.jpg)
പട്ടാഴി പഞ്ചായത്തിൽ മികച്ച വികസന പ്രവർത്തനങ്ങൾ തുടരുന്നു: മന്ത്രി കെ.ബി.ഗണേഷ്കുമാർ
കൊല്ലം : പട്ടാഴി പഞ്ചായത്തിന്റെ നേതൃത്വത്തിൽ മികച്ചനിലയിൽ വികസന പ്രവർത്തനങ്ങൾ തുടരുന്നുവെന്ന് ഗതാഗത വകുപ്പ് മന്ത്രി കെ.ബി.ഗണേഷ്കുമാർ. സുജിൻ ഓഡിറ്റോറിയത്തിൽ പട്ടാഴി ഗ്രാമപഞ്ചായത്ത് വികസനസദസ് ഉദ്ഘാടനം ചെയ്യുകയായിരുന്നു അദ്ദേഹം. സ്മാർട്ട് അംഗനവാടികൾ, റോഡുകൾ, കുടിവെള്ളം തുടങ്ങിയ വികസനപ്രവർത്തനങ്ങൾ ത്വരിതപ്പെടുത്തണമെന്നും മന്ത്രി കൂട്ടിച്ചേർത്തു. വികസന പ്രവർത്തനത്തിൽ പങ്കാളികളായവരെ ആദരിച്ചു.
ഗ്രാമീണ റോഡുകളുടെ നിർമ്മാണത്തിനായി 8.35 കോടി രൂപയും അല്ലാത്തവയ്ക്ക് നിർമ്മാണത്തിനായി 3.75 കോടി രൂപയും നൽകി. ലൈഫ് മിഷൻ പദ്ധതിയിലൂടെ 117 വീടുകൾ നൽകി. കൃഷിയിടങ്ങൾ സംരക്ഷിക്കുന്നതിന്റെ ഭാഗമായി സോളാർ വേലി സ്ഥാപിക്കുന്നതിന് 20 ലക്ഷം രൂപയുടെ പ്രോജക്ട് നടപ്പിലാക്കി. കാർഷിക മേഖലയുടെ ഉന്നമനത്തിനായി 41 പദ്ധതികൾക്കായി 36 ലക്ഷം രൂപ ലഭ്യമാക്കി.
കിഫ്ബി സഹായത്തോടെ ഗ്രാമപഞ്ചായത്തിൽ ഒരുകോടി രൂപയുടെ വാതക ശ്മശാനം ലഭ്യമാക്കി. പട്ടാഴി പി എച്ച് സി ക്ക് ആവശ്യമായ ലാബ് സൗകര്യങ്ങൾ, മരുന്നുകൾ, 12 ലക്ഷം രൂപയുടെ ജനറേറ്റർ ലഭ്യമാക്കി. പട്ടികജാതി വിഭാഗക്കാരുടെ ഉന്നമനത്തിനായി 4.25 കോടി രൂപ ചെലവഴിച്ചു. പദ്ധതി വഴി സ്മാർട്ട് സ്കൂൾ, സ്മാർട്ട് അംഗനവാടികൾക്ക് വേണ്ടി ആറു കോടി രൂപ നൽകി. സമ്പൂർണ്ണ വെളിച്ചം പദ്ധതി വഴി 4000 തെരുവ് വിളക്കുകൾ സ്ഥാപിച്ചു. സംസ്ഥാന സർക്കാറിന്റെ വികസന പ്രവർത്തന റിപ്പോർട്ട് പഞ്ചായത്ത് സെക്രട്ടറി സി.കെ.അജയകുമാർ അവതരിപ്പിച്ചു. പഞ്ചായത്തിന്റെ വികസന പ്രവർത്തന റിപ്പോർട്ട് പഞ്ചായത്ത് സെക്രട്ടറി ഐ.അനിതകുമാരി അവതരിപ്പിച്ചു.
ഹരിതകർമ്മ സേനാംഗങ്ങളെ അധ്യക്ഷനായ ഗ്രാമപഞ്ചായത്ത് പ്രസിഡന്റ് കെ.അശോകൻ ആദരിച്ചു. ജില്ലാ പഞ്ചായത്ത് അംഗം അനന്ദുപിള്ള, സ്ഥിരം സമിതി അംഗങ്ങളായ സജീവ് കല്ലൂർ, ജെയിൻ ജോയ്, പഞ്ചായത്ത് അംഗങ്ങളായ അനി മാത്യു, രമ്യ ബിനു, പഞ്ചായത്ത് വൈസ് പ്രസിഡന്റ് ബെൻസി തോമസ് എന്നിവർ പങ്കെടുത്തു.