പത്തനംതിട്ടയിൽ വിദ്യാർത്ഥിനിക്ക് നേരെ നഗ്നതാപ്രദർശനം ; രണ്ടുപേർ അറസ്റ്റിൽ


പത്തനംതിട്ട: ഡിഗ്രി വിദ്യാർത്ഥിനിയുടെ നേരെ നഗ്നതാപ്രദർശനം നടത്തുകയും, പിന്തുടർന്ന് ഭയപ്പെടുത്താൻ ശ്രമിക്കുകയും ചെയ്ത കേസിൽ രണ്ട് യുവാക്കളെ പോലീസ് അറസ്റ്റ് ചെയ്തു. കോട്ടാങ്ങൽ ഭഗവതി കുന്നേൽവീട്ടിൽ ബി.ആർ. ദിനേശ് (35), കോട്ടാങ്ങൽ എള്ളിട്ട മുറിയിൽ വീട്ടിൽ മാഹീൻ (30) എന്നിവരാണ് പിടിയിലായത്.
ചുങ്കപ്പാറ ബസ് സ്റ്റാൻഡിൽ വെച്ചാണ് സംഭവം. നാട്ടുകാർ ദിനേശിനെ പിടികൂടി തടഞ്ഞുവെച്ച് പൊലീസിൽ ഏൽപ്പിക്കുകയായിരുന്നു. എന്നാൽ, മാഹീൻ സ്ഥലത്ത് നിന്ന് ഓടി പോവുകയായിരുന്നു. തുടർന്ന്, വിദ്യാർത്ഥിനിയുടെ മൊഴിപ്രകാരം എസ്.ഐ ടി.പി. ശശികുമാർ കേസെടുത്ത് അന്വേഷണം ആരംഭിച്ചു. ഇൻസ്പെക്ടർ ബി. സജീഷ് കുമാറിന്റെ നേതൃത്വത്തിലുള്ള പൊലീസ് സംഘം നടത്തിയ തിരച്ചിലിലാണ് പ്രതിയെ പിടികൂടിയത്.

2023 ൽ പെരുമ്പെട്ടി പൊലീസ് രജിസ്റ്റർ ചെയ്ത സ്ത്രീധന പീഢന, ദേഹോപദ്രവം ഉൾപ്പെടെ 10 കേസുകളിൽ പ്രതിയാണ് ദിനേശ്. സ്ത്രീകൾക്ക് നേരെയുള്ള അതിക്രമം, ദേഹോപദ്രവം ഏൽപിക്കൽ എന്നതിന് വെണ്മണി പോലീസ് രജിസ്റ്റർ ചെയ്ത കേസും ഇതിൽ ഉൾപ്പെടുന്നു. കഞ്ചാവ് ബീഡി വലിച്ചതിന് എടുത്ത രണ്ട് കേസുകൾ ഉൾപ്പെടെ പെരുമ്പെട്ടി, മണിമല സ്റ്റേഷനുകളിലെടുത്ത അഞ്ച് കേസുകളിൽ പ്രതിയാണ് മാഹീൻ. ഇവരെ നടപടികൾക്ക് ശേഷം ജാമ്യത്തിൽ വിട്ടയച്ചു.