ഇന്ത്യൻ വിപണിയിലെ ഈ കാറുകള്‍ നിര്‍ത്തലാക്കാൻ ജാപ്പനീസ് വാഹനഭീമൻ!

ജാപ്പനീസ് കാര്‍ നിര്‍മ്മാതാക്കളായ ഹോണ്ട കാർസ് ഇന്ത്യ നിലവിൽ ഇന്ത്യയിൽ ഡീസൽ എഞ്ചിൻ ഓപ്ഷൻ നിർത്തലാക്കാൻ നീക്കം നടത്തുന്നതായി റിപ്പോര്‍ട്ട്. ഹോണ്ട ഇപ്പോൾ ഡീസലിനെക്കുറിച്ച് അധികം ചിന്തിക്കുന്നില്ലെന്നും ഡീസൽ ഉപയോഗിച്ച് റിയൽ ഡ്രൈവിംഗ് എമിഷൻ മാനദണ്ഡങ്ങൾ നടപ്പിലാക്കുന്നത് വളരെ ബുദ്ധിമുട്ടാണെന്നും ഹോണ്ട കാർസ് ഇന്ത്യയുടെ പ്രസിഡന്റും സിഇഒയുമായ തകുയ സുമുറ പറഞ്ഞതായി മോട്ടോര്‍ബീം റിപ്പോര്‍ട്ട് ചെയ്യുന്നു. 

യൂറോപ്പിൽ പോലും, മിക്ക ബ്രാൻഡുകൾക്കും ഡീസൽ സാങ്കേതികവിദ്യയിൽ തുടരാൻ കഴിയില്ലെന്നും ഇന്ത്യയിലും സമാനമായ സാഹചര്യമാണ് നടക്കുന്നതെന്നും അദ്ദേഹം പറയുന്നു. നിലവിൽ, ഇന്ധനമെന്ന നിലയിൽ ഡീസലിന്റെ പ്രവർത്തനക്ഷമത വിലയിരുത്തുകയാണ് ഹോണ്ട. വരാനിരിക്കുന്ന റിയൽ ഡ്രൈവിംഗ് എമിഷൻസ് മാനദണ്ഡങ്ങൾ 2023 ഏപ്രിലിൽ പ്രാബല്യത്തിൽ വരുന്നതോടെ കോർപ്പറേറ്റ് ശരാശരി ഇന്ധന സമ്പദ്‌വ്യവസ്ഥ മാനദണ്ഡങ്ങൾ അനുസരിച്ച്, കാർ നിർമ്മാതാക്കൾക്ക് അനുയോജ്യമായ പരീക്ഷണ സാഹചര്യങ്ങളിലും യഥാർത്ഥ ലോക സാഹചര്യങ്ങളിലും എമിഷൻ ലക്ഷ്യങ്ങൾ കൈവരിക്കേണ്ടതുണ്ട്.

മിക്ക നിർമ്മാതാക്കളും ഡീസൽ പവർ കാറുകളുടെ, പ്രത്യേകിച്ച് മാരുതിയും ഹ്യൂണ്ടായും, വലിയ അളവിലുള്ള കാറുകൾ പുറത്തിറക്കിയപ്പോഴാണ് ഹോണ്ടയും ഇന്ത്യയിൽ ഡീസൽ വാഹന വിഭാഗത്തിലേക്ക് പ്രവേശിച്ചത്. നിലവിൽ കമ്പനി പുതിയ സിറ്റി സെഡാൻ, ഡബ്ല്യുആര്‍-വി ക്രോസ്ഓവർ, അമേസ് കോംപാക്ട് സെഡാൻ എന്നിവയാണ് ഹോണ്ട നിലവിൽ ഇന്ത്യയിൽ വിൽപ്പനയ്‌ക്ക് വാഗ്ദാനം ചെയ്യുന്ന മൂന്ന് ഡീസൽ വാഹനങ്ങൾ. ഈ മോഡലുകളില്‍ 1.5 ലിറ്റർ i-DTEC ഡീസൽ എഞ്ചിൻ വാഗ്ദാനം ചെയ്യുന്നു. ഈ  i-DTEC ടർബോ ഡീസൽ എഞ്ചിൻ, 98.6 ബിഎച്ച്പിയും 200 എൻഎം ഔട്ട്‍പുട്ടും സൃഷ്‍ടിക്കുന്നു.  ഇന്ത്യൻ വിപണിക്ക് വേണ്ടി രൂപകൽപ്പന ചെയ്‍ത ഈ ഡീസൽ എഞ്ചിൻ ഹോണ്ടയുടെ രാജസ്ഥാനിലെ തപുകര പ്ലാന്‍റിലാണ് നിർമ്മിക്കുന്നത്. 

ഹ്യുണ്ടായ്, മാരുതി, ടാറ്റ മോട്ടോഴ്‌സ് മോഡലുകളോട് മത്സരിക്കാൻ തങ്ങളുടെ ആദ്യ ലക്ഷ്വറി എസ്‌യുവി പുറത്തിറക്കാൻ ഏറെക്കുറെ തയ്യാറായിരിക്കുന്ന ഹോണ്ട കാർസ് ഇന്ത്യ, ദേശീയ ഇലക്ട്രിക് വാഹന പദ്ധതി പൂർത്തിയാകുമ്പോഴും ഹൈബ്രിഡ് കാറുകളുടെ നിര വിപുലീകരിക്കാൻ ശ്രമിക്കുകയാണ്. ഹോണ്ട അടുത്തിടെ സിറ്റിയിൽ ശക്തമായ ഹൈബ്രിഡ് സാങ്കേതികവിദ്യ അവതരിപ്പിച്ചിരുന്നു. ഭാവിയിൽ, കാർ നിർമ്മാതാവ് ശക്തമായ ഹൈബ്രിഡിൽ ശ്രദ്ധ കേന്ദ്രീകരിക്കുമെന്നും ഇന്ത്യയ്ക്കായി ഇലക്ട്രിക് വാഹനങ്ങൾ വിലയിരുത്തുമെന്നും പ്രതീക്ഷിക്കുന്നു.