സൗമ്യയുടെ മരണത്തില് അനുശോചനം അറിയിച്ച് മുഖ്യമന്ത്രി
തിരുവനന്തപുരം: ഇസ്രായേലില് ഹമാസിന്റെ റോക്കറ്റ് ആക്രമണത്തില് കൊല്ലപ്പെട്ട മലയാളി യുവതി സൗമ്യ സന്തോഷിന്റെ മരണത്തില് അനുശോചനം അറിയിച്ച് മുഖ്യമന്ത്രി പിണറായി വിജയന്.
സൗമ്യയുടെ മൃതദേഹം എത്രയും വേഗം നാട്ടിലെത്തിക്കാനുള്ള നടപടികള് സംസ്ഥാന സര്ക്കാര് സ്വീകരിച്ചു വരികയാണ്. അതിനായി ഇസ്രയേലിലെ ഇന്ത്യന് അംബാസഡര് സഞ്ജീവ് സിംഗ്ലയുമായി നോര്ക്ക പ്രിന്സിപ്പല് സെക്രട്ടറി കെ. ഇളങ്കോവന് ബന്ധപ്പെട്ടിട്ടുണ്ടെന്നും അദ്ദേഹം ഫേസ്ബുക്കിലൂടെ അറിയിച്ചു.
അവിടുത്തെ പ്രാദേശിക ഭരണസംവിധാനവുമായി ഇന്ത്യന് എംബസി ബന്ധപ്പെട്ടു കഴിഞ്ഞിട്ടുണ്ട് എന്ന് അംബാസഡര് അറിയിച്ചു. സൗമ്യയുടെ അകാല വിയോഗത്തില് കുടുംബത്തിന് ആശ്വാസമേകാനുതകുന്ന വിധത്തില് നഷ്ടപരിഹാരം നേടിയെടുക്കാന് വേണ്ട നടപടികള് കൈക്കൊള്ളണമെന്നും ആവശ്യപ്പെട്ടിട്ടുണ്ട്. സൗമ്യയുടെ കുടുംബത്തിന്റേയും സുഹൃത്തുക്കളുടേയും ദു:ഖത്തില് പങ്കു ചേരുന്നു, ആദരാഞ്ജലികള് അര്പ്പിക്കുന്നു എന്നും മുഖ്യമന്ത്രിയുടെ ഫേസ്ബുക്ക് പോസ്റ്റില് പറയുന്നു.