കണ്ണൂർ : കണ്ണൂർസിറ്റി പൊലീസ് കമ്മിഷണർക്കുവേണ്ടി അഡീഷനൽ എസ്പി പുറത്തിറക്കിയ ഒരു സർക്കുലർ ഉദ്യോഗസ്ഥർക്കിടയിൽ വിവാദമാകുന്നു. സാധാരണയായി ക്രമസമാധാന പാലനത്തിലും കുറ്റകൃത്യങ്ങൾ തടയുന്നതിലും ശ്രദ്ധ കേന്ദ്രീകരിക്കുന്ന പൊലീസ്, കാലിത്തീറ്റ കൃഷിക്കായി അനുയോജ്യമായ സ്ഥലം കണ്ടെത്തണമെന്ന വിചിത്രമായ നിർദേശമാണ് അഡീഷനൽ സൂപ്രണ്ട് ഓഫ് പൊലിസ് സജേഷ് വാഴാളപ്പിൽ സ്റ്റേഷനുകളിലേക്ക്നൽകിയിരിക്കുന്നത്. എന്നാൽ കണ്ണൂർ സിറ്റി പൊലിസ് കമ്മിഷണറുടെ നിർദ്ദേശപ്രകാരമാണ് സർക്കുലർ ഇറക്കിയതെന്നാണ് വിവരം.

കണ്ണൂർജില്ലാ വികസന സമിതി യോഗത്തിന്റെ നടപടിക്രമങ്ങൾ അനുസരിച്ചാണ് ഈ സർക്കുലർ പുറത്തിറങ്ങിയതെന്നാണ് പൊലിസ്വിശദീകരണം. കാലിത്തീറ്റയിൽ സ്വയംപര്യാപ്തത ഉറപ്പാക്കുകയെന്ന ലക്ഷ്യത്തോടെയാണ് ഈ നിർദേശം നൽകിയിട്ടുള്ളതെന്നാണ് വിവരം. എന്നാൽ തങ്ങളുടെ പ്രധാന ജോലികൾക്ക് പുറമെ മറ്റ് വകുപ്പുകൾ ചെയ്യേണ്ട ജോലികൾ കൂടി തങ്ങളെ ഏൽപ്പിച്ചതിൽ പൊലീസുകാർക്കിടയിൽ വലിയ പ്രതിഷേധം ഉയർന്നിട്ടുണ്ട്.

ഇതിനോടകം തന്നെ ജോലിയുടെ ഭാരം കാരണം ബുദ്ധിമുട്ടുന്ന പൊലീസ് സേനക്ക് ഇത്തരം അധിക ഉത്തരവാദിത്തങ്ങൾ വലിയ തലവേദനയായി മാറിയിരിക്കുകയാണ്. ഒരു സാധാരണ പൊലീസ് ഉദ്യോഗസ്ഥന്റെ പ്രധാന ഉത്തരവാദിത്തങ്ങൾ കുറ്റകൃത്യങ്ങളെക്കുറിച്ചുള്ള അന്വേഷണം, സുരക്ഷാ ക്രമീകരണങ്ങൾ, ക്രമസമാധാനം പാലിക്കൽ എന്നിവയാണ്. ഇങ്ങനെയൊരു സാഹചര്യത്തിൽ കാലിത്തീറ്റ കൃഷിക്ക് അനുയോജ്യമായ സ്ഥലം കണ്ടെത്താൻ ആവശ്യപ്പെടുന്നത് അപ്രതീക്ഷിതവും അസാധാരണവുമാണ്.പൊലീസ് സേനയുടെ പ്രധാന ലക്ഷ്യങ്ങളിൽ നിന്ന് വ്യതിചലിക്കുന്ന ഇത്തരം ഉത്തരവുകൾ അവരുടെ കാര്യക്ഷമതയെ ബാധിക്കുമെന്ന ആശങ്കയും ഉയർന്നിട്ടുണ്ട്. മറ്റ് വകുപ്പുകളുടെ ചുമതലകൾ പൊലീസിനെ ഏൽപ്പിക്കുന്നത് ശരിയായ നടപടിയാണോയെന്ന ചോദ്യവും നിലവിൽ വ്യാപകമായി ചർച്ച ചെയ്യപ്പെടുന്നുണ്ട്. എന്നാൽ എല്ലാ വകുപ്പുകളിലേക്കും സാധാരണയായി അയക്കുന്ന സർക്കുലറാണ് ഇതെന്നാണ് ജില്ലാ ഭരണകൂടത്തിൻ്റെ വിശദീകരണം.