.jpg)
ശബരിമലയില് പുതിയ അരവണ പ്ലാന്റ് സ്ഥാപിക്കും
ഈ സീസണ് കഴിഞ്ഞാലുടന് അരവണ പ്ലാന്റ് വിപുലീകരണ പ്രവൃത്തികള്ക്ക് തുടക്കമാകുമെന്ന് ദേവസ്വം ബോര്ഡ് പ്രസിഡന്റ് പറഞ്ഞു.
ശബരിമല സന്നിധാനത്ത് പുതിയ അരവണ പ്ലാന്റിന്റെ സാധ്യത പഠനം പൂര്ത്തിയായി. ദിവസവും നാല് ലക്ഷം കണ്ടെയ്നര് അരവണ ഉത്പാദിപ്പിക്കാന് സാധിക്കുന്ന പ്ലാന്റാണ് തിടപ്പള്ളിയോട് ചേര്ന്ന് സ്ഥാപിക്കുക. ഈ സീസണ് കഴിഞ്ഞാലുടന് അരവണ പ്ലാന്റ് വിപുലീകരണ പ്രവൃത്തികള്ക്ക് തുടക്കമാകുമെന്ന് ദേവസ്വം ബോര്ഡ് പ്രസിഡന്റ് പറഞ്ഞു.
നിലവില് 40 ലക്ഷം ടിന് അരവണ കരുതല് ശേഖരമായി ഉണ്ടെങ്കിലും ആവശ്യക്കാര് കൂടിയതോടെയാണ് പ്ലാന്റ് വിപുലീകരണത്തിന് ദേവസ്വം ബോര്ഡ് ആക്കം കൂട്ടുന്നത്. തന്ത്രിയുടെ തീരുമാനം കൂടി അനുകൂലമായാല് അടുത്ത സീസണില് തന്നെ ഉത്പാദനം കൂട്ടാനാകുമെന്നാണ് കണക്കുകൂട്ടല്.
ശബരിമലയിലെ പ്രധാന പ്രസാദമായ അരവണ, മൂന്നരലക്ഷം ടിന്നുകളാണ് ദിവസവും വിറ്റുപോകുന്നത്. എന്നാല് രണ്ടര ലക്ഷം ടിന്നാണ് നിലവിലെ അരവണ പ്ലാന്റിന്റെ ഉല്പ്പാദന ശേഷി. കരുതല് ശേഖരമുള്ളതുകൊണ്ടാണ് ഇക്കുറി കടുത്ത അരവണ ക്ഷാമത്തിലേക്ക് കടക്കാത്തത്. ഭാവിയില് പ്രതിസന്ധി കൂടാനുള്ള സാധ്യത കണക്കിലെടുത്താണ് പുതിയ പ്ലാന്റ്. നിലവിലെ അരവണ പ്ലാന്റിനോട് ചേര്ന്നാവും പുതിയ പ്ലാന്റും വരിക. ഇതോടെ, ഉത്പാദനം നാല് ലക്ഷം ടിന് ആയി ഉയര്ത്താനാണ് ലക്ഷ്യമിടുന്നത്.
