പാലക്കാട്  : ജില്ലയിലെ ഏറ്റവും പ്രധാനപ്പെട്ട ആശുപത്രിയായ ജില്ലാ ആശുപത്രിയെ 2028 ഓടെ പൂർണ്ണ സജ്ജമാക്കുമെന്ന് ആരോഗ്യ വകുപ്പ് മന്ത്രി കെ മുരളീധരൻ.  ജില്ലാ ആശുപത്രി സന്ദർശനവും കിഫ്ബി പദ്ധതികളുടെ അവലോകനവും നിർവഹിച്ച് സംസാരിക്കുകയായിരുന്നു മന്ത്രി.  അടുത്ത നവംബറിൽ ജില്ലാ ആശുപത്രിയുടെ പുതിയ കെട്ടിടത്തിന്റെ നിർമ്മാണം പൂർത്തിയാക്കും.  ഇൻകെല്ല് ഏറ്റെടുത്ത പ്രവൃത്തികൾ 18 മാസത്തിനകം പൂർത്തിയാക്കുമെന്നും മന്ത്രി അറിയിച്ചു.
 
ജില്ലാ ആശുപത്രിയിൽ നിലവിലുള്ള ഒഴിവുകൾ വേഗത്തിൽ നികത്താനുള്ള നടപടികൾ സ്വീകരിക്കും. നിലവിലുള്ള പ്രവൃത്തികൾ പൂർത്തിയാകുന്നതോടെ ആശുപത്രിയുടെ സൗകര്യങ്ങളിൽ വലിയ മാറ്റമുണ്ടാകുമെന്ന് മന്ത്രി യോഗത്തിൽ വിലയിരുത്തി. നിലവിലുള്ള ഫണ്ടുകളോടൊപ്പം എം പി ഫണ്ടും, എം എൽ എ ഫണ്ടും ആശുപത്രി വികസനത്തിനായി ഉപയോഗിക്കുന്നത് പരിഗണിക്കണമെന്നും, ചില വിദേശ കമ്പനികൾ സ്വകാര്യ ആശുപത്രികളെ വിലക്കെടുക്കുകയും സർക്കാർ ആശുപത്രികൾ മോശമെന്ന് ചിത്രീകരിക്കുന്ന പ്രവണത ശ്രദ്ധയിൽപ്പെട്ടിട്ടുണ്ടെന്നും മന്ത്രി യോഗത്തിൽ സൂചിപ്പിച്ചു.

ജില്ലാ ആശുപത്രി കോൺഫറൻസ് ഹാളിൽ നടന്ന യോഗത്തിൽ രമേഷ് പിഷാരടി എം എൽ എ, ജില്ലാ പഞ്ചായത്ത് ആക്ടിങ് പ്രസിഡന്റ് എൻ സരിത, ജില്ലാ പഞ്ചായത്ത് ആരോഗ്യ വിദ്യാഭ്യാസ സ്റ്റാൻഡിങ് കമ്മിറ്റി ചെയർപേഴ്‌സൺ എ കെ ഷീലാദേവി, ഡി എം ഒ ഡോ. കെ ബിന്ദു തോമസ്, സൂപ്രണ്ട് ഇൻചാർജ് ഡോ കെ പി അഹമ്മദ് അഫ്‌സൽ തുടങ്ങിയവർ പങ്കെടുത്തു.