യുഡിഎഫ് സ്ഥാനാര്ത്ഥിയുടേയും സ്പോണ്സറിന്റേയും പെരുമാറ്റം ജനം അളക്കുമെന്ന് മന്ത്രി, അമ്മയെ സംസ്കാര ശൂന്യമായി അധിക്ഷേപിച്ച രാഹുലിന്റെ നിലവാരമില്ലായ്മയെന്ന് പദ്മജ


എതിര് സ്ഥാനാര്ത്ഥിയെ ശത്രുവായി കാണുന്ന രാഷ്ട്രീയ സംസ്കാരം നിന്ദ്യമാണ്. ഡോ. സരിന് തന്റെ എതിര് സ്ഥാനാര്ത്ഥിയെ അങ്ങോട്ട് വിഷ് ചെയ്യാന് തയ്യാറായത് ശരിയായ നടപടിയാണ്.
പാലക്കാട്: ഉപതെരഞ്ഞെടുപ്പ് പ്രചാരണം കടുക്കവെ വിവാഹ വേദിയില് കണ്ടുമുട്ടിയ പാലക്കാട്ടെ ഇടതുമുന്നണി സ്ഥാനാര്ത്ഥി പി സരിന് കൈകൊടുക്കാതെ മുഖംതിരിച്ച ഷാഫി പറമ്പിലിനും രാഹുല് മാങ്കൂട്ടത്തിലിനും സോഷ്യല് മീഡിയയില് വിമര്ശനം. രാഷ്ട്രീയമായി എതിരാളികളാണെങ്കിലും നേരിട്ടുകണ്ടാല് കൈകൊടുക്കുകയും കുശലം പറയുകയും ചെയ്യുന്ന മര്യാദ കാട്ടാതെയാണ് രാഹുലും ഷാഫിയും പോയതെന്നാണ് വിലയിരുത്തല്.
ബിജെപി നേതാവ് പത്മജ വേണുഗോപാലും മന്ത്രി എംബി രാജേഷും ഇരുവരുടേയും പക്വതയില്ലായ്മയേയും അനാദരവിനേയും വിമര്ശിച്ച് രംഗത്തെത്തി. അമ്മയെ അധിക്ഷേപിച്ച രാഹുലിന്റെ നിലവാരമില്ലായ്മയാണ് തെളിഞ്ഞുകാണുന്നതെന്നാണ് പത്മജയുടെ വിമര്ശനം. രാഹുലിന്റേയും സ്പോണ്സര് വടകര എംപിയുടേയും പെരുമാറ്റം ജനം അളക്കുമെന്ന് മന്തിയും പ്രതികരിച്ചു.
എംബി രാജേഷിന്റെ ഫേസ്ബുക്ക് പോസ്റ്റ്,
മനുഷ്യര് ഇത്ര ചെറുതായിപ്പോകാമോ?
എത്ര വിനയം അഭിനയിക്കാന് ശ്രമിച്ചാലും ഉള്ളിലുള്ള യഥാര്ത്ഥ സംസ്കാരം ചില സന്ദര്ഭങ്ങളില് പുറത്തുചാടും. ഇന്ന് കല്യാണവീട്ടില് വെച്ച് പാലക്കാടെ യുഡിഎഫ് സ്ഥാനാര്ത്ഥിയും അദ്ദേഹത്തിന്റെ സ്പോണ്സര് വടകര എം പിയും ഡോ. സരിനോട് ചെയ്തത് അതാണ്.
പരസ്പരം എതിര് സ്ഥാനാര്ത്ഥികളായി മത്സരിക്കുന്നു എന്നത്, കണ്ടാല് മിണ്ടാത്ത ശത്രുതയാകുമോ? രാഷ്ട്രീയത്തിലും പൊതുജീവിതത്തിലും എല്ലാക്കാലത്തുമുണ്ടായിട്ടുള്ള ചില സാമാന്യ മര്യാദകളുണ്ട്. അതിനൊന്നും ഒരു വിലയും കല്പിക്കാത്ത പെരുമാറ്റമാണ് ഇന്ന് അവരില് നിന്നുണ്ടായത്.
