കരിവെള്ളൂർ: തെരഞ്ഞെടുപ്പ് ചൂടിനിടെയിലും സൗഹൃദം കൈവിടാതെ സ്ഥാനാർത്ഥി തൃക്കരിപ്പൂർ ഗ്രാമപഞ്ചായത്ത് ഏഴാം വാർഡായ കൊയോങ്കരയിലെ എൽ.ഡി.എഫ്. സ്ഥാനാർത്ഥി കെ.വി.രമേശൻ വോട്ടർമാരെ നേരിട്ട് കാണലും പ്രചരണ യോഗങ്ങളുമൊക്കെയായി ഏറെ തിരക്കിലാണെങ്കിലും പ്രിയ സുഹൃത്ത് കരിവെള്ളൂർ പെരളം ഗ്രാമപഞ്ചായത്ത് 13-ാം വാർഡിലെ എൽ.ഡി. എഫ്.സ്ഥാനാർത്ഥി എ.വേണു മാസ്റ്റർക്കു വേണ്ടി ചുമരെഴുതാനും സമയം കണ്ടെത്തി. കുണിയൻ കിഴക്കേക്കരയിലെ രമേശന്റെ ഭാര്യ വീടിന് തൊട്ടടുത്താണ് വേണു മാസ്റ്ററുടെ വീട്. 

ദീർഘകാലമായുള്ള ഈ സുഹൃദ് ബന്ധത്തിന്റെ ദൃഢത മൂലമാണ് സ്വന്തം പ്രചാരണത്തിരക്കിനിടയിലും രമേശൻ കുറച്ച് സമയം വേണു മാസ്റ്റർക്കായി നീക്കിവെച്ചത്.മുൻ തെരഞ്ഞെടുപ്പുകളിലും കുണിയൻ കിഴക്കേക്കരയിലെ തെരഞ്ഞെടുപ്പ് ചുമരെഴുത്തുകളിൽ രമേശൻ സജീവമായി പങ്കെടുത്തിരുന്നു. ഇത്തവണത്തെ ചുവരെഴുത്ത് തൻ്റെ പാർട്ടിക്കാരനായ സ്ഥാനാർത്ഥിയായപ്രിയ സുഹൃത്തിനു വേണ്ടിയാണെന്നതിൽ ഏറെ സന്തോഷത്തിലാണ് രമേശൻ.