഷിച്ച കമ്യൂണിസ്റ്റുകാരും ഇടതുപക്ഷക്കാരും പണ്ടേ ഇത്​ മനസ്സിലാക്കിയപ്പോഴാണ്​ കോൺ​ഗ്രസ്​ തോറ്റത്​.

മുതിർന്നവരെ സംരക്ഷിക്കണമെന്നാണ്​ കമ്യൂണിസ്റ്റ്​ പാർട്ടി പറഞ്ഞിട്ടുള്ളത്​. പെൻഷൻ​ കൊടുത്താൽ മുടിഞ്ഞു പോകുമെന്ന്​ പറഞ്ഞു കളയരുത്​. അത്​ ആരുപറഞ്ഞാലും​ അംഗീകരിക്കാനാവില്ല. മർക്കടമുഷ്ടിക്കാരനെന്ന്​ വിളിച്ചാണ്​ എസ്​.എഫ്​.ഐ നേതാവ്​​ ഫേസ്​ബുക്കിലൂടെ തന്നെ അധി​ക്ഷേപിച്ചത്​. 62 വർഷം പാർട്ടി മെംബറായി ഇരുന്നതിന്‍റെ അവാർഡാണിത്​. ​ഇത്​ തെറ്റാണെന്ന്​ ആരും പറഞ്ഞില്ല.

യോഗ്യതയില്ലാത്തവർ കയറിയാൽ ആ സ്ഥാനത്ത്​ അധിക ദിവസം ഇ​രിക്കില്ല. ജനങ്ങളുടെ പിന്തുണ വേണമെന്നും ഇല്ലെങ്കിൽ പ്രസ്ഥാനത്തിന്​ ബാധ്യതയാകുമെന്നും ജി. സുധാകരൻ പറഞ്ഞു. പുന്നപ്ര-വയലാർ സമരനായകനും മുൻമന്ത്രിയുമായ ടി.വി. തോമസിന്‍റെ ചരമവാർഷികാചരണഭാഗമായി സി.പി.ഐ സംഘടിപ്പിച്ച സെമിനാർ ഉദ്​ഘാടനം ചെയ്യുകയായിരുന്നു അദ്ദേഹം.