അറുപതിലേറെ പേർ പീഡനത്തിനിരയാക്കിയെന്ന പെൺകുട്ടിയുടെ വെളിപ്പെടുത്തൽ ; പത്തനംതിട്ട ജനറൽ ആശുപത്രിയിലും കൂട്ടബലാത്സംഗം
അറുപതിലേറെ പേർ പീഡനത്തിനിരയാക്കിയെന്ന ദലിത് പെൺകുട്ടിയുടെ വെളിപ്പെടുത്തലിൽ പത്തനംതിട്ട ജനറൽ ആശുപത്രിയിൽ കൂട്ടബലാത്സംഗത്തിന് ഇരയാക്കിയെന്ന വിവരവും. കഴിഞ്ഞ വർഷം ജനുവരിയിൽ നടന്ന സംഭവത്തിൽ നാലു പ്രതികളാണുള്ളത്. കുട്ടിയുടെ വെളിപ്പെടുത്തലുകളിൽ അന്വേഷണത്തിന് എഡിജിപി പ്രത്യേക സംഘത്തെ നിയമിച്ചു
കേസിൽ ഇതുവരെ 27 പേർ അറസ്റ്റിലായി. ഇതിൽ 4 പേർ പ്രായപൂർത്തിയാകാത്തവരാണ്.
പത്തനംതിട്ട; അറുപതിലേറെ പേർ പീഡനത്തിനിരയാക്കിയെന്ന ദലിത് പെൺകുട്ടിയുടെ വെളിപ്പെടുത്തലിൽ പത്തനംതിട്ട ജനറൽ ആശുപത്രിയിൽ കൂട്ടബലാത്സംഗത്തിന് ഇരയാക്കിയെന്ന വിവരവും. കഴിഞ്ഞ വർഷം ജനുവരിയിൽ നടന്ന സംഭവത്തിൽ നാലു പ്രതികളാണുള്ളത്. കുട്ടിയുടെ വെളിപ്പെടുത്തലുകളിൽ അന്വേഷണത്തിന് എഡിജിപി പ്രത്യേക സംഘത്തെ നിയമിച്ചു. തിരുവനന്തപുരം റേഞ്ച് ഡിഐജി അജിതാ ബീഗം മേൽനോട്ടം വഹിക്കും. ജില്ലാ പൊലീസ് മേധാവി വി.ജി.വിനോദ്കുമാറിന്റെ നേതൃത്വത്തിൽ 25 അംഗ പ്രത്യേക സംഘം കേസ് അന്വേഷിക്കും.
കേസിൽ ഇതുവരെ 27 പേർ അറസ്റ്റിലായി. ഇതിൽ 4 പേർ പ്രായപൂർത്തിയാകാത്തവരാണ്. അന്വേഷണപുരോഗതി ദിവസവും ജില്ലാ പൊലീസ് മേധാവി നേരിട്ട് വിലയിരുത്തും. ശാസ്ത്രീയ തെളിവുകൾ അടക്കം ശേഖരിക്കുന്നുണ്ടെന്നും മൊബൈൽ ഫോണുകളും മറ്റും പരിശോധിച്ച് വിശദമായ അന്വേഷണം തുടരുകയാണെന്നും ജില്ലാ പൊലീസ് മേധാവി അറിയിച്ചു.
കുട്ടിയുടെ മൊഴിയുടെ അടിസ്ഥാനത്തിൽ ഞായറാഴ്ച മാത്രം 10 പുതിയ കേസുകൾ റജിസ്റ്റർ ചെയ്തു. ഇതോടെ ആകെ കേസുകളുടെ എണ്ണം 18 ആയി. വിവിധ കേസുകളിലായി ഞായറാഴ്ച 12 പ്രതികളെ റിമാൻഡ് ചെയ്തു. ഞായറാഴ്ച പെൺകുട്ടിയുടെ മൊഴി രേഖപ്പെടുത്തിയില്ല. പത്തനംതിട്ട സ്വകാര്യ ബസ് സ്റ്റാൻഡ് കേന്ദ്രീകരിച്ചാണു പ്രതികളിൽ പലരെയും കുട്ടി പരിചയപ്പെട്ടതെന്നും ഇവിടെ നിന്നാണു വാഹനങ്ങളിൽ കൊണ്ടുപോയി പീഡനത്തിനു വിധേയയാക്കിയതെന്നും അന്വേഷണത്തിൽ വ്യക്തമായി.
ഇലവുംതിട്ട പൊലീസ് സ്റ്റേഷനിൽ ഞായറാഴ്ച 9 കേസുകൾ റജിസ്റ്റർ ചെയ്തു. പത്തനംതിട്ടയിൽ ഞായറാഴ്ച റജിസ്റ്റർ ചെയ്ത കേസിൽ ഒരു പ്രതി ലിജോ (26) പിടിയിലായി∙ പ്ലസ്ടുവിൽ പഠിക്കുമ്പോൾ ഇൻസ്റ്റഗ്രാം വഴി പരിചയപ്പെട്ട ദീപു എന്നയാളും സുഹൃത്തുക്കളും റാന്നി മന്ദിരംപടിക്കു സമീപം കാറിൽ വച്ച് പീഡിപ്പിച്ച കേസിൽ 6 പേരെ കഴിഞ്ഞ ദിവസം അറസ്റ്റു ചെയ്തിരുന്നു. പത്തനംതിട്ട സ്വകാര്യ ബസ് സ്റ്റാൻഡിൽ ഫെബ്രുവരിയിൽ ഒരു ദിവസം നേരിൽ കാണാൻ ആഗ്രഹം പ്രകടിപ്പിച്ച കുട്ടിയെ ദീപു വിളിച്ചുവരുത്തി കാറിൽ രണ്ടു കൂട്ടുകാർക്കൊപ്പം കയറ്റിക്കൊണ്ടുപോകുകയായിരുന്നു. അവർ മൂവരും, തുടർന്ന് ഓട്ടോറിക്ഷയിൽ എത്തിയ മറ്റു മൂന്നു പ്രതികളും പീഡിപ്പിച്ചു.
പത്തനംതിട്ട സ്വകാര്യ ബസ് സ്റ്റാൻഡിൽനിന്നു കാറിൽ കടത്തിക്കൊണ്ടുപോയി തോട്ടുപുറത്തെ പൂട്ടിയിട്ട കടയുടെ സമീപത്ത് കാറിൽ വച്ച് രണ്ടുപേർ പീഡിപ്പിച്ചതായും വിദ്യാർഥിനി മൊഴി നൽകി. പീഡിപ്പിച്ചശേഷം ഇവർ വീടിനരികിൽ ഇറക്കിവിട്ടതായും പറയുന്നു. കഴിഞ്ഞവർഷം ജൂലൈയിലാണ് സംഭവം.