എനിക്കെതിരെ ആദ്യം മത്സരിച്ചത് ശ്രീ. സതീശന് പാച്ചേനിയായിരുന്നു. മത്സരിച്ചപ്പോഴും അദ്ദേഹം അടുത്തിടെ മരിക്കുന്നതു വരെയും സൗഹൃദത്തിന് ഒട്ടും കുറവില്ലായിരുന്നു. ശ്രീ. എം പി വീരേന്ദ്രകുമാറുമായി വാശിയേറിയ മത്സരമായിരുന്നു. അതിനിടയില് കണ്ടുമുട്ടിയപ്പോഴൊന്നും കൈകൊടുക്കാതെയോ മിണ്ടാതെയോ പരസ്പരം മുഖം തിരിച്ചിട്ടില്ല. ശ്രീ. വി കെ ശ്രീകണ്ഠനോട് 2019 ല് ഞാന് പരാജയപ്പെട്ടത് അപ്രതീക്ഷിതമായിരുന്നു. പിറ്റേന്ന് ഞാന് അദ്ദേഹത്തെ വിളിച്ച് അഭിനന്ദനം അറിയിച്ചു. കുറച്ചുദിവസം കഴിഞ്ഞൊരുനാള് അതുവഴി പോകുമ്പോള് ശ്രീകണ്ഠന് എന്റെ വീട്ടില് വന്ന് ഭക്ഷണവും കഴിച്ച് സൗഹൃദ സംഭാഷണവും നടത്തിയാണ് മടങ്ങിയത്. തൃത്താലയില് ശ്രീ. വി ടി ബല്റാമുമായുള്ള മത്സരത്തിലെ വാശി കടുപ്പമേറിയതായിരുന്നു. പക്ഷേ അന്നുപോലും പരസ്പരം കൈകൊടുക്കാതിരിക്കാനോ മിണ്ടാതെ മുഖം തിരിക്കാനോ ഞങ്ങള് മുതിര്ന്നിട്ടില്ല.
എതിര് സ്ഥാനാര്ത്ഥിയെ ശത്രുവായി കാണുന്ന രാഷ്ട്രീയ സംസ്കാരം നിന്ദ്യമാണ്. ഡോ. സരിന് തന്റെ എതിര് സ്ഥാനാര്ത്ഥിയെ അങ്ങോട്ട് വിഷ് ചെയ്യാന് തയ്യാറായത് ശരിയായ നടപടിയാണ്. പക്വതയും വിവേകവുമുള്ള ഒരു പൊതുപ്രവര്ത്തകന് അങ്ങിനെയാണ് ചെയ്യേണ്ടത്. അവരുടെ പെരുമാറ്റം സരിനല്ല അപമാനമുണ്ടാക്കിയത്. യുഡിഎഫ് സ്ഥാനാര്ഥിയുടെയും സ്പോണ്സറുടെയും പെരുമാറ്റം ജനം അളക്കും.

പത്മജ വേണുഗോപാലിന്റെ ഫേസ്ബുക്ക് പോസ്റ്റ്,
ഞാന് കോണ്ഗ്രസ് വിട്ടപ്പോള് എന്റെ അമ്മയെ
സംസ്കാര ശൂന്യമായി അധിക്ഷേപിച്ച പയ്യന് അല്ലേ ഈ രാഹുല്...
രാഷ്ട്രീയ അഭിപ്രായ വ്യത്യാസങ്ങള് ഉണ്ടാകാം.. ഇവിടെ സരിന്റെ രാഷ്ട്രീയ മാന്യതയാണ് ഉയര്ന്നത്...
എതിര് സ്ഥാനാര്ത്ഥി കൈ കൊടുത്തില്ലെങ്കില് സരിന് ഒന്നുമില്ല..
പക്ഷേ കോണ്ഗ്രസ് കുട്ടി നേതാക്കളുടെ നിലവാരമില്ലായ്മയാണ് ഇവിടെ തെളിഞ്ഞു കാണുന്നത്...( ഇക്കാര്യത്തില് രാഷ്ട്രീയം മാറ്റി വെച്ചുള്ള എന്റെ അഭിപ്രായം )
പത്മജ വേണുഗോപാല്..