.jpg)
സംസ്ഥാനത്ത് ഇന്ന് അര്ദ്ധരാത്രി മുതല് ട്രോളിംഗ് നിരോധനം
Jun 9, 2026, 06:41 IST
ഇക്കാലയളവില് യന്ത്രവത്കൃത ബോട്ടുകള്ക്ക് കടലില് പോയി മീന് പിടിക്കാന് വിലക്കുണ്ട്.
സംസ്ഥാനത്ത് ട്രോളിംഗ് നിരോധനം ഇന്ന് അര്ദ്ധരാത്രി നിലവില് വരും. ജൂലൈ 31 വരെ 52 ദിവസമാണ് നിരോധനം. പ്രജനനം സുഗമമാക്കുക വഴി മത്സ്യ സമ്പത്ത് വര്ധിപ്പിക്കാന് ലക്ഷ്യമിട്ടാണ് മണ്സൂണ് കാല ട്രോളിംഗ് നിരോധനം. ഇക്കാലയളവില് യന്ത്രവത്കൃത ബോട്ടുകള്ക്ക് കടലില് പോയി മീന് പിടിക്കാന് വിലക്കുണ്ട്. രണ്ടുവള്ളങ്ങള് ചേര്ന്ന് നടത്തുന്ന പെയര് ട്രോളിംഗും കര്ശനമായി നിരോധിച്ചു. ഹാര്ബറുകളിലെ ഡീസല് ബങ്കുകളുടെ പ്രവര്ത്തനവും നിര്ത്തിവെക്കും.
അന്യസംസ്ഥാന ബോട്ടുകള്ക്ക് തീരത്ത് വിലക്കുണ്ട്. നിരോധനകാലത്ത് പരമ്പരാഗത മത്സ്യ തൊഴിലാളികള്ക്ക് ഇളവുണ്ട്. ചെറുവള്ളങ്ങള് ഉപയോഗിച്ച് ഉപരിതല മത്സ്യബന്ധനം നടത്താം. തീരത്ത് നിന്ന് 12 നോട്ടിക്കല് മൈല് അകലെ വരെ പോയി ഇവര്ക്ക് മീന് പിടിക്കാം. നിരോധനം ലംഘിക്കുന്നവര് കര്ശന നിയമ നടപടി നേരിടേണ്ടി വരും.
