കാസർ​ഗോഡ് : അറുപത് വർഷത്തിനിപ്പുറം മഞ്ചേശ്വരത്തിന്റെ ആരോഗ്യ മേഖല കണ്ട ഏറ്റവും വലിയ നിർമിതികൾക്കാണ് മഞ്ചേശ്വരത്തിലെ ജനത സാക്ഷ്യം വഹിക്കുന്നതെന്ന് ആരോഗ്യ വനിതാ ശിശു വികസന വകുപ്പ് മന്ത്രി വീണജോർജ് പറഞ്ഞു.  മഞ്ചേശ്വരം ബ്ലോക്ക് കുടുംബാരോഗ്യ കേന്ദ്രത്തിന്റെ ഉദ്ഘാടനവും കുടുംബാരോഗ്യ കേന്ദ്രത്തിന് അനുബന്ധമായി നിർമ്മിക്കുന്ന രണ്ട് കെട്ടിടങ്ങളുടെ പ്രവൃത്തി ഉദ്ഘാടനവും വീഡിയോ കോൺഫറൻസ് വഴി ഉദ്ഘാടനം ചെയ്ത് സംസാരിക്കുകയായിരുന്നു മന്ത്രി.

36 ലക്ഷം രൂപയാണ് ബ്ലോക്ക് പഞ്ചായത്തിന്റെ പരിധിയിൽ ഉണ്ടായിരുന്ന സാമൂഹിക ആരോഗ്യ കേന്ദ്രത്തെ കുടുംബാരോഗ്യ കേന്ദ്രമായി ഉയർത്തിയ പദ്ധതിക്ക് ചെലവ് വന്നത്. സംസ്ഥാന സർക്കാരിന്റെ പദ്ധതി വിഹിതവും  ദേശീയ ആരോഗ്യ ദൗത്യം ആർദ്രം പദ്ധതിയും സംയുക്തമായാണ് പദ്ധതി പൂർത്തീകരിച്ചത്. എച്ച്.എൽ.എൽ ലൈഫ് കെയർ ലിമിറ്റഡ് ആയിരുന്നു നിർമ്മാണ ചുമതല. ആർദ്രം നിലവാരത്തിൽ നിലവിലുള്ള കെട്ടിടത്തിൽ കാത്തിരിപ്പ് മുറികൾ, രജിസ്‌ട്രേഷൻ കൗണ്ടറുകൾ, രോഗീസൗഹൃദ ശുചിമുറികൾ, സ്ത്രീകൾക്കും പുരുഷന്മാർക്കും പ്രത്യേക ശുചിമുറികൾ, ഭിന്നശേഷിക്കാർക്ക് ഉപയോഗിക്കുന്നതിനായി റാംപ് നിർമ്മാണം, പ്രീ-ചെക്കപ്പ്, കൗൺസിലിംഗ് സംവിധാനം, രോഗിയുടെ സ്വകാര്യത ഉറപ്പുവരുത്തുന്നതിനാവശ്യമായ പരിശോധന മുറികൾ, ഇൻജക്ഷന്റൂം, ഡ്രസ്സിംഗ് റൂം, ഒബ്സർവേഷൻ റൂം, നഴ്സസ് സ്റ്റേഷൻ, ലാബ്, ഫാർമസി, ലാബ് വെയിറ്റിംഗ് ഏരിയ, ഇമ്മ്യൂണൈസേഷൻ മുറി, കാത്തിരിപ്പു മുറികൾ തുടങ്ങിയവ നിർമ്മിച്ചിട്ടുണ്ട്.

ബ്ലോക്ക് കുടുംബാരോഗ്യ കേന്ദ്രത്തിന് അനുബന്ധമായി നിർമ്മിക്കുന്ന രണ്ട് പുതിയ കെട്ടിടങ്ങളുടെ പ്രവൃത്തി ഉദ്ഘാടനവും മന്ത്രി നിർവഹിച്ചു. കുടുംബാരോഗ്യകേന്ദ്രത്തിനു പുതിയകെട്ടിട നിർമ്മിക്കുന്നതിനായി  ദേശീയ ആരോഗ്യ ദൗത്യം, കാസർകോട്  വികസന പാക്കേജ് പ്ലാൻ ഫണ്ട് എന്നിവയിലൂടെ 8.58 രണ്ടു കോടിരൂപയുടെ അനുമതി ലഭിച്ചു. ദേശീയ ആരോഗ്യ ദൗത്യം നാല് കോടി 74 ലക്ഷം രൂപയുടെയും കാസർകോട് വികസന പാക്കേജിലൂടെ മൂന്നു കോടി 84 ലക്ഷം രൂപയുടെയും പ്രവർത്തികൾക്കാണ് അനുമതി ലഭിച്ചത്. ഈ  രണ്ടുപ്രവൃത്തികളും ഒരേസമയം പൂർത്തിയാവുന്ന രീതിയിലും ആർദ്രം നിലവാരത്തിലുള്ള എല്ലാ സൗകര്യങ്ങൾ ഉൾപ്പെടുന്ന 26300 സ്‌ക്വയർ ഫീറ്റ് വിസ്തീർണമുള്ള ഒറ്റ കെട്ടിടമായിട്ടാണ് പദ്ധതികൾ വിഭാവനം ചെയ്തിട്ടുള്ളത്.

