തളിപ്പറമ്പ് : പുഴക്കുളങ്ങര സര്‍വ്വേ നമ്പര്‍ 4ല്‍ ഭൂ നികുതി സ്വീകരിക്കാത്തതിൽ പ്രതിസന്ധിയിലായി 20ൽപ്പരം കുടുംബങ്ങൾ. ഡിജിറ്റൽ റീ സർവ്വേക്ക് ശേഷമാണ് നാല് പതിറ്റാണ്ടുകളായി കൈവശം വെക്കുന്ന പട്ടയഭൂമിക്ക് ഈ വര്‍ഷം മുതല്‍ നികുതി അടക്കാന്‍ സാധിക്കാത്ത സ്ഥിതിവിശേഷം സംജാതമായിരിക്കുന്നത്.1984 ലാണ് മിച്ചഭൂമി പതിച്ച്നൽകിയത്. ഇക്കഴിഞ്ഞ മെയ് മാസംവരെ വില്ലേജ് ഓഫീസുകളിൽ നിന്ന് ഭൂനികുതി സ്വീകരിച്ചിട്ടുണ്ട്. അതിനുശേഷമാണ് നികുതി അടക്കാൻ സാധിക്കാത്ത സ്ഥിതിയുള്ളത്. 32 പ്ലോട്ടുകളിലായി 20 കുടുംബങ്ങളാണ് ഈ പ്രദേശത്ത് ഇപ്പോൾ താമസിക്കുന്നത്. പലരും നിയമപ്രകാരം പിന്നീട് വിലകൊടുത്ത് വാങ്ങിയവരുമാണ്. ഡിജിറ്റൽ റീസർവ്വേക്ക് ശേഷം ഈ പ്ലോട്ടുകളെല്ലാം ചേർന്ന് ഒറ്റപ്ലോട്ടായാണ് സൈറ്റിൽ രേഖപ്പെടുത്തിയിട്ടുള്ളത്. ഉദ്യോ​ഗസ്ഥവീഴ്ചയുടെ പരിണിതഫലമായുണ്ടായ പ്രശ്നത്തിന് പരിഹാരം കാണാതെ വില്ലേജ് ഓഫീസിലെയും റീസർവ്വേ ഓഫീസിലെയും ജീവനക്കാർ കൈമലർത്തുന്ന സ്ഥിതിയാണുള്ളത്.

സങ്കീർണ്ണമായ പുഴക്കുളങ്ങര ഭൂപ്രശ്നത്തിന് പരിഹാരം കാണുന്നതിന് വേണ്ടി സി.പി.ഐ എം പുഴക്കുളങ്ങര ബ്രാഞ്ചും കർഷകത്തൊഴിലാളി യൂണിയനും ചേർന്ന് വിളിച്ചുചേർത്ത ഭൂ ഉടമകളുടെ യോ​ഗത്തിൽ വെച്ച് ആക്ഷൻ കമ്മിറ്റിക്ക് രൂപം നൽകി. യോ​ഗത്തിൽ കർഷകത്തൊഴിലാളി യൂണിയൻ തളിപ്പറമ്പ് ഏരിയാ സെക്രട്ടറി ടി.ബാലകൃഷ്ണൻ സി.പി.ഐ എം തളിപ്പറമ്പ് നോർത്ത് ലോക്കൽ സെക്രട്ടറി കെ.ബിജുമോൻ, എം.വി.രാഘവൻ, വി.വി.കുഞ്ഞിരാമൻ, പി.സുമേഷ്, പി.​ഗോകുൽ സംസാരിച്ചു.