.jpg)
മലയോര ജനതയുടെ സ്വപ്നങ്ങൾ സാക്ഷാത്കരിക്കാൻ സർക്കാറിന് സാധിച്ചു :മന്ത്രി മുഹമ്മദ് റിയാസ്
കോഴിക്കോട് : മലയോര ജനതയുടെ സ്വപ്നങ്ങൾ സാക്ഷാത്കരിക്കാൻ സർക്കാറിന് സാധിച്ചെന്ന് പൊതുമരാമത്ത്-ടൂറിസം വകുപ്പ് മന്ത്രി പി എ മുഹമ്മദ് റിയാസ്. മുക്കം പാലം, മുക്കം നഗരസൗന്ദര്യവത്കരണത്തിന്റെ രണ്ടാം ഘട്ടം എന്നിവയുടെ പ്രവൃത്തി ഓൺലൈനായി ഉദ്ഘാടനം ചെയ്യുകയായിരുന്നു മന്ത്രി. പശ്ചാത്തല വികസനത്തിലെ ഹബ്ബായി കേരളം മാറിയെന്നും അടിസ്ഥാന സൗകര്യ വികസനത്തിൽ കഴിഞ്ഞ ഒമ്പത് വർഷത്തിനിടെ വലിയ കുതിച്ചുചാട്ടമാണ് ഉണ്ടായതെന്നും മന്ത്രി പറഞ്ഞു.
tRootC1469263">എടവണ്ണ-കൊയിലാണ്ടി സംസ്ഥാന പാതയിൽ മുക്കം നഗരത്തോട് ചേർന്ന് 7.25 കോടി രൂപ ചെലവിലാണ് പുതിയ പാലം നിർമിക്കുന്നത്. നഗരസൗന്ദര്യവത്കരണത്തിന്റെ ഒന്നാം ഘട്ടത്തോടനുബന്ധിച്ച് നിർമിച്ച മിനി പാർക്ക് സംരക്ഷിച്ച്, നിലവിലെ പാലം പൊളിക്കാതെയാണ് വലത് വശത്ത് പുതിയ പാലം നിർമിക്കുന്നത്. 26 മീറ്റർ നീളത്തിൽ ഒന്നര മീറ്റർ നടപ്പാതയുൾപ്പെടെ 9 മീറ്റർ വീതിയിലാണ് പുതിയ പാലം നിർമിക്കുക. പഴയ പാലത്തിന്റെ നവീകരണ പ്രവൃത്തികൾക്കും പദ്ധതിയിൽ തുക വകയിരുത്തിയിട്ടുണ്ട്. 18 മാസമാണ് നിർമാണ കാലാവധി.
4.8 കോടി രൂപ ചെലവഴിച്ചാണ് മുക്കം നഗരസൗന്ദര്യവത്കരണത്തിന്റെ രണ്ടാംഘട്ട പ്രവൃത്തി നടത്തുന്നത്. നഗരസഭയുടെ ആസ്തി രജിസ്റ്ററിൽപ്പെടുന്ന എസ്.കെ പാർക്ക് റോഡ്, തൃക്കുടമണ്ണ റോഡ്, ഓർഫനേജ് റോഡ്, മരക്കാർ ഹാജി റോഡ്, ബസ് സ്റ്റാൻഡ് റോഡ്, പുതിയ ബൈപാസ് തുടങ്ങിയ നഗരത്തിലെ മുഴുവൻ റോഡുകളും പ്രവൃത്തിയുടെ ഭാഗമായി നവീകരിക്കും.
ചടങ്ങിൽ ലിന്റോ ജോസഫ് എംഎൽഎ അധ്യക്ഷനായി. റോഡ് നവീകരണത്തിന് സൗജന്യമായി സ്ഥലം വിട്ടു നൽകിയവരെ എംഎൽഎ പൊന്നടയണിയിച്ച് ആദരിച്ചു. പൊതുമരാമത്ത് വകുപ്പ് അസി. എൻജിനീയർ അതുൽ റിപ്പോർട്ട് അവതരിപ്പിച്ചു. നഗരസഭ ചെയർപേഴ്സൺ പി.ടി ബാബു, വൈസ് ചെയർപേഴ്സൺ കെ.പി ചാന്ദ്നി, പ്രജിത പ്രദീപ്, പൊതുമരാമത്ത് സൂപ്രണ്ടിങ് എൻജിനീയർ ഇ.ജി വിശ്വപ്രകാശ് തുടങ്ങിയവർ സംസാരിച്ചു.