ആറ് ഓപി റൂമുകൾ, രജിസ്‌ട്രേഷൻ കൗണ്ടർ,വെയ്റ്റിംഗ് ഏരിയ, പ്രീചെക് റും, നഴ്‌സിംഗ് സ്റ്റേഷൻ, മൈനർ ഓപ്പറേഷൻ തീയറ്റർ ഫീഡിങ് റൂം,ഓഫീസ്, ഡെന്റൽ ഒപി,കോൺഫറൻസ് ഹാൾ,ഫർമസി, ലബോറട്ടറി,ഫർമസി ലബോറട്ടറി എന്നിവക്കുള്ള വെയ്റ്റിംഗ് ഏരിയ, ഫിസിയോതെറാപ്പി, ഇമ്മ്യൂണൈസേഷൻ, പബ്ലിക് ഹെൽത്ത് ടീം റൂം 30 ഓളം ബെഡുള്ള വാർഡുകൾ, മൂന്ന് ലിഫ്റ്റ് തുടങ്ങിയ സൗകര്യങ്ങൾ ഉൾപ്പെടുത്തിയിട്ടുണ്ട്. കൂടാതെ ഭാവിയിൽ ഡയാലിസിസ് സൗകര്യമുൾക്കൊളിക്കാവുന്ന വിധത്തിലാണ് കെട്ടിടം വിഭാവനം ചെയ്തിരിക്കുന്നത്.

ചടങ്ങിൽ എ.കെ.എം അഷ്റഫ് എം.എൽ.എ അധ്യക്ഷത വഹിച്ചു. ആതുര സേവനരംഗത്ത് നിരവധി സംഭാവനകൾ നൽകിയ മഞ്ചേശ്വരത്തെ ജനകിയ ഡോക്ടറും കലാകാരനും എഴുത്തുക്കാരനുമായ കെ. രാമാനന്ദ ബാനാരിയെ ചടങ്ങിൽ ആദരിച്ചു. മഞ്ചേശ്വരം ഗ്രാമപഞ്ചായത്ത് പ്രസിഡന്റ് ജീൻ ലാവിനാ മാന്താരോ, മഞ്ചേശ്വരം ബ്ലോക്ക് പഞ്ചായത്ത് വൈസ് പ്രസിഡന്റ് പി.കെ മുഹമ്മദ് ഹനീഫ്, ജില്ല പഞ്ചായത്ത് മെമ്പർ ഗോൾഡൻ അബ്ദുൽ റഹിമാൻ, സ്ഥിരം സമിതി ചെയർപേഴ്‌സൺമാരായ അബ്ദുൽ ഹമീദ്, സരോജ ആർ ബല്ലാൽ, സുപ്രിയ ഷേണായി, പിഡബ്ല്യുഡി എക്‌സിക്യൂട്ടീവ് എൻജിനീയർ എം ജഗദീഷ്, ദേശീയ ആരോഗ്യ ദൗത്യം എൻജിനീയർ നിതിൻ,  ബ്ലോക്ക് പഞ്ചായത്ത് മെമ്പർമാരായ ഷഫാ ഫറോക്ക്,  മൊയ്തീൻ കുഞ്ഞ്, എം.എൽ അശ്വിനി, അനിൽകുമാർ, എം.ചന്ദ്രാവതി,  ഫാത്തിമത്ത് സുഹറ, കെ.അശോക, കെ.വി രാധാകൃഷ്ണ, വിവിധ രാഷ്ട്രീയ പാർട്ടി പ്രതിനിധികൾ എന്നിവർ സംസാരിച്ചു. മഞ്ചേശ്വരം ബ്ലോക്ക് പഞ്ചായത്ത് പ്രസിഡന്റ് ഷമീന ടീച്ചർ സ്വാഗതവും മഞ്ചേശ്വരം കുടുംബാരോഗ്യ കേന്ദ്രം മെഡിക്കൽ ഓഫീസർ പ്രഭാകര റായ് നന്ദിയും പറഞ്ഞു.