.jpg)
വിമര്ശനങ്ങള്ക്കിടെ മുന്നോട്ട് ; മുഖ്യമന്ത്രിയുടെ സെക്രട്ടറിയായി ഡോ.രത്തന് ഖേല്ക്കര് ഇന്ന് ചുമതലയേല്ക്കും
ഡോ. രത്തന് യു. ഖേല്ക്കറെ മുഖ്യമന്ത്രി വി.ഡി. സതീശന്റെ സെക്രട്ടറിയാക്കിയതില് സാമൂഹിക മാധ്യമങ്ങളില് അടക്കം വിമര്ശനമുയര്ന്നിരുന്നു.
പ്രതിപക്ഷ വിമര്ശനങ്ങള്ക്കിടെ, മുഖ്യമന്ത്രിയുടെ സെക്രട്ടറിയായി ഡോ.രത്തന് ഖേല്ക്കര് ഇന്ന് ചുമതലയേല്ക്കും. മുഖ്യമന്ത്രിയുടെ നിര്ദേശ പ്രകാരമാണ് അവധി ദിനത്തില് തന്നെ ചുമതലയേറ്റെടുക്കുന്നത്. മുഖ്യ തെരഞ്ഞെടുപ്പ് ഒീഫീസറായിരുന്ന ഡോ. രത്തന് യു. ഖേല്ക്കറെ മുഖ്യമന്ത്രി വി.ഡി. സതീശന്റെ സെക്രട്ടറിയാക്കിയതില് സാമൂഹിക മാധ്യമങ്ങളില് അടക്കം വിമര്ശനമുയര്ന്നിരുന്നു. സിപിഎം നേതാവ് പി. രാജീവ് അടക്കമുള്ളവര് നിയമനത്തിനെതിരെ രംഗത്തെത്തി. യുഡിഎഫിനെ ജയിപ്പിച്ചതിലുള്ള ഉപകാര സ്മരണമയെന്നാണ് ആരോപണം. എന്നാല് നിയമനത്തില് രാഷ്ട്രീയമില്ലെന്നും കാര്യശേഷിയുള്ള ഉദ്യോഗസ്ഥനാണെന്നും മന്ത്രിയും കെപിസിസി പ്രസിഡന്റുമായി സണ്ണി ജോസഫ് പ്രതികരിച്ചു.
ബംഗാളില് ബിജെപി അധികാരത്തിലെത്തിയതിന് പിന്നാലെ മുന് മുഖ്യതെരഞ്ഞെടുപ്പ് ഓഫീസറെ ചീഫ് സെക്രട്ടറിയും എസ്ഐആര് നിരീക്ഷകനായിരുന്ന ഉദ്യോഗസ്ഥനെ മുഖ്യമന്ത്രിയുടെ ഉപദേഷ്ടാവും ആക്കിയതിനെതിരെ രാഹുല് ഗാന്ധി ഉള്പ്പെടെ വിമര്ശിച്ചിരുന്നു. മോഷണം കൂടും തോറും പ്രതിഫലവും കൂടുമെന്നായിരുന്നു രാഹുലിന്റെ വിമര്ശനം. ഈ വിമര്ശനം നിലനില്ക്കെയാണ് കേരളത്തില് മുഖ്യ തെരഞ്ഞെടുപ്പ് ഓഫിസറെ മുഖ്യമന്ത്രിയുടെ സെക്രട്ടറിയായി നിയമിക്കുന്നത്. നിയമനത്തെ അനുകൂലിച്ച് ആഭ്യന്തര മന്ത്രി രമേശ് ചെന്നിത്തലയും രം?ഗത്തെത്തിയിരുന്നു.
