പ്രായപൂർത്തിയാകാത്ത ദലിത് പെൺകുട്ടിക്ക് നേരെ അക്രമം: യുവാവ് അറസ്റ്റിൽ
കിളിമാനൂർ: പ്രായപൂർത്തിയാകാത്ത ദലിത് പെൺകുട്ടിയെ വഴിയിൽ തടഞ്ഞുനിർത്തി ദേഹോപദ്രവമേൽപ്പിച്ച കേസിൽ യുവാവ് അറസ്റ്റിൽ. കൊല്ലം ഇടയ്ക്കാട് ദേവഗിരി ജങ്ഷനിൽ ലിതിൻ ഭവനിൽ ലിതിനെയാണ് (31) കിളിമാനൂർ പൊലീസ് അറസ്റ്റ് ചെയ്തത്.
സംഭവത്തെക്കുറിച്ച് പൊലീസ് പറയുന്നതിങ്ങനെ: ഇക്കഴിഞ്ഞ 24ന് വൈകുന്നേരം അഞ്ചോടെ തൊളിക്കുഴി ഡ്രൈവിങ് സ്കൂളിന് സമീപത്തായിരുന്നു സംഭവം. റോഡിലൂടെ നടന്നുവരുകയായിരുന്ന പെൺകുട്ടിയെ മുൻവൈരാഗ്യത്തിന്റെ പേരിൽ ബൈക്കിലെത്തിയ പ്രതി കടന്നുപിടിച്ച് ഉപദ്രവിക്കുകയായിരുന്നു.
കുതറിയോടി രക്ഷപ്പെട്ട പെൺകുട്ടി വീട്ടിലെത്തി വിവരം ധരിപ്പിച്ചതിനെ തുടർന്ന് രക്ഷിതാക്കൾ കിളിമാനൂർ പൊലീസിൽ പരാതി നൽകി. ഒളിവിൽ പോയ പ്രതിയെ ആറ്റിങ്ങൽ ഡിവൈ.എസ്.പിയുടെ നേതൃത്വത്തിലുള്ള അന്വേഷണ സംഘം പിടികൂടുകയായിരുന്നു. ആറ്റിങ്ങൽ കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.