മലയാള ബോക്സോഫീസ് കീഴടക്കാൻ ചന്തുവും നീലകണ്ഠനും നാഗവല്ലിയും വീണ്ടുമെത്തുന്നു
![re release](https://keralaonlinenews.com/static/c1e/client/94744/uploaded/4dcb520dbbbfe307b24ef5fde9ddce75.jpg?width=823&height=431&resizemode=4)
![re release](https://keralaonlinenews.com/static/c1e/client/94744/uploaded/4dcb520dbbbfe307b24ef5fde9ddce75.jpg?width=382&height=200&resizemode=4)
മലയാള ബോക്സോഫീസ് കീഴടക്കാൻ ഹിറ്റ് സിനിമകൾ വീണ്ടും റീ റിലീസിന് ഒരുങ്ങുന്നു .പുഴമുറിച്ച് കുതിരപ്പുറത്തുവരുന്ന ചന്തുവും മുണ്ടുമടക്കിക്കുത്തി മീശപിരിക്കുന്ന മംഗലശ്ശേരി നീലകണ്ഠനും മാടമ്പള്ളിമനയുടെ തെക്കിനിത്താഴുതുറന്ന നാഗവല്ലിയും ‘ഫോർ കെ’ ദൃശ്യമായി വീണ്ടുമെത്തുന്നു .
‘ഒരു വടക്കൻ വീരഗാഥ’യും ‘മണിച്ചിത്രത്താഴും’ ‘ദേവാസുരവും’ ‘ആറാംതമ്പുരാനും’ ‘ദേവദൂതനു’മെല്ലാമുൾപ്പെടെ പത്തോളം സിനിമകളാണ് പുതിയകാലത്തിന്റെ മിഴിവോടെയും മികവോടെയും തിയേറ്ററുകളിലേക്ക് എത്തുന്നത് .
എസ്.ക്യൂബ് ഫിലിംസാണ് മലയാള സിനിമയിലെ ഇതിഹാസമായ ‘ഒരു വടക്കൻ വീരഗാഥ’ 35 വർഷത്തിനുശേഷം വീണ്ടും പ്രേക്ഷകരിലേക്കെത്തിക്കുന്നത്. ഇതിനുള്ള പ്രാഥമികജോലികൾ പൂർത്തിയായി. പുറത്തിറങ്ങി 31 വർഷമായിട്ടും പുതുമ നഷ്ടപ്പെടാത്ത ‘മണിച്ചിത്രത്താഴ്’ പുതിയ സാങ്കേതികവിദ്യകളുപയോഗിച്ചുള്ള റീമാസ്റ്ററിങ് ജോലികൾ പൂർത്തിയാക്കി ഫസ്റ്റ്കോപ്പിയായിട്ടുണ്ട്. ജൂലായ് 12-ലോ ഓഗസ്റ്റ് 17-നോ ചിത്രം റിലീസ് ചെയ്യും.
ചിത്രത്തിന്റെ ഓവർസീസ് അവകാശത്തിനായി ചില വലിയ കമ്പനികളുമായി ചർച്ചകൾ നടക്കുന്നെന്ന് റീമാസ്റ്ററിങ്ങിന് നേതൃത്വംനൽകിയ മാറ്റിനി നൗവിന്റെ ഉടമ ഡി. സോമൻപിള്ള പറഞ്ഞു. മാറ്റിനിനൗവും സംവിധായകൻ ഫാസിലും നിർമാതാവ് സ്വർഗചിത്ര അപ്പച്ചനും ചേർന്നാണ് ‘മണിച്ചിത്രത്താഴ്’ വീണ്ടും പുറത്തിറക്കുക. റീ-റിലീസിന് തയ്യാറെടുക്കുന്ന ‘കാലാപാനി’, ‘വല്യേട്ടൻ’, ‘ദേവാസുരം’, ‘ആറാംതമ്പുരാൻ’ ‘1921’ തുടങ്ങിയ ചിത്രങ്ങളുടെ റീമാസ്റ്ററിങ് ചെയ്യുന്നതും കൊല്ലം ആസ്ഥാനമായ മാറ്റിനി നൗ ആണ്.
![](https://keralaonlinenews.com/static/c1e/static/themes/11/94744/4170/images/E-PLANET-ROAYAL-AND-DINESH-AD--1-.webp)
മോഹൻലാൽ നായകനായി 2000-ൽ പുറത്തിറങ്ങിയ ‘ദേവദൂതൻ’ വീണ്ടും റിലീസ് ചെയ്യുന്നതിന് മുന്നോടിയായി ഫോർ കെ എഡിറ്റിങ്ങും ഡി.ഐ. ജോലികളും കഴിഞ്ഞു. ചിത്രം രണ്ടുമൂന്നു മാസത്തിനുള്ളിൽ തിയേറ്ററുകളിലെത്തിക്കാനുദ്ദേശിക്കുന്നതെന്ന് നിർമാതാവ് സിയാദ് കോക്കർ പറഞ്ഞു.
രഞ്ജിത് ഒരുക്കിയ ‘പാലേരിമാണിക്യം-ഒരു പാതിരാക്കൊലപാതകത്തിന്റെ കഥ’ പതിനഞ്ചുവർഷത്തിനുശേഷം റീ റിലീസ് ചെയ്യാനുള്ള പ്രാഥമികജോലികളിലാണ് നിർമാതാവ് മഹാസുബൈർ. ‘കിരീടം’ വീണ്ടും തിയേറ്ററുകളിലെത്തിക്കുന്നതിനുള്ള ആലോചനയുണ്ടെന്ന് നിർമാതാവ് കിരീടം ഉണ്ണിയും പറയുന്നു. സാങ്കേതികമേന്മവരുത്തി വീണ്ടും തിയേറ്ററുകളിലെത്തിയ ‘സ്ഫടിക’ത്തിന്റെ വിജയമാണ് പല നിർമാതാക്കളെയും റീ-റിലീസിന് പ്രേരിപ്പിച്ചത്.