ചിന്നു ചാന്ദ്നി നായികയാകുന്ന 'വിശേഷം' ടീസർ
![vishesham](https://keralaonlinenews.com/static/c1e/client/94744/uploaded/2d8a232197d85ac97185bc95ce40fa9e.jpg?width=823&height=431&resizemode=4)
![vishesham](https://keralaonlinenews.com/static/c1e/client/94744/uploaded/2d8a232197d85ac97185bc95ce40fa9e.jpg?width=382&height=200&resizemode=4)
സൂരജ് ടോമിന്റെ സംവിധാനത്തിൽ അനി സൂരജ് നിർമ്മിക്കുന്ന കോമഡി - ഡ്രാമ ചിത്രം 'വിശേഷ'ത്തിന്റെ ടീസർ റിലീസ് ചെയ്തു. ചിന്നു ചാന്ദ്നി നായികയാകുന്ന ചിത്രത്തിൽ പുതിയ നായകനായി പ്രശസ്ത സംഗീത സംവിധായകൻ ആനന്ദ് മധുസൂദനനെ പരിചയപ്പെടുത്തുന്ന ടീസറാണ് പുറത്തിറങ്ങിയത്. 'പൊടിമീശ മുളയ്ക്കണ കാലം' ഉൾപ്പടെ നിരവധി ഹിറ്റ് ഗാനങ്ങൾ ഒരുക്കിയ ആനന്ദ് ആദ്യമായി അഭിനയിക്കുന്ന ചിത്രമാണിത്. ചിത്രത്തിന്റെ കഥയും, തിരക്കഥയും, ഗാനരചനയും, സംഗീതവും, പശ്ചാത്തല സംഗീതവും നിർവഹിക്കുന്നതും ആനന്ദാണ്. മലയാളത്തിലെ പ്രമുഖ നായികമാർ റിലീസ് ചെയ്ത ടീസർ ചിത്രത്തിന് ആശംസകൾ നേർന്ന് നിരവധിപേർ സാമൂഹ്യമാധ്യമങ്ങളിൽ പങ്കുവെച്ചു.
സ്ഥിരം കാഴ്ച്ചയാകുന്ന യാഥാസ്ഥിതിക നായക സങ്കൽപ്പങ്ങളെ പൊളിച്ചെഴുതുകയാണ് 'വിശേഷ'ത്തിലൂടെ അണിയറ പ്രവർത്തകർ. മുമ്പെവിടെയും സൂചിപ്പിക്കാതെ തീർത്തും ഒരു സർപ്രൈസ് ആയിട്ടാണ് നായകനെ അണിയറപ്രവർത്തകർ വെളിപ്പെടുത്തിയത്. സംവിധായകൻ സൂരജ് ടോമിന്റെ നേതൃത്വത്തിൽ രൂപപ്പെട്ട സ്റ്റെപ്പ്2ഫിലിംസിൻ്റെ ബാനറിലാണ് ചിത്രം ഒരുങ്ങുന്നത്. സ്റ്റെപ്പ്2ഫിലിംസിന്റെ ആദ്യ നിർമ്മാണ സംരംഭമാണ് 'വിശേഷം'.
ആൽബർട്ട് പോളും, കുര്യൻ സി. മാത്യുവുമാണ് ചിത്രത്തിന്റെ എക്സിക്യൂട്ടീവ് പ്രൊഡ്യൂസർമാർ. സാഗർ അയ്യപ്പൻ ഛായാഗ്രഹണം നിർവഹിക്കുന്ന 'വിശേഷ'ത്തിന്റെ ചിത്രസംയോജനം നിർവഹിക്കുന്നത് മാളവിക വി.എൻ. ആണ്. ബൈജു ജോൺസൺ, അൽത്താഫ് സലിം, ജോണി ആൻ്റണി, പി.പി.കുഞ്ഞികൃഷ്ണൻ, വിനീത് തട്ടിൽ, സൂരജ് പോപ്സ്, സിജോ ജോൺസൺ, മാലാ പാർവതി, ഷൈനി സാറ രാജൻ, ജിലു ജോസഫ്, ഭാനുമതി പയ്യന്നൂർ, അജിത മേനോൻ, അമൃത, ആൻ സലീം എന്നിവരടങ്ങുന്ന താരനിരയും 'വിശേഷ'ത്തിലുണ്ട്.
![](https://keralaonlinenews.com/static/c1e/static/themes/11/94744/4170/images/E-PLANET-ROAYAL-AND-DINESH-AD--1-.webp)