കൊല്ലം :  സമൂഹത്തിൽ വർധിച്ചുവരുന്ന ആത്മഹത്യാപ്രവണത തടയാൻ കുടുംബബന്ധങ്ങൾ കൂടുതൽ ദൃഢമാക്കണമെന്ന് ആരോഗ്യ മന്ത്രി കെ മുരളീധരൻ. ലോക ആത്മഹത്യാ പ്രതിരോധ ദിനാചരണത്തിന്റെ സംസ്ഥാനതല ഉദ്ഘാടനം കൊല്ലം മെഡിക്കൽ കോളേജിൽ നിർവഹിക്കുകയായിരുന്നു മന്ത്രി. യുവാക്കൾക്കിടയിലും ഐ ടി മേഖലയിലടക്കം ജോലി ചെയ്യുന്നവരിലും വിഷാദവും ആത്മഹത്യാ പ്രവണതയും വർധിക്കുന്നത് ആശങ്കാജനകമാണ്. മാതാപിതാക്കളും മക്കളും തുറന്ന് സംസാരിക്കാനും വിഷമങ്ങൾ പങ്കുവെക്കാനും സമയം കണ്ടെത്തണം. 'ഡിന്നർ വിത്ത് പേരന്റ്‌സ്' പോലുള്ള ആശയങ്ങൾ കുടുംബങ്ങളിൽ പ്രാവർത്തികമാക്കണമെന്നും മന്ത്രി പറഞ്ഞു. ആത്മഹത്യാ പ്രതിരോധത്തിനായി ആരോഗ്യവകുപ്പിന്റെ നേതൃത്വത്തിൽ ബോധവത്ക്കരണവും ഇടപെടലുകളും ശക്തമാക്കും. ഇതിനായി സമൂഹമാകെ ഒരുമിച്ച് പ്രവർത്തിക്കണമെന്നും മന്ത്രി കൂട്ടിച്ചേർത്തു.

 സംസ്ഥാനത്തെ മെഡിക്കൽ കോളേജുകളെ രാജ്യത്തെ മികച്ച സ്ഥാപനങ്ങളാക്കി മാറ്റുകയാണ് സർക്കാരിന്റെ ലക്ഷ്യം. കാലഹരണപ്പെട്ട സ്റ്റാഫ് പാറ്റേൺ   പരിഷ്‌കരിക്കും. 24 മണിക്കൂർ പ്രവർത്തിക്കുന്ന അത്യാഹിത വിഭാഗത്തിലേക്കുള്ള ഡോക്ടർമാരുടെ ഒഴിവുകൾ നികത്തുമെന്നും മന്ത്രി പറഞ്ഞു.  

 മെഡിക്കൽ കോളേജിന്റെ മുഴുവൻ ഭൂമിയും മാസ്റ്റർ പ്ലാൻ തയ്യാറാക്കി വികസനത്തിനായി പ്രയോജനപ്പെടുത്തുമെന്നും മന്ത്രി പറഞ്ഞു. ബി ബി ഗോപകുമാർ എം എൽ എ അധ്യക്ഷത വഹിച്ചു. എൻ കെ പ്രേമചന്ദ്രൻ എം പി, ജില്ലാ പഞ്ചായത്ത് പ്രസിഡന്റ് ഡോ ലതാദേവി, ജില്ലാകലക്ടർ ആനി ജൂല തോമസ്, മെഡിക്കൽ വിദ്യാഭ്യാസ ഡയറക്ടർ ഡോ വിശ്വനാഥൻ കെ വി, സ്റ്റേറ്റ് ചീഫ് ലെയ്‌സൺ ഓഫീസർ ഡോ. ഷാജഹാൻ പി എസ്, ജില്ലാ മെഡിക്കൽ ഓഫീസർ ഡോ ഷീജ എ എൽ, മെഡിക്കൽ കോളേജ് പ്രിൻസിപ്പൾ ഡോ. ഇന്ദു പി എസ്, സൂപ്രണ്ട് ഡോ. ആശ കെ എസ്   തുടങ്ങിയവർ പങ്കെടുത്തു.