തദ്ദേശ തെരഞ്ഞെടുപ്പ് വോട്ടെടുപ്പ് എങ്ങനെ: കന്നി വോട്ടർമാർ അറിയേണ്ടത്

Whatsapp Group

വോട്ടർ താൻ വോട്ട് ചെയ്യാൻ ആഗ്രഹിക്കുന്ന സ്ഥാനാർത്ഥിയുടെ പേരിന് നേരെയുള്ള സ്ഥാനാർത്ഥി ബട്ടൺ അമർത്തണം. ആഗ്രഹിക്കുന്ന സ്ഥാനാർത്ഥിയുടെ ബട്ടൺ അമർത്തുമ്പോൾ, ഒരു ചെറിയ ബീപ്പ് ശബ്ദം കേൾക്കാം, ആ സ്ഥാനാർത്ഥി ബട്ടണിന് നേരെയുള്ള ഇൻഡിക്കേറ്റർ ലൈറ്റ് പ്രകാശിക്കുകയും വോട്ട് ആവശ്യമുള്ള സ്ഥാനാർത്ഥിക്ക് അനുകൂലമായി രേഖപ്പെടുത്തിയിട്ടുണ്ടെന്ന് സ്ഥിരീകരിക്കുകയും ചെയ്യും. ഗ്രാമപഞ്ചായത്തിന് വെള്ള നിറവും ബ്ലോക്ക് പഞ്ചായത്തിന്റെ ബാലറ്റ് ലേബലുകൾ പിങ്ക് നിറത്തിലും ജില്ലാ പഞ്ചായത്തിന്റെ ബാലറ്റ് ലേബലുകൾ ആകാശനീല നിറത്തിലുമായിരിക്കും. മൂന്ന് നിരകളിലേക്കും വോട്ടെടുപ്പ് ശരിയായ രീതിയിൽ പൂർത്തിയാകുമ്പോൾ, പ്രക്രിയ പൂർത്തിയായി എന്നറിയിച്ച് ഒരു നീണ്ട ബീപ്പ് ശബ്ദം കേൾക്കാം. 

വോട്ടർ ഒന്നോ രണ്ടോ ലെവലുകളിലേക്ക് വോട്ട് ചെയ്യുന്നത് ഒഴിവാക്കാൻ ആഗ്രഹിക്കുന്നുവെങ്കിൽ, അവസാനത്തെ ബാലറ്റ് യൂണിറ്റിലെ ചുവപ്പ് നിറത്തിലുള്ള എൻഡ് ബട്ടൺ അമർത്തി വോട്ടിംഗ് പ്രക്രിയ പൂർത്തിയാക്കണം. എൻഡ് ബട്ടൺ അമർത്തുമ്പോൾ, പ്രക്രിയ പൂർത്തിയായതിന്റെ നീണ്ട ബീപ്പ് ശബ്ദം കേൾക്കും.
ഒന്നോ, രണ്ടോ ലെവലുകൾ ഒഴിവാക്കിയാണ് വോട്ട് ചെയ്യുന്നതെങ്കിൽ മാത്രമേ എൻഡ് ബട്ടൺ ഉപയോഗിക്കാവൂ. മൂന്ന് തലങ്ങളിലേക്കും വോട്ടെടുപ്പ് പൂർത്തിയായിട്ടുണ്ടെങ്കിൽ ഇതിന്റെ ആവശ്യമില്ല. വോട്ടർ ഒരിക്കൽ എൻഡ് ബട്ടൺ അമർത്തിയാൽ, അയാൾക്ക് പിന്നീട് ഒരു ലെവലിലേക്കും വോട്ട് ചെയ്യാൻ കഴിയില്ല. രണ്ട് ബട്ടണുകൾ ഒരേ സമയം അമർത്തിയാൽ ഒരു വോട്ട് മാത്രമേ രേഖപ്പെടുത്തൂ. അതുപോലെ, ഒരു ബട്ടൺ ഒന്നിലധികം തവണ അമർത്തിയാൽ പോലും ഒരു വോട്ട് മാത്രമേ രേഖപ്പെടുത്തൂ.

വോട്ടെടുപ്പിന്റെ രഹസ്യം കാത്തുസൂക്ഷിക്കാൻ വോട്ടർ ബാധ്യസ്ഥനാണ്. വോട്ടിങ് നടപടിക്രമത്തെക്കുറിച്ച് ഒരു വോട്ടർക്ക് എന്തെങ്കിലും ബുദ്ധിമുട്ട് അനുഭവപ്പെടുകയോ സംശയം തോന്നുകയോ ചെയ്താൽ, വോട്ടറെ സഹായിക്കാൻ ബാധ്യസ്ഥരായ പോളിങ് ഉദ്യോഗസ്ഥരുമായി അക്കാര്യം പങ്കുവയ്ക്കണം. വോട്ടെടുപ്പ് പൂർത്തിയായ ഉടൻ തന്നെ, അടുത്ത വോട്ടർക്ക് വോട്ട് ചെയ്യുന്നതിനായി കമ്പാർട്ടുമെന്റിലേക്ക് പ്രവേശിക്കാൻ കഴിയുന്നതിനായി വോട്ടർ കമ്പാർട്ടുമെന്റിൽ നിന്ന് മാറി നിൽക്കണം.

വോട്ടറുടെ ഐഡന്റിറ്റി തെളിയിക്കുന്നതിനുള്ള രേഖകൾ

തദ്ദേശ സ്വയംഭരണ സ്ഥാപനങ്ങളിലേക്കുള്ള ഏതൊരു തെരഞ്ഞെടുപ്പിലും വോട്ടവകാശം വിനിയോഗിക്കുന്നതിനായി ഒരു വോട്ടർ പോളിംഗ് സ്റ്റേഷനിൽ പ്രവേശിക്കുമ്പോൾ പ്രിസൈഡിംഗ് ഓഫീസറുടെയോ അദ്ദേഹം അധികാരപ്പെടുത്തിയ ഉദ്യോഗസ്ഥന്റെയോ മുമ്പാകെ താഴെപ്പറയുന്ന ഏതെങ്കിലും രേഖകൾ ഹാജരാക്കണം.

1. ഇന്ത്യൻ തെരഞ്ഞടുപ്പ് കമ്മീഷൻ നൽകിയ വോട്ടർ ഐഡി കാർഡ്

2. പാസ്‌പോർട്ട്

3. ഡ്രൈവിംഗ് ലൈസൻസ്

4. പാൻ കാർഡ്

5. ആധാർ കാർഡ്

6. ഫോട്ടോ പതിച്ച എസ്.എസ്.എൽ.സി പുസ്തകം

7. തെരഞ്ഞെടുപ്പ് തീയതിക്ക് കുറഞ്ഞത് ആറു മാസം മുമ്പ് നൽകിയ ഏതെങ്കിലും ദേശസാൽകൃത ബാങ്കിന്റെ ഫോട്ടോ പതിച്ച പാസ്ബുക്ക്.

8. സംസ്ഥാന തെരഞ്ഞെടുപ്പ് കമ്മീഷൻ നൽകുന്ന താത്ക്കാലിക ഐഡി കാർഡ്.